Read Iban Pemungkal 21 Bible Online

Pemungkal 21 - Iban bible

Pemungkal 21

¹TUHAN merekatka Sarah munyi ti udah disemaya Iya.

² Sarah lalu ngandung, lalu ngadaka anak lelaki siku ke Abraham, lebuh Abraham nyau udah tuai amat umur. Anak mit nya ada ba maya ti udah diletak Allah Taala.

³Abraham meri iya nama Isak,

⁴ lalu lebuh Isak umur lapan hari, Abraham nutus iya, nitihka atur Allah Taala.

⁵Umur Abraham seratus taun lebuh Isak ada.

⁶Ku Sarah bejaku, “Allah Taala udah nyungkak aku ketawa.[63] Semua orang ke ninga berita tu deka ketawa sama enggau aku.”

⁷Lalu ku Sarah bejaku, “Sapa berani madahka ngagai Abraham Sarah deka nusuka anak? Tang aku udah ngadaka anak ke Abraham lebuh Abraham nyau tuai.”

⁸Anak mit nya mansang besai, lalu ba hari iya badu agi nusu, Abraham nyendiaka pengerami makai besai.

⁹Nyadi sekali, Ismail, anak Abraham ke diadaka indu orang Ejip ke benama Hagar, beduan[64] Isak, anak Sarah.

¹⁰ Lebuh Sarah meda nya, iya lalu bejaku enggau Abraham. Ku iya, “Buru ulun nya enggau anak iya. Anak indu tu enda tau enggau bempu pengaya nuan, laban pengaya nya endang pesaka anak aku, Isak.”

¹¹Jaku nya balat ngenusahka ati Abraham, laban Ismail mega anak iya.

¹² Tang ku Allah Taala bejaku ngagai Abraham, “Anang irau ati ke nembiak nya enggau ulun nuan Hagar. Kereja aja sebarang utai ti diasuh Sarah, laban semina nengah Isak aja nuan deka bulih peturun ti udah disemaya Aku.

¹³Aku deka mega meri mayuh anak ngagai anak ulun nya, ngambika sida nyadi siti bansa, laban iya mega anak nuan.”

¹⁴Tumu pagi hari siti Abraham meri Hagar bekal enggau sekambut ai. Iya nepanka anak mit nya ba belakang Hagar, lalu ngasuh Hagar mupuk. Hagar mupuk, lalu bejalai segau-segau di menua puang Beer-seba.

¹⁵Lebuh ai dalam kambut nya nyau udah abis, Hagar lalu ninggalka anak mit nya di baruh babas

¹⁶lalu nudukka diri kira seratus meter ari endur alai anak mit nya. Ku Hagar bejaku dalam ati diri, “Aku enda tan meda anak aku mati.” Lebuh iya benung duduk dia, iya[65] lalu nyabak.

¹⁷Allah Taala ninga sabak nembiak nya, lalu melikat Allah Taala bejaku ngagai Hagar ari serega, “Nama kebuah nuan tusah ati, Hagar? Anang takut. Allah Taala udah ninga sabak nembiak nya.

¹⁸Angkat nuan lalu pulai baru ngagai anak nuan, berap iya, lalu perindang iya. Aku deka ngaga peturun iya nyadi siti bansa ti kering.”

¹⁹Udah nya Allah Taala lalu ngasuh mata Hagar tebuka, lalu iya tepedaka siti telaga. Hagar mansang ngagai telaga nya lalu ngisi kambut iya enggau ai, lalu meri anak iya ngirup.

²⁰Allah Taala bisi enggau nembiak nya lebuh iya mansang besai. Iya diau di menua puang Paran, lalu iya nyadi orang ke landik ngasu.

²¹Indai iya ngambi siku indu orang Ejip nyadika bini iya.

²² Ba urung maya nya, Abimelek seduai Pikol, ti nyadi kepala soldadu iya, mansang ngagai Abraham deka bejaku enggau iya. Ku Abimelek, “Allah Taala bisi enggau nuan lebuh nuan ngereja semua utai.

²³Nya alai gaga siti semaya ditu di mua Allah Taala, lalu padahka diri enda nipu aku, bala anak aku, tauka peturun aku. Aku udah taluk ngagai nuan, nya alai nuan enda tau enda besemaya deka taluk ngagai aku, enggau ngagai menua tu, alai nuan ke ngampar diatu.”

²⁴Ku Abraham, “Aku besemaya.”

²⁵Abraham beserebana ngagai Abimelek pasal siti telaga ti udah dirampas bala orang gaji Abimelek.

²⁶Ku Abimelek, “Aku enda nemu sapa ngereja nya. Nuan nadai madahka tu ngagai aku. Tu meh keterubah iya aku ninga nya.”

²⁷Udah nya Abraham lalu meri jelu bedus enggau jelu sapi ngagai Abimelek, lalu seduai iya ngaga siti sempekat.

²⁸Abraham lalu magi tujuh iku anak domba ari raban bedus iya,

²⁹lalu Abimelek nanya iya, “Nama kebuah nuan ngereja nya?”

³⁰Disaut Abraham, “Sambut meh tujuh iku anak domba tu, laban enti nuan nyambut sida, reti nya nuan ngaku aku udah numbak telaga nya.”

³¹Nya alai endur nya dikumbai Beer-seba,[66] laban nya endur alai seduai iya udah besumpah.

³²Lebuh seduai iya udah ngaga sempekat nya di Beer-seba, Abimelek seduai Pikol lalu pulai baru ngagai menua Pilistin.

³³Udah nya Abraham nanam sepun kayu tamaris di Beer-seba, lalu nyembah TUHAN Allah Taala ti Meruan Belama Iya.

³⁴Abraham lama diau di menua Pilistin.