Read Iban Pemungkal 17 Bible Online

Pemungkal 17 - Iban bible

Pemungkal 17

¹Lebuh umur Abram manggai semilan puluh semilan taun, TUHAN pegari di mua iya, lalu bejaku, “Aku tu Allah Taala ti Pemadu Bekuasa.[53] Nuan enda tau enda ngasika Aku, lalu ngereja utai ti ngena.

²Aku deka ngaga siti sempekat enggau nuan, lalu meri nuan mayuh peturun.”

³Abram lalu nyungkurka diri ke tanah; lalu ku Allah Taala bejaku,

⁴“Tu sempekat ti digaga Aku enggau nuan: Aku besemaya deka ngasuh nuan nyadi apai ke mayuh bengkah bansa.

⁵ Nama nuan ukai Abram agi, tang Abraham,[54] laban Aku ngaga nuan nyadika apai mayuh bengkah bansa.

⁶Aku deka meri nuan mayuh peturun, lalu sekeda sida deka nyadi raja. Peturun nuan mayuh, datai ke sida nyadi mayuh bengkah bansa.

⁷ “Aku deka ngamatka semaya Aku enggau nuan, sereta enggau peturun nuan, nyadika sempekat ti meruan belama iya. Aku deka nyadi Allah Taala nuan, enggau nyadi Allah Taala ke peturun nuan.

⁸ Aku deka meri ngagai nuan, enggau ngagai peturun nuan, menua tu, ti alai nuan diau nyadi orang kampar diatu. Semua menua Kanaan deka diempu peturun nuan belama iya, lalu Aku deka nyadi Allah Taala sida.”

⁹Ku Allah Taala bejaku ngagai Abraham, “Nuan mega enda tau enda besetuju deka ngasika sempekat tu, nuan enggau semua serak peturun nuan ke jemah ila.

¹⁰ Nuan enggau peturun nuan enda tau enda semua besetuju nutus semua bala kita ke lelaki.

¹¹Belabuh ari diatu, nuan enda tau enda nutus semua anak mit ti lelaki lebuh umur sida lapan hari, nyengkaum ulun ke ada dalam rumah kita, enggau ulun ke dibeli kita ari orang bansa bukai. Tu kena nanda sempekat entara Aku enggau nuan.

¹³Genap iku orang enda tau enda ditutus, lalu tu deka nyadika kelai ba tubuh kita, kena nunjukka sempekat Aku enggau nuan endang meruan belama iya.

¹⁴Lelaki ti enda ditutus, deka badu agi dikumbai nembiak Aku, laban iya enda nitihka sempekat Aku.”

¹⁵Ku Allah Taala bejaku ngagai Abraham, “Nuan enda tau agi ngumbai bini nuan Sarai. Kenyau ari diatu nama iya Sarah.[55]

¹⁶Aku deka merekatka iya, lalu Aku deka meri ngagai nuan siku anak lelaki ulih iya. Aku deka merekatka iya, lalu iya deka nyadi indai ke mayuh bengkah bansa, lalu sekeda ari peturun iya deka nyadi raja.”

¹⁷Abraham nyungkurka diri ke tanah, tang iya ketawa lebuh iya berunding, “Baka ni ku lelaki ke umur seratus taun tau bisi anak? Baka ni ku Sarah ulih ngadaka anak lebuh umur iya nyau semilan puluh taun?”

¹⁸Iya lalu nanya ngagai Allah Taala, “Nama kebuah enda ngasuh Ismail nampung waris aku?”

¹⁹Tang ku Allah Taala bejaku, “Enda tau. Bini nuan Sarah deka ngadaka siku anak lelaki ke nuan, lalu nuan deka meri iya nama Isak.[56] Aku deka ngingatka sempekat Aku enggau iya, sereta enggau peturun iya belama iya. Sempekat nya deka meruan belama iya.

²⁰Aku udah ninga peminta nuan pasal Ismail, nya alai Aku deka merekatka iya, lalu meri ngagai iya mayuh anak, enggau mayuh peturun. Iya deka nyadi apai ke dua belas iku raja, lalu Aku deka ngaga siti bansa ti besai ari bala peturun iya.

²¹Tang Aku deka ngingatka sempekat Aku enggau anak nuan Isak, ti deka diadaka Sarah ba urung maya tu taun baru tu ila.”

²²Lebuh Allah Taala udah tembu bejaku ngagai Abraham, Iya lalu ninggalka Abraham.

²³Ba hari nya Abraham ngasika Allah Taala, lalu nutus anak iya Ismail, enggau semua lelaki bukai ke dalam ruang bilik iya, nyengkaum bala ulun ke ada dalam rumah iya, sereta enggau ulun ti udah dibeli iya.

²⁴Umur Abraham semilan puluh semilan taun lebuh iya ditutus,

²⁵lalu umur anak iya Ismail tiga belas taun.

²⁶Seduai iya sama ditutus sereta hari,

²⁷sama enggau semua ulun Abraham empu.