Read Iban Pemungkal 18 Bible Online

Pemungkal 18 - Iban bible

Pemungkal 18

¹TUHAN pegari di mua Abraham ngimbai kayu ti besai di Mamre. Lebuh maya nya Abraham benung duduk ba penama ngagai langkau kain iya, laban hari balat amat angat.

² Iya malik lalu tepedaka tiga iku lelaki bediri enda jauh ari iya. Lebuh iya meda sida, iya lalu belanda ngambat sida. Iya nyungkurka diri ke tanah,

³lalu bejaku, “Tuan, anang semina mansa rumah aku lalu enda ngetu. Aku sedia deka ngintu kita tiga.

⁴Awakka aku mai ai kena kita tiga masu kaki. Kita tau ngetu lalu belelak di baruh pun kayu tu.

⁵Aku deka mega mai pemakai, ngambika kita kering majakka pejalai diri. Kita udah datai ba rumah aku, nya alai awakka aku ngintu kita tiga.” Ku sida tiga nyaut iya, “Kereja aja utai ti ku nuan.”

⁶Abraham lalu beguai-guai tama ngagai langkau kain iya, lalu bejaku enggau Sarah, “Jampat! Ambi tepung nuan ti pemadu alus, lalu panggang roti.”

⁷Udah nya iya lalu belanda ngagai raban jelu sapi lalu nangkap siku anak sapi ti gemu, lalu nyerahka jelu nya ngagai ulun iya. Ulun nya lalu beguai-guai mela jelu nya.

⁸Iya ngambi lemak tusu, ai tusu, enggau dagin, lalu ngenahka pemakai nya di mua sida tiga. Di baruh pun kayu nya meh endur alai iya ke meri sida tiga makai, lalu sida tiga makai.

⁹Udah nya sida lalu nanya iya, “Dini alai bini nuan Sarah?” “Dalam langkau kain,” ku Abraham nyaut.

¹⁰Siku ari sida tiga lalu bejaku, “Ba urung maya tu taun baru tu ila Aku deka datai baru, lalu bini nuan Sarah deka ngadaka anak lelaki siku.” Nyadi Sarah bisi ari belakang orang nya, ba mua pintu langkau kain nya, mendingka orang nya bejaku.

¹¹Abraham seduai Sarah sama udah tuai amat umur, lalu Sarah udah badu agi datai kain.

¹² Nya alai Sarah ketawa dalam ati diri, ku iya, “Aku diatu nyau tuai. Baka ni ku aku agi ulih beleman enggau laki aku? Nambahka nya, laki aku pen nyau tuai.”

¹³Udah nya TUHAN lalu nanya Abraham, “Nama kebuah Sarah ketawa lalu nyebut, ‘Baka ni ku aku ulih beranak lebuh aku nyau tuai baka tu?’

¹⁴Kati TUHAN enda ulih ngereja sebarang utai? Munyi ti disebut Aku, semilan bulan ari diatu aku deka datai ditu baru, lalu Sarah deka ngadaka anak lelaki siku.”

¹⁵Sarah takut lalu besangkalka diri ti udah ketawa. “Nadai aku ketawa,” ku iya bejaku. TUHAN lalu nyaut. “Sigi amat, nuan udah ketawa tadi.”

¹⁶Udah nya sida tiga mupuk, lalu mansang ngagai siti endur alai sida ke ulih ninjau ke baruh ngagai nengeri Sodom, lalu Abraham bejalai enggau sida, deka meda sida tiga mupuk.

¹⁷Lalu ku TUHAN bejaku dalam ati Diri, “Aku enggai ngelalaika ari Abraham utai ti deka dikereja Aku.

¹⁸Peturun iya deka nyadi bansa ti besai sereta kering, lalu Aku deka merekatka semua bansa ngena iya.[57]

¹⁹Aku udah milih iya, ngambika iya ngasuh bala anak iya enggau peturun iya ngasika Aku, lalu ngereja utai ti ngena sereta lurus. Enti sida ngereja nya, nya baru Aku deka ngereja ke Abraham semua utai ti udah disemaya Aku.”

²⁰Udah nya TUHAN lalu bejaku, “Sodom enggau Gomorah sama udah kena dawa laban seduai iya udah ngereja utai ti amat jai, lalu dosa seduai iya amat besai.

²¹Aku enda tau enda nurun kin, deka nentuka enti jaku dawa ti didinga Aku nya amat tauka enda.”

²²Udah nya orang dua iku nya lalu mansang ngagai Sodom, tang TUHAN ninggalka Diri enggau Abraham.

²³Abraham mansang ngagai TUHAN, lalu nanya, “Kati Nuan amat deka munuh orang ke nadai penyalah sama enggau orang ke bepenyalah?

²⁴Enti sema lima puluh iku orang ke nadai penyalah bisi dalam nengeri nya, kati nuan deka ngerusak semua nengeri nya? Kati Nuan enggai ngalau nengeri nya ngambika sida ke lima puluh iku nya enda kena bunuh?

²⁵Nuan tentu enggai munuh sida ke nadai penyalah sama enggau sida ke bepenyalah. Enggai nyadi baka nya! Nuan enda tau munuh sida! Enti Nuan munuh sida, orang ke nadai penyalah deka kena ukum sama enggau sida. Enggai nyadi sekali-kali baka nya! Hakim ke ngakim semua dunya enda tau enda ngakim enggau lurus.”

²⁶Ku TUHAN nyaut, “Enti sema Aku bisi tetemuka lima puluh iku orang ke nadai penyalah di nengeri Sodom, Aku enda nyadi ngerusak nengeri nya ketegal sida.”

²⁷Abraham lalu bejaku baru: “TUHAN, aku minta Nuan ngampun aku ke changka bejaku ngagai Nuan baka tu. Aku tu semina mensia aja, lalu enda patut bejaku.

²⁸Tang kada enda semina empat puluh lima iku aja orang ke nadai penyalah, ukai lima puluh iku. Kati Nuan deka ngerusak semua nengeri nya, laban sida kurang lima iku?” Ku TUHAN nyaut, “Aku enggai ngerusak nengeri nya enti Aku bisi tetemuka empat puluh lima iku orang ke nadai penyalah dia.”

²⁹Abraham lalu bejaku baru, “Kada enda semina empat puluh iku aja orang ke nadai penyalah bisi dia.” Disaut TUHAN, “Aku enggai ngerusak nengeri nya enti Aku bisi tetemuka empat puluh iku aja orang ke nadai penyalah dia.”

³⁰Ku Abraham, “Anang ringat, TUHAN, tang aku enda tau enda bejaku baru. Kati enti semina tiga puluh iku aja orang ke nadai penyalah dia?” Ku TUHAN nyaut, “Aku enggai ngerusak nengeri nya enti Aku bisi tetemuka tiga puluh iku aja dia.”

³¹Ku Abraham, “TUHAN, ampun aku ke changka bejaku ngagai Nuan baka tu. Kati enti semina dua puluh iku aja bisi ditemu dia?” Ku TUHAN nyaut, “Aku enggai ngerusak nengeri nya enti Aku bisi tetemuka dua puluh iku aja orang ke nadai penyalah dia.”

³²Ku Abraham, “Anang ringat ngagai aku, TUHAN. Aku deka bejaku sekali agi. Kati enti semina sepuluh iku aja bisi ditemu dia?” Ku TUHAN nyaut, “Aku enggai ngerusak nengeri nya enti Aku bisi tetemuka sepuluh iku aja dia.”

³³Lebuh TUHAN udah tembu bejaku enggau Abraham, Iya mupuk, lalu Abraham pulai.