Read Iban Pemungkal 2 Bible Online

Pemungkal 2 - Iban bible

Pemungkal 2

¹Nya alai langit enggau dunya, enggau semua utai ti dalam sida tembu magang digaga.

² Ba hari ti ketujuh Allah Taala tembu ngereja semua pengawa Iya, lalu ngetu gawa.

³Iya merekatka hari ti ketujuh nya, lalu ngeletak hari nya kudus, laban ba hari nya Iya tembu ngaga semua utai ti digaga Iya,[11] lalu Iya belelak lalu ngetu gawa.

⁴Nya meh jalai langit enggau dunya digaga. Lebuh TUHAN ngaga langit enggau dunya,

⁵nadai utai udah tumbuh di dunya, lalu nadai leka utai udah matuk, laban TUHAN Allah Taala apin ngasuh hari ujan, lalu mensia pen apin mega bisi gawa ba tanah;

⁶tang ai deka pansut ari dalam tanah, lalu ngemasahka tanah.

⁷ Udah nya TUHAN Allah Taala nempa mensia ari amau[12] tanah[13] lalu ngesuhka seput pengidup ke dalam lubang idung iya, lalu mensia nya idup.

⁸Udah nya TUHAN Allah Taala ngaga siti kebun di menua Eden, ti muak ke timur, lalu ngengkahka orang ke udah ditempa Iya ba kebun nya.

⁹ TUHAN Allah Taala ngasuh semua bansa kayu ti manah dipeda sereta manah ke pemakai tumbuh dia. Ba tengah-tengah kebun nya bisi mega sepun kayu pengidup, enggau sepun kayu ti meri penemu kena ngelala bida entara utai ti manah ari utai ti jai.[14]

¹⁰Siti sungai pansut ari Eden ti mai ai ngagai kebun nya, lalu ngilah kebun nya sungai nya bepati empat.

¹¹Nama pati ti terubah nya Pison. Ai sungai nya rarat nengah menua Habilah. (

¹²Emas tulin bisi ditemu dia, lalu pia mega minyak wangi enggau batu ti berega.)

¹³Nama pati ti kedua nya Gihon. Ai sungai nya rarat nengah menua Kus.[15]

¹⁴Nama pati ti ketiga nya Tigris. Ai sungai nya rarat tunga ke timur menua Asiria, lalu pati ti keempat nya Eupratis.

¹⁵Udah nya TUHAN Allah Taala ngengkahka orang nya ba kebun Eden, ngambika iya gawa dia lalu nyaga kebun nya.

¹⁶Ku TUHAN Allah Taala bejaku ngagai orang nya, “Nuan tau makai buah ari semua kayu dalam kebun tu,

¹⁷tang nuan enda tau makai buah ari kayu penemu ti tau ngasuh nuan nemu semua utai, laban lebuh nuan makai buah nya, nuan deka mati.”

¹⁸Udah nya TUHAN Allah Taala bejaku, “Enda manah orang tu diau kediri. Aku deka ngaga siku penulung ke iya, nyadika tawing kaling[16] iya.”

¹⁹TUHAN Allah Taala lalu nempa ari tanah semua bansa jelu enggau semua bansa burung. Udah nya Iya lalu mai sida ngagai orang nya, ngambika iya meri sida nama. Nya meh jalai sida bulih nama.

²⁰Nya alai orang nya meri nama ngagai semua bansa jelu tupi, semua bansa burung, enggau semua bansa jelu babas; tang nadai siku sida nya ditemu tau nyadika penulung enggau kaling iya.

²¹Nya alai TUHAN Allah Taala ngasuh orang nya tinduk jenak. Orang nya lalu tinduk. Udah nya TUHAN Allah Taala lalu ngambi siti tulang kerigai orang nya, lalu nampal abi nya ngena isi.

²²TUHAN Allah Taala lalu nempa siku indu ari tulang kerigai nya, lalu mai indu nya ngagai iya.

²³Orang nya lalu bejaku, “Tu baru sedarah, segetah enggau aku saum tulang, saum isi enggau aku. Iya dikumbai[17] “Indu”, laban iya udah diambi ari lelaki.” [18]

²⁴ Nya kebuah lelaki ninggalka apai indai iya, lalu begulai enggau bini iya, lalu seduai iya nyadi siku.

²⁵Seduai iya sama telanjai, tang seduai iya enda malu.