Read Iban Pemungkal 24 Bible Online

Pemungkal 24 - Iban bible

Pemungkal 24

¹Abraham pen nyau tuai, lalu TUHAN udah merekatka iya dalam semua utai ti dikereja iya.

²Ku iya bejaku enggau ulun iya ke pemadu tuai, ke ngemataka semua utai Abraham, “Engkahka jari nuan ba selepak pah[68] aku

³laban aku deka ngasuh nuan besumpah dalam nama TUHAN Allah Taala ti bekuasa di serega enggau di dunya, enda nyagi nuan milih indu orang Kanaan nyadika bini anak aku.

⁴Nuan enda tau enda mansang ngagai menua ada aku, ngagai kaban belayan aku empu, lalu ngambi siku bini ke anak aku Isak.”

⁵Tang ku ulun nya nanya, “Kati enti indu nya enggai mupuk enggau aku ngagai menua tu? Kati tau aku mai anak nuan mansang ngagai menua ada nuan?”

⁶Disaut Abraham, “Nuan enda tau mai anak aku kin!

⁷TUHAN Allah Taala ti di serega, udah mai aku ari rumah apai aku, ari menua ada aku, lalu udah besemaya enggau aku ngena sumpah, madahka Iya deka meri menua tu ngagai peturun aku. Iya deka ngasuh melikat Iya nguluka nuan, lalu nuan deka ngambi ari menua nya siku bini ke anak aku.

⁸Tang enti indu nya enggai mupuk enggau nuan, nuan dilepaska ari jaku sumpah aku tu. Tang nuan enda tau sekali-kali mai anak aku kin.”

⁹Nya alai ulun nya ngengkahka jari iya ba selepak pah tuan iya Abraham, lalu besumpah madahka diri deka ngereja utai ti diasuh Abraham.

¹⁰Ulun nya, ke ngemataka reta tengkira Abraham, mai sepuluh iku jelu unta tuan iya, lalu mansang ngagai nengeri ti udah alai Nahor diau, di utara menua Mesopotamia.

¹¹Lebuh iya datai di menua nya, iya lalu ngetu sereta belelakka jelu unta iya semak telaga ti di luar nengeri. Hari lebuh maya nya endang udah lemai, maya bala indu pansut ari nengeri mansang nyauk.

¹²Iya lalu besampi. Ku iya, “TUHAN Allah Taala ke tuan aku, Abraham, asuh aku mujur sehari tu, lalu kingatka semaya Nuan enggau tuan aku.

¹³Aku diatu benung bediri semak telaga ti alai bala indu ari nengeri nya deka nyauk.

¹⁴Aku deka bejaku enggau siku ari bala sida munyi tu, ‘Ingkaska tepayan nuan, lalu beri aku ngirup.’ Enti iya nyebut, ‘Ngirup meh, lalu aku deka mai ai ke jelu unta nuan,’ awakka iya nya meh orang ke udah dipilih Nuan ke nembiak Nuan Isak. Enti utai nya nyadi baka nya, nya baru aku deka nemu Nuan udah ngamatka semaya Nuan ngagai tuan aku.”

¹⁵Lebuh iya agi benung besampi, Rebekah datai ngesan tepayan ai. Iya tu anak indu Bituel. Nyadi Bituel tu anak menyadi Abraham ke benama Nahor, enggau bini iya Milkah.

¹⁶Indu nya bajik amat, lalu agi dara bungas. Iya mansang ngagai telaga, ngisi tepayan iya enggau ai, lalu pulai.

¹⁷Ulun Abraham nya lalu belanda ngagai indu nya lalu bejaku, “Beri aku ai irup ari tepayan nuan.”

¹⁸Ku indu nya nyaut, “Ngirup meh, tuan.” Iya lalu beguai-guai ngingkaska tepayan nya ari bau iya, lalu megai tepayan nya, lebuh ulun Abraham nya benung ngirup.

¹⁹Lebuh iya udah ngirup, indu nya lalu bejaku, “Aku deka nyauk ai ke jelu unta nuan, datai ke sida nyau udah puas ngirup.”

²⁰Iya lalu beguai-guai nuang ai ari tepayan nya ngagai dulang ti alai jelu ngirup, lalu belanda baru ngagai telaga, nyauk mayuh agi ai, datai ke iya udah meri semua jelu unta nya ngirup magang.

²¹Lelaki nya majak nengkilaka iya, enda bemunyi, deka nemu enti TUHAN udah ngasuh pejalai iya mujur tauka enda.

²²Lebuh indu nya udah tembu meri unta nya ngirup, lelaki nya lalu ngambi siti tinchin emas, lalu ngelekatka tinchin nya ba idung indu nya, lalu ngerasukka dua iti gelang emas ba lengan iya.

