Read Iban Pemungkal 13 Bible Online

Pemungkal 13 - Iban bible

Pemungkal 13

¹Abram angkat ari menua Ejip lalu mansang tunga ke utara, nuju ngagai selatan menua Kanaan,[45] sama enggau bini enggau semua utai iya. Lot mega mupuk sama enggau iya.

²Abram tu orang ke kaya bendar. Iya bisi jelu bedus, kambin, enggau jelu sapi, sereta enggau pirak enggau emas.

³Udah nya iya lalu angkat ari endur nya lalu pindah ari endur siti ngagai endur siti, mansang tunga ngagai Betel. Iya datai ba siti endur entara Betel enggau Ai, ti udah alai iya nirika kem dulu suba

⁴lalu udah ngaga siti alta. Dia iya lalu nyembah TUHAN.

⁵Lot mega bisi jelu bedus, kambin, enggau jelu sapi, lalu bisi mega ruang bilik iya empu, sereta enggau bala ulun.

⁶Nya alai padang rumput dia nyau enda chukup ke seduai iya, enti seduai iya mengkang begulai enggau pangan diri, laban jelu seduai iya nyau kelalu mayuh.

⁷Nya alai orang ke ngibun jelu ke Abram, enggau orang ke ngibun jelu ke Lot, belaya. (Lebuh maya nya, orang Kanaan enggau orang Peris agi diau di menua nya.)

⁸Udah nya Abram lalu bejaku enggau Lot, “Kitai tu sama diri sekaban, lalu bala nuan enggau bala aku enda patut belaya.

⁹Nya alai, manah tua beserara. Pilih ni menua ti dikedekaka nuan. Nuan nguing nengah jalai siti, lalu aku nguing nengah jalai siti.”

¹⁰ Lot lalu ninjau menua nya, lalu nemu semua Lebak Jordan, nyentuk ngagai Soar, sigi mayuh ai, baka kebun TUHAN,[46] tauka baka tanah ti di menua Ejip. (Tu sebedau TUHAN ngerusak nengeri Sodom enggau Gomorah.)

¹¹Nya alai Lot milih semua Lebak Jordan ke iya empu, lalu iya pindah tunga ke timur. Nya meh chara seduai iya beserara ari pangan diri.

¹²Abram mengkang diau di menua Kanaan, lalu Lot ngentapka diri ba sebelah nengeri ti ba emperan nya, lalu nirika kem iya semak nengeri Sodom,

¹³ti diuan orang ke jai, ke bedosa ngelaban TUHAN.

¹⁴Lebuh Lot udah mupuk, TUHAN lalu bejaku ngagai Abram, “Ari endur alai nuan ke bediri diatu, tinjau enggau manah semua menua tu.

¹⁵ Aku deka meri ngagai nuan, enggau ngagai bala peturun nuan semua menua ti dipeda nuan, lalu menua nya deka diempu nuan belama iya.

¹⁶Aku deka meri ngagai nuan mayuh peturun datai ke sida enda ulih diitung agi, baka ke ngitung igi amau[47] di dunya tu!

¹⁷Nya alai diatu, bejalai nuan lalu peratika semua menua tu, laban Aku deka meri semua menua tu ngagai nuan.”

¹⁸Nya alai Abram mindahka kem iya lalu ngentapka diri semak kayu keramat di Mamre di menua Hebron. Dia iya lalu ngaga siti alta ke TUHAN.