Read Iban Pemungkal 25 Bible Online

Pemungkal 25 - Iban bible

Pemungkal 25

¹Abraham jadi enggau siku indu bukai ke benama Keturah.

²Keturah ngadaka Simran, Joksan, Medan, Midian, Isbak enggau Suah.

³Joksan nya apai Sheba seduai Dedan, lalu peturun Dedan nya orang Asurim, bansa Letusim, enggau bansa Lumim.

⁴Anak Midian nya Epah, Eper, Hanok, Abida, enggau Eldaah. Semua sida tu peturun Keturah magang.

⁵Abraham meri semua reta tengkira iya ngagai Isak,

⁶tang lebuh iya agi idup, iya meri pemeri ngagai bala anak ke diadaka bini iya ti bukai. Udah nya iya lalu ngasuh bala anak iya ti bukai pindah ngagai menua di timur, ngejang ari anak iya Isak.

⁷Abraham mati tuai lebuh umur iya 175 taun.

⁹Anak iya Isak enggau Ismail nguburka iya dalam lubang gua di Makpilah, ba padang ti muak ke timur Mamre, ti udah diempu Epron anak Sohar, orang bansa Iti.

¹⁰Padang nya udah dibeli Abraham ari orang Iti. Abraham enggau bini iya Sarah sama dikuburka dia.

¹¹Udah bekau pemati Abraham, Allah Taala merekatka anak iya Isak ti diau semak “Telaga Ti Diempu Iya Ti Idup, Ke Meda Aku.” [70]

¹²Ismail diadaka Hagar. Hagar tu indu bansa orang Ejip. Iya ulun Sarah, lalu iya ngadaka anak Abraham ke benama Ismail.

¹³Baka tu ku bala anak Ismail ditusun nitihka ripih pengada sida: Nebaiot, Kedar, Adbil, Mipsam,

¹⁴Misma, Dumah, Massa,

¹⁵Hadat, Tema, Jetur, Napis enggau Kedemah.

¹⁶Sida tu nurunka dua belas raban bansa, lalu sida meri nama sida empu ngagai genturung pendiau sida enggau ngagai endur alai sida ke nirika kem.

¹⁷Ismail mati lebuh umur 137 taun.

¹⁸Peturun Ismail diau di menua entara Habilah enggau Sur, tunga ke timur menua Ejip, ba jalai ti nuju ngagai menua Asiria. Sida diau beserara ari peturun Abraham ti bukai.

¹⁹Tu jerita pasal anak Abraham ke benama Isak.

²⁰Isak umur 40 taun lebuh iya jadi enggau Rebekah anak indu Bituel ( orang Aram ari menua Mesopotamia). Rebekah tu menyadi indu Laban.

²¹Nyadi ketegal Rebekah ke nadai anak, Isak besampi ngagai TUHAN ke iya. TUHAN nyaut sampi Isak, lalu Rebekah betubuh-bisi.

²²Iya deka ngadaka anak ti besapit dua, lalu sebedau anak iya ke dua iku nya ada, seduai iya belaban enggau pangan diri dalam kandung Rebekah. Ku Rebekah bejaku, “Nama kebuah utai tu nyadi ba aku?” Nya alai iya minta saut ari TUHAN.

²³ Ku TUHAN bejaku ngagai iya, “Dalam tubuh nuan bisi dua bengkah bansa. Nuan deka ngadaka dua bengkah bansa ti deka bemunsuh ngelaban pangan diri. Siti bansa deka kering agi ari bansa ti siti, lalu iya ke tuai agi deka bekereja ke iya ke biak agi.”

²⁴Maya pen chukup alai Rebekah deka beranak, lalu iya ngadaka anak lelaki ke besapit dua.

²⁵Gamal iya ke dulu agi ada nya mirah, lalu kulit iya baka baju panjai ti bebulu. Nya alai iya diberi nama Esau.[71]

²⁶Anak ti pansut dudi, ngenggam tumbit Esau. Nya alai iya diberi nama Jakop.[72] Umur Isak enam puluh taun lebuh anak iya dua iku nya ada.

²⁷Nembiak dua iku nya mansang besai, lalu Esau nyadi orang ke landik ngasu, ke rindu bejalai ba sebelah babas, tang Jakop nya orang ke bependiau, ke jarang mindah ari rumah.

²⁸Isak rindu agi ke Esau, laban iya rindu makai jelu ti ulih Esau ngasu, tang Rebekah rindu agi ke Jakop.

²⁹Nyadi sekali, lebuh Jakop benung manduk bubur kachang, Esau datai pulai ngasu. Iya lapar

³⁰lalu ku iya bejaku enggau Jakop, “Lapar amat aku tu. Beri aku mimit utai ti mirah nya.” (Nya kebuah iya diberi nama Edom.)[73]

³¹Disaut Jakop, “Aku endang deka meri utai tu ngagai nuan, enti nuan deka meri waris nuan ke nyadi anak tuai ngagai aku.”

³²Ku Esau bejaku, “Barang ku jaku! Aku nyau deka mati lapar. Nama guna aku enggau waris nya?”

³³ Ku Jakop nyaut, “Nuan enda tau enda dulu besumpah nyerahka waris nuan ngagai aku.” Esau besumpah, lalu nyerahka waris iya ngagai Jakop.

³⁴Udah nya Jakop lalu meri iya roti, enggau bubur nya. Esau makai, ngirup, angkat lalu mupuk. Nya meh jalai Esau enda bebasaka waris iya ke nyadi anak tuai.