²³Ku ulun Abraham nya bejaku, “Anak sapa nuan tu? Kati tau aku, enggau bala aku, bemalam ba rumah apai nuan malam tu?”

²⁴“Apai aku Bituel, anak Nahor seduai Milkah,” ku indu nya nyaut.

²⁵“Kami mayuh rumput rangkai enggau pemakai jelu, lalu kami mega bisi endur alai kita tau bemalam.”

²⁶Udah nya lelaki nya meremi lalu nyembah TUHAN.

²⁷Ku iya bejaku, “Pujika TUHAN Allah Taala tuan aku Abraham, laban Iya udah tetap ati ngamatka semaya Iya enggau tuan aku. TUHAN udah nguluka aku terus ngagai kaban belayan tuan aku.”

²⁸Indu dara nya lalu belanda ngagai rumah indai iya, lalu madahka semua utai ti udah nyadi.

²⁹Nyadi Rebekah bisi siku menyadi lelaki ke benama Laban. Laban lalu belanda ngagai ulun Abraham semak telaga nya.

³⁰Laban udah meda tinchin ti ba idung, enggau gelang ti ba lengan menyadi indu iya, lalu udah ninga iya nusui utai ti udah disebut lelaki nya ngagai iya. Nya alai Laban lalu mansang ngagai ulun Abraham, ke benung bediri ngimbai jelu unta iya, semak telaga nya.

³¹Iya lalu bejaku enggau ulun Abraham, “Aram ke rumah enggau aku. Nuan tu orang ke udah diberekatka TUHAN. Nadai kebuah nuan agi bediri ditu. Aku bisi bilik ti udah disediaka aku ke nuan dalam rumah aku, lalu aku bisi mega endur ke jelu unta nuan.”

³²Nya alai lelaki nya lalu tama ngagai rumah Laban. Laban lalu mantaika utai ari jelu unta nya, lalu meri jelu nya rumput ti rangkai enggau pemakai jelu. Udah nya iya lalu mai ai kena ulun Abraham, enggau bala iya masu kaki sida.

³³Lebuh pemakai dibai ngagai sida, lelaki nya lalu bejaku, “Aku enda makai sebedau aku madahka pesan ti dibai aku ngagai kita.” Ku Laban bejaku, “Padahka meh pesan nya.”

³⁴Lelaki nya lalu belabuh bejaku. Ku iya, “Aku tu ulun Abraham.”

³⁵“TUHAN udah merekatka tuan aku enggau mayuh macham utai, lalu ngasuh iya kaya. TUHAN udah meri iya raban bedus enggau kambin, jelu sapi, pirak, emas, ulun ti indu enggau ulun ti lelaki, jelu unta, enggau keledai.

³⁶Sarah, iya nya bini tuan aku, udah ngadaka anak lelaki siku lebuh Sarah nyau tuai, lalu tuan aku udah meri semua pesaka iya ngagai anak iya nya.

³⁷Tuan aku udah besumpah ngasuh aku ngasika pesan iya. Ku iya, ‘Anang milih bini ke anak aku ari indu di menua Kanaan,

³⁸tang mansang nuan ngagai bala apai aku, ngagai kaban belayan aku, lalu pilih siku bini ke iya.’

³⁹Aku lalu nanya tuan aku, ‘Kati enti indu nya enggai mupuk enggau aku?’

⁴⁰Ku tuan aku nyaut, ‘TUHAN, ke seruran dipetuaika aku, deka ngasuh melikat Iya bejalai enggau nuan, lalu ngasuh pejalai nuan mujur. Nuan deka bulih siku bini ke anak aku, ari bala aku empu, ari ruang bilik apai aku.

⁴¹Ka semina siti aja jalai nuan tau ngelepaska diri ari sumpah tu: enti nuan mansang ngagai kaban belayan aku, lalu sida enggai nyerahka indu nya ngagai nuan. Nya baru nuan dilepaska ari sumpah tu.’

⁴²“Lebuh aku datai ba telaga nya sehari tu tadi, aku besampi, ‘TUHAN Allah Taala ke tuan aku Abraham, awakka aku mujur ba utai ti dikereja aku.

⁴³Aku diatu benung bediri semak telaga tu. Lebuh siku indu datai nyauk lagi, aku deka minta iya meri aku ngirup ari tepayan iya.

⁴⁴Enti iya besetuju, lalu deka mega meri jelu unta aku ngirup, awakka iya nya meh orang ke udah dipilih Nuan nyadika bini anak tuan aku.’

