Read Iban Pemungkal 19 Bible Online

Pemungkal 19 - Iban bible

Pemungkal 19

¹Lebuh melikat ke dua iku nya datai di Sodom lemai nya, Lot benung duduk dalam pintu kuta nengeri nya. Lebuh Lot tepedaka seduai iya datai, iya angkat, lalu mansang ngambat seduai iya. Iya meremi di mua seduai iya

²lalu bejaku, “Tuan, aku sedia deka ngintu seduai. Aram tama ngagai rumah aku. Seduai tau masu kaki seduai, lalu bemalam ditu. Seduai tau angkat tumu pagila, lalu majakka pejalai seduai.” Tang ku seduai iya nyaut, “Enda ibuh. Kami duai deka bemalam ba padang di nengeri.”

³Lot majak ngumbuk seduai iya. Nyau kelama, seduai iya lalu tama ngagai rumah Lot. Lot lalu ngasuh bala orang gaji iya manggang roti, lalu nyendiaka pemakai ti manah ke temuai dua iku nya. Lebuh pemakai nya udah sedia, sida lalu makai.

⁴Sebedau temuai nya nindukka diri, bala lelaki nengeri Sodom lalu datai ngelingi rumah Lot. Semua lelaki di nengeri nya, sida ke biak enggau ke tuai, bela bisi dia magang.

⁵ Sida ngangauka Lot, lalu nanya ngagai iya, “Dini alai lelaki dua iku ke datai bemalam enggau nuan malam tu? Bai seduai iya pansut ngagai kami!” Bala lelaki di nengeri Sodom bisi ati deka beleman enggau seduai iya.

⁶Lot pansut, lalu nikupka pintu ari belakang iya.

⁷Ku iya bejaku ngagai sida, “Menyadi, aku minta kita, anang ngereja utai ti jai baka tu!

⁸Dinga kita, aku bisi dua iku anak indu ke agi dara bungas. Awakka aku mai seduai iya pansut ke luar kitu ngagai kita, lalu kita tau ngereja sebarang utai ti dikedekaka kita ngagai seduai iya. Tang anang ngereja utai ngagai orang dua iku tu. Seduai iya temuai aku, lalu aku enda tau enda nyaga seduai iya.”

⁹Tang ku sida bejaku, “Nuan orang kampar, anang mempang kami! Sapa nuan tu ke berani madahka utai ti patut dikereja kami? Anang mempang jalai kami, enggai ke kami ngereja nuan balat agi ari kami ke deka ngereja seduai iya.” Sida lalu ngejuka Lot surut, lalu mansang deka mechahka pintu.

¹⁰Tang orang dua iku ke dalam rumah nya nyapai Lot, narit iya ke dalam, lalu nikupka pintu.

¹¹ Udah nya seduai iya lalu ngasuh semua orang ke di luar buta magang, ngambika sida enda tetemuka pintu nya.

¹²Ku lelaki dua iku nya bejaku enggau Lot, “Enti nuan bisi orang bukai - anak lelaki, anak indu, menantu lelaki, tauka kaban belayan ti bukai dalam nengeri tu - bai sida pansut ari nengeri tu,

¹³laban kami duai deka ngerusak nengeri tu. TUHAN udah ninga dawa ti jai ngelaban orang di nengeri tu, lalu udah ngasuh kami duai ngerusak iya.”

¹⁴Udah nya Lot lalu mansang ngagai lelaki ti deka jadi enggau anak indu iya ke dua iku nya, lalu bejaku, “Pansut jampat ari nengeri tu, laban TUHAN deka ngerusak nengeri tu.” Tang lelaki dua iku nya ngumbai Lot semina bungah aja.

¹⁵Tumu pagi hari siti, melikat dua iku nya ngansak Lot, “Jampat!” ku seduai iya bejaku. “Bai bini nuan enggau dua iku anak dara nuan, lalu angkat ari nengeri tu, ngambika kita enda mati lebuh nengeri tu dirusak.”

¹⁶ Lot kakang. Tang TUHAN kasihka iya. Nya alai temuai ke dua iku nya megai jari Lot lalu ngiring iya, bini iya, enggau dua iku anak indu iya, lalu nguluka sida pansut ari nengeri nya.

