Read Iban Pemungkal 20 Bible Online

Pemungkal 20 - Iban bible

Pemungkal 20

¹Abraham pindah ari Mamre ngagai selatan menua Kanaan,[62] lalu diau ba entara Kades enggau Sur. Udah nya, lebuh iya benung diau di Gerar,

² iya madahka bini iya nya menyadi iya. Nya alai Raja Abimelek ke merintah di nengeri Gerar ngasuh orang mai Sarah ngagai iya.

³Nyadi sekali, lebuh malam hari, Allah Taala pegari di mua Raja Abimelek dalam mimpi, lalu bejaku, “Nuan deka mati, laban nuan udah ngambi indu tu. Iya udah bisi laki.”

⁴Tang Abimelek nadai kala beleman enggau Sarah, lalu ku Abimelek bejaku, “TUHAN, aku nadai penyalah! Kati Nuan deka ngerusak aku enggau bala nembiak aku?

⁵Abraham empu ke ngumbai indu nya menyadi iya, lalu indu nya empu mega madahka nya. Aku ngereja utai tu enggau ati ti beresi, lalu aku nadai udah ngereja penyalah.”

⁶Ku Allah Taala nyaut Abimelek dalam mimpi nya, “Amat. Aku nemu nuan endang ngereja utai nya enggau ati ti beresi. Nya kebuah Aku nagang nuan bedosa ngelaban Aku, lalu enda nyagi nuan negu iya.

⁷Tang diatu, beri indu nya pulai baru ngagai laki iya. Laki iya nya nabi, lalu iya deka besampika nuan, ngambika nuan enda mati. Tang enti nuan enda meri indu nya pulai baru, Aku meri nuan jaku tangkan tu: nuan enggau semua nembiak nuan deka mati.”

⁸Tumu pagi hari siti, Abimelek lalu mesanka semua pemesai iya, lalu madahka ngagai sida utai ti udah nyadi. Sida lalu takut.

⁹Udah nya Abimelek mesanka Abraham, lalu nanya iya, “Nama utai tu ti udah dikereja nuan ngagai kami? Nama penyalah ti udah dikereja aku ngagai nuan, ti ngujungka nuan ngasuh penusah ti besai tu ninggang aku enggau ninggang menua ti dipegai aku? Nadai orang patut ngereja utai baka ke udah dikereja nuan ngagai aku.

¹⁰Nama kebuah nuan ngereja nya?”

¹¹Ku Abraham nyaut, “Aku ngumbai orang ditu enda nangika Allah Taala, lalu aku ngumbai sida deka munuh aku, lalu ngerampas bini aku.

¹²Iya endang amat menyadi aku. Iya anak apai aku, tang kami duai enda saum indai, lalu aku jadi enggau iya.

¹³Nya alai, lebuh Allah Taala ngasuh aku angkat ari rumah apai aku, lalu bejalai ngagai menua bukai, aku bejaku enggau iya, ‘Nuan tau mandangka diri amat taluk ngagai aku, enti nuan madahka ngagai semua orang, aku tu menyadi lelaki nuan.’ ”

¹⁴Udah nya Abimelek nyerahka Sarah pulai baru ngagai Abraham. Abimelek lalu meri Abraham jelu bedus, jelu sapi enggau ulun.

¹⁵Ku iya bejaku ngagai Abraham, “Semua tu endang menua aku magang. Nuan tau diau di sebarang endur ti dikedekaka nuan.”

¹⁶Ku Abimelek bejaku ngagai Sarah, “Aku meri ngagai menyadi nuan seribu singkap pirak kena nanda, di mua semua orang ke begulai enggau nuan, nuan nadai penyalah. Semua orang deka nemu nuan nadai udah ngereja utai ti salah.”

¹⁷Ketegal utai ti udah nyadi ba Sarah, bini Abraham, TUHAN udah nagang semua indu ke dalam istana Abimelek beranak. Nya alai Abraham besampika Abimelek, lalu Allah Taala ngeraika iya. Allah Taala mega ngeraika bini Abimelek, enggau bala ulun iya ti indu, ngambika sida ulih beranak.