Read Iban Pemungkal 23 Bible Online

Pemungkal 23 - Iban bible

Pemungkal 23

¹Sarah idup ngagai umur 127 taun.

²Iya mati di Hebron, di menua Kanaan, lalu Abraham nyenggai iya lalu nyabakka iya.

³Abraham angkat ari endur alai iya ke ngintu bangkai bini iya, lalu mansang ngagai orang Iti. Ku iya bejaku enggau sida

⁴“Aku orang kampar ti diau begulai enggau kita. Jual tanah kita mimit ngagai aku, ngambika aku ulih nguburka bini aku.”

⁵Disaut sida,

⁶“Dingaka jaku kami, tuan. Nuan tu tuai ti kering ke begulai enggau kami. Kuburka meh bini nuan dalam kubur ti pemadu manah ti dikemisi kami. Semua kami deka gaga ati meri siti kubur ngagai nuan, ngambika nuan ulih nguburka bini nuan.”

⁷Abraham angkat lalu meremi di mua sida

⁸lalu bejaku, “Enti kita ngasuh aku nguburka bini aku ditu, aku minta kita bejaku enggau Epron anak Sohar

⁹minta iya nyual lubang gua Makpelah, ti semak tisi tanah iya. Asuh iya nyual lubang gua nya ngagai aku di mua kita empu ditu, enggau penuh rega, ngambika aku tau bempu endur nya nyadika pendam.”

¹⁰Nyadi Epron empu bisi enggau orang Iti ti bukai duduk ba endur alai ti baum ba pintu kuta nengeri nya. Iya lalu nyaut, didinga semua orang ke bisi dia,

¹¹“Dinga nuan, tuan. Aku deka meri ngagai nuan semua tanah nya enggau lubang gua ti ba tanah nya. Nya alai di mua semua orang ke ari bansa aku empu ditu, aku meri tanah nya ngagai nuan, ngambika nuan ulih nguburka bini nuan.”

¹²Abraham lalu meremi di mua orang Iti

¹³lalu bejaku enggau Epron, didinga semua sida, “Aku minta nuan mendingka aku. Aku deka meli semua tanah nya. Sambut meh rega tanah nya ari aku, ngambika aku ulih nguburka bini aku dia.”

¹⁴Disaut Epron,

¹⁵“Tuan, rega tanah nya ka semina empat ratus singkap pirak aja. Mesa ni ga rega nya ba entara tua? Kuburka meh bini nuan dia.”

¹⁶Abraham besetuju enggau Epron; iya lalu nimbang pirak ti udah disebut Epron didinga orang mayuh - empat ratus singkap pirak, nitihka atur pemerat ti dikena orang ke bedagang.

¹⁷Nya meh chara pesaka ti udah diempu Epron di Makpilah, muak ke timur Mamre, nyadi pesaka Abraham. Pesaka nya nyengkaum tanah nya, lubang gua ti ba tanah nya, enggau semua kayu ti ba tanah nya, nyentuk ngagai tisi tanah nya.

¹⁸Tanah nya lalu dikumbai semua orang Iti ke bisi ba aum nya, pesaka Abraham.

¹⁹Udah nya Abraham lalu nguburka bini iya, Sarah, dalam lubang gua nya, di menua Kanaan.

²⁰Nya alai tanah nya, ti udah diempu orang Iti, sama enggau lubang gua ti ba tanah nya, diempu Abraham nyadika tanah pendam.