¹⁷Siku ari seduai nya lalu bejaku, “Alai kita belanda ngidupka nyawa diri! Anang malik kebelakang, lalu anang ngetu ba sebelah lebak. Belanda ngagai bukit, ngambika kita enda kena bunuh.”

¹⁸Tang ku Lot nyaut, “Tuan, anang ngasuh kami belanda ngagai bukit nya.

¹⁹Seduai udah kasihka aku lalu ngidupka aku. Tang bukit nya jauh amat. Penusah ti besai nya deka ngerusak aku, lalu aku deka mati sebedau aku datai din.

²⁰Kati nuan bisi meda nengeri ti mit nya? Nengeri nya semak agi. Awakka aku kin. Nuan meda endur nya mit, tang aku deka diau likun dia.”

²¹Disaut orang nya, “Au. Aku besetuju. Aku enggai ngerusak nengeri nya.

²²Jampat agi! Belanda! Aku enda ulih ngereja sebarang utai sebedau nuan datai din.” Ketegal Lot udah ngumbai nengeri nya mit, nya alai nengeri nya dikumbai Soar.[58]

²³Mata panas endang udah niki lebuh Lot datai di Soar.

²⁴ TUHAN lalu tekala nya ngujan nengeri Sodom enggau Gomorah ngena api merirang

²⁵lalu ngerusak nengeri dua buah nya, enggau semua lebak nya, sereta enggau semua orang ke diau dia enggau semua utai ti tumbuh di menua nya.

²⁶ Tang bini Lot malik kebelakang, lalu iya nyadi tiang garam.

²⁷Tumu pagi hari siti, Abraham beguai-guai mansang ngagai endur alai iya ti udah bediri enggau TUHAN.

²⁸Iya merening ke baruh ngagai nengeri Sodom enggau Gomorah enggau semua lebak ti di menua nya, lalu meda asap pansut ari menua nya baka ke pansut ari serumbung api.

²⁹Tang lebuh Allah Taala ngerusak nengeri ti ba lebak nya, ti udah alai Lot diau, Iya ingatka Abraham, lalu nejuka Lot ngerarika diri ngagai endur ti likun.

³⁰Nyadi Lot takut diau di Soar, nya alai iya enggau anak indu iya mindah ke atas ngagai bukit, lalu diau dalam lubang gua.

³¹Anak indu Lot ke tuai agi lalu bejaku enggau adi iya, “Apai tua nyau tuai, lalu lelaki ke ulih jadi enggau tua, ke tau ngasuh tua beranak, pen nadai mega di serata dunya tu.[59]

³²Aram tua numi apai tua datai ke iya mabuk, ngambika tua ulih tinduk enggau iya, lalu beranak ulih iya.”

³³Malam nya seduai iya lalu numi Lot enggau wain. Anak indu Lot ke tuai agi lalu beleman enggau apai iya. Tang Lot kelalu balat mabuk, lalu nadai nemu utai.

³⁴Hari siti, anak indu Lot ke tuai agi lalu bejaku enggau adi iya, “Aku udah tinduk enggau iya dimalam. Aram tua numi iya baru malam tu datai ke iya mabuk, lalu nuan tinduk enggau iya. Nya baru tua deka sama bisi anak ulih apai tua.”

³⁵Nya alai malam nya seduai iya numi Lot datai ke iya mabuk, lalu anak indu iya ke biak agi beleman enggau iya. Sekali nya Lot mega kelalu balat mabuk lalu enda nemu utai.

³⁶Nya meh chara anak indu Lot ke dua iku nya ngandung ulih apai seduai iya empu.

³⁷Anak indu iya ke tuai ngadaka siku anak lelaki, lalu iya meri iya nama Moap.[60] Moap nya orang ke nurunka orang bansa Moap ke diatu.

³⁸Anak indu iya ke biak agi mega ngadaka siku anak lelaki, lalu iya meri iya nama Benami.[61] Benami nya meh orang ke nurunka orang bansa Amon ke diatu.