Read Iban Pemungkal 22 Bible Online

Pemungkal 22 - Iban bible

Pemungkal 22

¹ Nyau kelama udah bekau nya, Allah Taala nguji Abraham. Ku Iya bejaku ngagai Abraham, “Abraham!” Abraham lalu nyaut, “Tu aku!”

²Ku Allah Taala bejaku, “Bai anak nuan, anak tunggal nuan Isak, ke balat dikerinduka nuan, lalu mansang nuan ngagai menua Moriah, lalu serahka iya dia nyadika piring tunu ba bukit ti deka ditunjukka Aku ngagai nuan.”

³Nya alai Abraham angkat tumu pagi hari siti, nyendiaka keledai iya, lalu mai dua iku ari orang gaji iya, sama enggau anak iya Isak; iya lalu netak kayu kena nunu piring, lalu mupuk ngagai endur ti jauh ti udah ditunjukka Allah Taala ngagai iya.

⁴Ba hari ti ketiga, Abraham tepedaka endur nya ari jauh.

⁵Udah nya iya lalu bejaku ngagai orang gaji iya, “Seduai nganti ditu, ngemataka keledai. Aku enggau anak aku deka kin, lalu nyembah Allah Taala, lalu udah nya kami duai deka pulai baru ngagai seduai.”

⁶Abraham lalu ngasuh Isak ngesan kayu ti deka dikena nunu piring, lalu iya empu mai sebilah duku, enggau bara api. Lebuh seduai iya benung bejalai,

⁷Isak lalu bejaku, “Apai!” “Nama, anak?” ku Abraham nyaut. Isak lalu nanya, “Tua bisi bara api enggau kayu, tang dini alai anak domba nyadika piring tunu?”

⁸Disaut Abraham, “Allah Taala Empu deka meri siku anak domba nyadika piring nya.” Seduai iya majak bejalai.

⁹ Lebuh seduai iya datai ba endur ti udah dipadahka Allah Taala ngagai Abraham, Abraham lalu ngaga siti alta, lalu nugungka kayu api ba alta nya. Iya lalu nanchang anak iya Isak, lalu ngengkahka iya ba atas tugung kayu nya.

¹⁰Udah nya Abraham lalu ngambi duku, deka ngelar anak iya.

¹¹Tang melikat TUHAN ngangauka iya ari serega, ku iya, “Abraham! Abraham!” Abraham lalu nyaut, “Tu aku!”

¹²“Anang ngemediska nembiak nya, tauka ngereja sebarang utai ngagai iya,” ku melikat nya bejaku, “laban diatu Aku nemu nuan amat nangika Allah Taala, laban nuan enda sayauka anak tunggal nuan tang nyerahka iya ngagai Allah Taala.”

¹³Abraham malik, lalu tepedaka siku bedus ti lelaki tekait tanduk ba babas. Iya mansang lalu ngambi bedus nya, lalu nyerahka bedus nya nyadika piring tunu kena nyilih anak iya.

¹⁴Abraham lalu ngumbai endur nya “TUHAN Nyendia.” [67] Nyentuk ngagai sehari tu, orang agi nyebut, “TUHAN deka nyendiaka utai ba bukit Iya.”

¹⁵Melikat TUHAN lalu ngangauka Abraham ari serega kedua kali,

¹⁶ Ku Iya bejaku, “Aku ti TUHAN besumpah atas nama Aku Empu, Aku deka meri berekat ti besai ngagai nuan, laban nuan udah ngereja utai tu, lalu enda sayauka anak tunggal nuan tang nyerahka iya ngagai Aku.

¹⁷ Aku besemaya deka meri nuan mayuh peturun, ngemayuh bintang ti di langit, tauka ngemayuh pasir ti ba tebing tasik. Peturun nuan deka ngalahka munsuh sida.

¹⁸ Semua bansa deka minta Aku merekatka sida, baka Aku ti udah merekatka peturun nuan, ketegal nuan udah ngasika jaku Aku.”

¹⁹Abraham pulai ngagai orang gaji iya lalu sida sama bejalai ngagai Beer-seba, alai Abraham ke ngentapka diri.

²⁰Nyau kelama udah bekau nya, Abraham bisi ninga berita pasal Milkah ti udah ngadaka lapan iku anak ke menyadi iya, Nahor, iya nya:

²¹Us, anak tuai Nahor, menyadi iya Bus, Kemuel apai Aram,

²²Cheset, Haso, Pildas, Jitlap, enggau Bituel

²³apai Rebekah. Milkah ngadaka lapan iku anak lelaki ke menyadi Abraham ke benama Nahor.

²⁴Indu simpan Nahor ke benama Reumah ngadaka Tebah, Gaham, Tahas, enggau Maakah.