⁴⁵Sebedau aku sempat badu besampi dalam ati aku, Rebekah lalu datai ngesan tepayan ai, lalu nurun ngagai telaga, mansang nyauk. Aku lalu bejaku enggau iya, ‘Beri aku ngirup.’

⁴⁶Iya lalu beguai-guai ngingkaska tepayan ai ari bau iya, lalu ku iya, ‘Ngirup meh. Aku deka mega nyauk ai ke unta nuan.’ Nya alai aku lalu ngirup, lalu iya nyauk ai ke jelu unta aku.

⁴⁷Aku lalu nanya iya, ‘Anak sapa nuan tu?’ lalu ku iya nyaut, ‘Apai aku Bituel, anak Nahor seduai Milkah.’ Udah nya aku lalu ngelekatka tinchin ba idung iya, lalu ngerasukka sepasang gelang ba lengan iya kedua piak.

⁴⁸Aku lalu meremi lalu nyembah TUHAN. Aku muji TUHAN Allah Taala tuan aku Abraham, laban TUHAN udah nguluka aku terus ngagai kaban belayan tuan aku, alai aku ke tetemuka anak indu iya, ke anak tuan aku.

⁴⁹Nya alai, enti kita taluk ngagai tuan aku, lalu manah enggau iya, padahka ngagai aku. Enti kita enggai, padahka mega ngagai aku, ngambika aku berundingka utai ti patut dikereja aku.”

⁵⁰Laban seduai Bituel lalu nyaut, “Laban pekara tu datai ari TUHAN, kami enda tau meri pemutus penemu ba pekara tu.

⁵¹Tu Rebekah empu. Bai iya, lalu mupuk. Awakka iya nyadika bini anak tuan nuan, nitihka jaku TUHAN.”

⁵²Lebuh ulun Abraham ninga nya, iya meremi, lalu nyembah TUHAN.

⁵³Udah nya iya lalu mantaika kain enggau pirak, enggau perengka emas, lalu meri utai nya ngagai Rebekah. Iya mega meri pemeri ti berega ngagai menyadi lelaki enggau ngagai indai Rebekah.

⁵⁴Udah nya ulun Abraham enggau orang ke nyempulang iya, makai ngirup, lalu bemalam dia. Lebuh sida dani pagi hari siti, ulun Abraham lalu bejaku, “Awakka aku pulai ngagai tuan aku.”

⁵⁵Tang ku menyadi Rebekah, enggau indai iya bejaku, “Awakka Rebekah diau enggau kami abis kurang seminggu tauka sepuluh hari. Udah nya baru iya tau mupuk.”

⁵⁶Tang ku ulun Abraham bejaku, “Anang ngetanka kami. TUHAN udah ngasuh pejalai aku mujur, nya alai awakka aku pulai ngagai tuan aku.”

⁵⁷Disaut sida, “Manah kitai ngangauka Rebekah, lalu nanya iya empu.”

⁵⁸Sida lalu ngangauka Rebekah, lalu nanya iya, “Kati nuan bisi ati deka mupuk enggau lelaki tu?” “Ka,” ku Rebekah nyaut.

⁵⁹Nya alai sida lalu ngasuh Rebekah enggau siku ulun ari ruang bilik apai iya mupuk sama enggau ulun Abraham, sereta enggau bala iya.

⁶⁰Sida lalu merekatka Rebekah munyi tu: “Awakka nuan, menyadi, nyadi indai ke bejuta-juta mensia! Awakka peturun nuan ngalahka nengeri munsuh sida!”

⁶¹Udah nya Rebekah enggau bala ulun iya ti indu angkat lalu nepan jelu unta, deka mupuk enggau ulun Abraham. Sida lalu mupuk.

⁶²Nyadi Isak udah datai di menua puang ti dikumbai “Telaga Ti Diempu Iya Ti Idup, Ke Meda Aku” lalu diau di selatan menua Kanaan.[69]

⁶³Nyadi sekali, lebuh hari nyau lemai, iya pansut deka bejalai ba padang. Iya lalu tepedaka raban jelu unta datai nuju iya.

⁶⁴Lebuh Rebekah meda Isak, iya lalu nurun ari jelu unta iya

⁶⁵lalu nanya ulun Abraham, “Sapa lelaki nya ke bejalai ngagai kitai ba padang nya?” “Nya meh tuan aku,” ku ulun Abraham nyaut. Rebekah ngambi kain lalu mampul mua diri.

⁶⁶Ulun Abraham lalu madahka ngagai Isak semua utai ti udah dikereja iya.

⁶⁷Udah nya Isak lalu mai Rebekah ngagai langkau kain ti udah alai Sarah indai iya diau, lalu Rebekah nyadika bini iya. Isak rinduka Rebekah, nya alai iya enda agi tusah ati ke indai iya ti udah mati.