Read Iban Pemungkal 10 Bible Online

Pemungkal 10 - Iban bible

Pemungkal 10

¹Tu peturun anak lelaki Noah ke benama Sem, Ham enggau Japet. Udah bekau bah besai nya, sida tiga tu bisi anak lelaki.

²Bala anak lelaki Japet nya Gomer, Magok, Madai, Jaban, Tubal, Mesek, enggau Tiras. Sida tu nurunka bansa ti ngangkatka nama sida.

³Peturun Gomer nya orang Askenas, Ripat, enggau Togarmah.

⁴Bala peturun Jaban nya orang Elisah, Spain, Saiprus enggau Rot.

⁵Sida nya meh orang ke nurunka bansa ti diau ba sebelah tebing tasik, enggau ba sebelah pulau di tasik. Nya meh gaya bala peturun Japet ti diau nitihka raban bansa enggau menua sida empu. Genap bengkah raban bansa nya endang bisi jaku ke diri empu.

⁶Bala anak lelaki Ham, iya nya Kus, Ejip, Libia, enggau Kanaan, nurunka bansa ti ngangkatka nama sida.

⁷Peturun Kus nya orang Seba, Habilah, Sabtah, Ramah, enggau Sapteka. Peturun Ramah nya orang Sheba enggau Dedan.

⁸Kus bisi anak lelaki siku ke benama Nimrot, orang ke terubah-rubah nyadi bujang berani di dunya tu.

⁹Ari saup TUHAN, iya nyadi orang ke landik ngasu. Nya kebuah orang nyebut, “Awakka TUHAN ngaga nuan nyadi orang ke landik ngasu baka Nimrot!”

¹⁰Menua ti terubah diperintah iya nyengkaum Babel, Erek, enggau Akat, semua menua nya di menua Babilon magang.

¹¹Ari menua nya iya mansang ngagai menua Asiria lalu nirika nengeri Nineweh, Rihobot Ir, Kalah,

¹²enggau Resen, ba entara Nineweh enggau nengeri ti besai ke benama Kalah.

¹³Peturun Ejip nya orang Lidia, Anam, Lehap, Naptuh,

¹⁴Patrus, Kasluh, enggau Krit. Tu orang ke nurunka orang Pilistin.

¹⁵Anak Kanaan nya Sidon, anak tuai iya, enggau Het. Seduai tu nurunka bansa ti ngangkatka nama seduai iya.

¹⁶Kanaan mega nurunka orang Jebus, orang Amor, orang Girgas,

¹⁷orang Ibi, orang Arka, orang Sin,

¹⁸orang Arbat, orang Semar, enggau orang Hamat. Raban orang Kanaan ngachir ngagai menua bukai.

¹⁹Menua orang Kanaan berengkah ari Sidon ngerembai tunga ke selatan nuju ngagai Gerar, nyentuk ngagai Gasa, enggau tunga ke timur nyentuk ngagai Sodom, Gomorah, Admah, enggau Seboim semak Lasa.

²⁰Nya meh gaya peturun Ham. Sida diau nitihka raban bansa enggau menua sida empu, lalu siti-siti raban bansa nya endang bisi jaku ke diri empu.

²¹Sem, iya nya aka Japet, nurunka semua orang Hebrew.

²²Bala anak lelaki Sem nya Elam, Asur, Arpaksat, Lut, enggau Aram. Sida tu nurunka bansa ti ngangkatka nama sida.

²³Bala peturun Aram nya orang Us, Hul, Geter, enggau Mesek.

²⁴Arpaksat nya apai Selah, lalu Selah nya apai Eber.

²⁵Eber bisi dua iku anak lelaki. Siku benama Pelek,[41] laban lebuh rambau iya kelia, orang di dunya tu nyau bepechah-belah; lalu siku nama Joktan.

²⁶Bala peturun Joktan nya orang Almodat, Selep, Hasarmabet, Jerah,

²⁷Hadoram, Usal, Diklah,

²⁸Obal, Abimael, Sheba,

²⁹Opir, Habilah, enggau Jobap. Semua sida tu peturun Joktan magang.

³⁰Menua ti alai sida diau nya berengkah ari Mesa nyentuk ngagai Separ di menua ti bebukit di timur.

³¹Nya meh gaya bala peturun Sem, lalu sida diau nitihka raban bansa enggau menua sida empu, lalu genap bengkah raban bansa nya endang bisi jaku ke diri empu.

³²Semua sida nya endang peturun Noah magang, nitihka genap bengkah bansa, enggau peturun sida. Udah bekau bah nya, semua bansa dalam dunya tu endang peturun bala anak lelaki Noah magang.