Read Iban Pemungkal 15 Bible Online

Pemungkal 15 - Iban bible

Pemungkal 15

¹Udah bekau nya, Abram bisi genera. Dalam genera nya iya ninga TUHAN bejaku ngagai iya munyi tu, “Anang takut, Abram. Aku deka nyaga nuan, lalu meri nuan upah ti besai.”

²Tang ku Abram nyaut, “TUHAN ti Pemadu Tinggi, nama guna upah ti deka diberi Nuan ngagai aku? Aku nadai purih, lalu orang ke deka bempu[49] pesaka aku nya semina Elieser ari Damaskus.

³Nuan nadai udah meri aku purih, lalu siku ari bala ulun aku deka bempu pesaka aku.”

⁴Udah nya Abram lalu ninga TUHAN bejaku baru ngagai iya: “Ukai ulun nuan Elieser ti deka bempu pesaka nuan, tang anak lelaki nuan empu.”

⁵ TUHAN lalu mai Abram pansut, lalu bejaku, “Uji nuan engkadah lalu ngitung bintang ti di langit. Baka nya meh pemayuh peturun nuan.”

⁶ Abram arapka TUHAN, lalu ketegal nya TUHAN ngumbai iya lurus.

⁷Udah nya TUHAN lalu bejaku enggau iya, “Aku tu meh TUHAN ti udah mai nuan pansut ari Ur di menua Babilon, lalu meri ngagai nuan menua tu nyadika pesaka nuan.”

⁸Tang ku Abram nanya, “TUHAN ti Pemadu Tinggi, baka ni ku aku tau nemu menua nya deka diempu aku?”

⁹Disaut TUHAN, “Bai ngagai Aku siku sapi ti indu, siku kambin, enggau siku bedus ti lelaki, genap iku sida nya umur tiga taun magang, enggau siku burung achang, enggau siku burung puna.”

¹⁰Abram mai semua jelu nya ngagai Allah Taala. Tubuh semua jelu nya lalu dibelah iya dua. Iya lalu ngengkahka bidang tubuh siku-siku jelu nya berimbai, ba dua iti baris; tang tubuh burung enda dibelah.

¹¹Burung ti bepakaika bangkai lalu datai ngagai bangkai jelu enggau bangkai burung nya, tang Abram muru sida.

¹² Lebuh mata hari nyau nurun, Abram jenak amat tinduk. Iya lalu berasai balat amat takut.

¹³ Ku TUHAN bejaku ngagai iya, “Nuan enda tau enda nemu tu: bala peturun nuan deka nyadi orang kampar di menua bukai. Sida deka nyadi ulun di menua nya, lalu deka kena perinsa empat ratus taun.

¹⁴ Tang Aku deka ngukum bansa orang ke ngaga sida nyadi ulun, lalu lebuh sida ninggalka menua nya, sida deka mai mayuh pengaya.

¹⁵Nuan empu deka idup datai ke umur nuan nyau tuai, mati enggau selamat, lalu dikuburka.

¹⁶Empat serak udah bekau nya, nya baru bala peturun nuan deka pulai baru ngagai menua tu, laban Aku enggai muru orang Amor sebedau sida nyadi chukup jai, lalu patut diukum.”

¹⁷Lebuh mata hari nyau udah terunjam, lalu hari pen nyau petang, sigi periuk ti berasap, enggau siti sempun ti mau, pegari lalu bejalai ensaraka bidang tubuh jelu nya.

¹⁸ Nya meh maya TUHAN ngaga siti sempekat enggau Abram. Ku TUHAN, “Aku besemaya deka meri semua menua tu ngagai bala peturun nuan, berengkah ari garis entara menua orang Ejip nyentuk ngagai Sungai Eupratis,

¹⁹nyengkaum menua orang Ken, orang Kenis, orang Kadmon,

²⁰orang Iti, orang Peris, orang Repaim,

²¹orang Amor, orang Kanaan, orang Girgas, enggau orang Jebus.”