Read Iban Pemungkal 11 Bible Online

Pemungkal 11 - Iban bible

Pemungkal 11

¹Terubah iya kelia, orang di dunya tu bejaku ngena siti aja jaku.

²Lebuh sida segau-segau bejalai di Timur, sida datai ba emperan menua Babilon, lalu ngentapka diri dia.

³Ku sida berandau enggau pangan diri, “Aram kitai ngaga batu bata, lalu nunu batu bata nya ngambika kering.” Nya alai sida bisi batu bata ti dipejantilka sida ngena tar.

⁴Ku sida bejaku, “Aram kitai ngaga sebuah nengeri, enggau sebuah menara ti bediri nyentuk ke langit, ngambika kitai tampak nama, lalu enda pambar di serata dunya.”

⁵Udah nya TUHAN nurun, deka meda nengeri enggau menara ti udah digaga sida,

⁶lalu ku Iya bejaku, “Sida tu sama sebansa magang, lalu bejaku ngena siti aja jaku. Tu semina pun ke semua utai ti deka dikereja sida. Enda lama da agi sida ulih ngaga sebarang utai ti dikedekaka sida!

⁷Aram Kitai nurun lalu nyarutka jaku sida, ngambika sida enda meretika utai ti disebut pangan diri.”

⁸Nya alai TUHAN ngachirka sida di serata dunya, lalu sida badu agi ngaga nengeri nya.

⁹Nengeri nya dikumbai Babel,[42] laban TUHAN udah nyarutka jaku semua mensia di nengeri nya, lalu ari nya Iya ngachirka sida di serata dunya.

¹⁰Baka tu ku peturun Sem. Dua taun udah bekau bah besai, lebuh umur Sem 100 taun, iya bisi siku anak lelaki ke benama Arpaksat.

¹¹Udah bekau nya, iya mengkang idup 500 taun da agi, lalu bisi anak ti bukai.

¹²Lebuh Arpaksat umur 35 taun, iya bisi siku anak lelaki benama Selah.

¹³Udah bekau nya, iya mengkang idup 403 taun da agi, lalu bisi anak ti bukai.

¹⁴Lebuh Selah umur 30 taun, iya bisi siku anak lelaki benama Eber.

¹⁵Udah bekau nya, iya mengkang idup 403 taun da agi, lalu bisi anak ti bukai.

¹⁶Lebuh Eber umur 34 taun, iya bisi siku anak lelaki benama Pelek.

¹⁷Udah bekau nya, iya mengkang idup 430 taun da agi, lalu bisi anak ti bukai.

¹⁸Lebuh umur Pelek 30 taun, iya bisi siku anak lelaki benama Reu.

¹⁹Udah bekau nya iya mengkang idup 209 taun da agi, lalu bisi anak ti bukai.

²⁰Lebuh umur Reu 32 taun, iya bisi siku anak lelaki benama Seruk.

²¹Udah bekau nya iya mengkang idup 207 taun da agi, lalu bisi anak ti bukai.

²²Lebuh Seruk umur 30 taun, iya bisi siku anak lelaki benama Nahor.

²³Udah nya iya mengkang idup 200 taun da agi, lalu bisi anak ti bukai.

²⁴Lebuh Nahor umur 29 taun, iya bisi siku anak lelaki benama Terah.

²⁵Udah nya iya mengkang idup 119 taun da agi, lalu bisi anak ti bukai.

²⁶Lebuh umur Terah udah manggai 70 taun, iya nyadi apai Abram, Nahor, enggau Haran.

²⁷Tu peturun Terah apai Abram, Nahor enggau Haran. Haran nya apai Lot,

²⁸lalu Haran mati ba nengeri ada iya di Ur, dalam menua Babilon, lebuh apai iya Terah agi idup.

²⁹Abram jadi enggau Sarai, lalu Nahor jadi enggau Milkah, anak indu Haran. Haran mega apai Iskah.

³⁰Nyadi Sarai mandul.

³¹Terah mai anak iya Abram, uchu iya Lot, iya nya anak Haran, enggau menantu indu iya, Sarai, iya nya bini Abram, angkat ari nengeri Ur di menua Babilon lalu pindah ngagai menua Kanaan. Sida bejalai naka Haran lalu ngentapka diri dia.

³²Dia meh endur alai Terah mati lebuh umur iya 205 taun.