Read Iban Pemungkal 26 Bible Online

Pemungkal 26 - Iban bible

Pemungkal 26

¹Lapar pungkang sekali agi nyadi di menua nya, kelimpah ari lapar pungkang ti udah nyadi lebuh maya Abraham menya. Isak mansang ngagai Abimelek, raja orang Pilistin, ti diau di Gerar.

²Nyadi TUHAN udah pegari di mua Isak, lalu udah bejaku munyi tu: “Anang bejalai ngagai menua Ejip. Diau di menua tu nitihka asuh Aku.

³ Diau ditu, lalu Aku deka begulai enggau nuan, lalu merekatka nuan. Aku deka meri semua menua tu ngagai nuan, enggau ngagai bala peturun nuan. Aku deka ngamatka semaya ti udah digaga Aku enggau apai nuan, Abraham.

⁴Aku deka meri ngagai nuan mayuh peturun, ngemayuh bintang ti di langit, lalu Aku deka meri ngagai sida semua menua tu. Semua bansa deka minta Aku merekatka sida, baka Aku ti udah merekatka peturun nuan.

⁵Aku deka merekatka nuan, laban Abraham udah ngasika Aku, lalu udah nitihka semua pesan, atur enggau adat Aku.”

⁶Nya alai Isak diau di Gerar.

⁷ Lebuh orang lelaki ti diau dia nanyaka pasal bini iya, iya madahka bini iya nya menyadi iya. Isak enggai ngaku Rebekah nya bini iya, laban iya enggai ke orang munuh iya lalu ngambi Rebekah, laban Rebekah endang amat bajik.

⁸Lebuh Isak udah lama diau dia, Raja Abimelek nyenguk ke baruh ari jenila iya, lalu tepedaka Isak seduai Rebekah benung beberap.

⁹Abimelek lalu mesanka Isak, lalu bejaku enggau iya, “Diatu baru aku nemu iya bini nuan! Nama kebuah nuan madahka iya menyadi nuan?” Ku Isak nyaut, “Laban aku ngumbai orang deka munuh aku enti aku madahka iya bini aku.”

¹⁰Lalu ku Abimelek bejaku enggau Isak, “Peda nuan utai ti udah dikereja nuan ngagai kami! Enti sema siku lelaki ari bala aku bisi tekelanjur tinduk enggau bini nuan, nuan empu betanggungjawapka penyalah kami.”

¹¹Abimelek lalu meri jaku tangkan ngagai semua orang mayuh, munyi tu: “Barang sapa ngachau orang tu tauka ngachau bini iya, deka diukum bunuh.”

¹²Isak lalu naburka benih di menua nya, lalu taun nya iya ngetau seratus kali lipat mayuh agi ari benih ti ditanam iya, laban TUHAN udah merekatka iya.

¹³Iya majak bulih utai, lalu nyadi kaya bendar.

¹⁴Raban bedus enggau sapi iya mayuh, lalu bala iya pen mayuh, datai ke orang Pilistin nyau kepapaska iya.

¹⁵Sida ngalitka semua telaga ti udah ditumbak bala ulun apai iya Abraham, lebuh Abraham agi idup menya.

¹⁶Lalu ku Abimelek bejaku enggau Isak, “Angkat nuan ari menua kami laban nuan nyau kering agi ari kami.”

¹⁷Nya alai Isak angkat ari menua nya, nirika kem iya ba Emperan Gerar, lalu ngentapka diri dia.

¹⁸Iya lalu numbak baru telaga ti udah ditumbak lebuh maya Abraham menya, tang ditambun orang Pilistin udah bekau pemati Abraham. Nama ti diberi Isak ngagai telaga nya sebaka enggau nama ti udah diberi apai iya.

¹⁹Bala ulun Isak numbak telaga ba lebak nya, lalu tetemuka ai.

²⁰Bala pengibun bedus orang Gerar belaya enggau bala pengibun bedus Isak. Ku sida, “Ai nya enggi kami.” Nya alai Isak ngumbai telaga nya “Berebut.”

²¹Bala ulun Isak numbak siti agi telaga, lalu sida mega belayaka telaga nya, nya alai iya ngumbai telaga nya “Bemunsuh”.[74]

²²Iya mindah ari endur nya, lalu numbak siti agi telaga. Sida enda belayaka telaga nya, nya alai iya ngumbai telaga nya “Bisi Endur.” [75] Ku Isak bejaku, “Diatu TUHAN udah meri kitai endur alai diau di menua tu, lalu kitai deka nyadi kaya-raja ditu.”

²³Isak mindah ari nya ngagai Beer-seba.

²⁴Malam nya TUHAN pegari lalu bejaku enggau iya, “Aku tu Allah Taala apai nuan Abraham. Anang takut. Aku bisi enggau nuan. Aku deka merekatka nuan lalu meri ngagai nuan mayuh peturun ketegal semaya aku enggau nembiak Aku Abraham.”

²⁵Isak ngaga siti alta dia lalu nyembah TUHAN. Udah nya iya lalu nirika kem iya dia, lalu bala ulun iya numbak siti agi telaga.

²⁶Abimelek lalu datai ari Gerar sama enggau Ahusat, ti nyadi penyanding penemu iya, enggau Pikol, ti nyadi tuai soldadu iya, deka betemu enggau Isak.

²⁷Isak lalu nanya, “Nama kebuah kita datai ditu betemu enggau aku? Suba kita nadai rinduka aku, lalu muru aku ari menua kita.”

²⁸Disaut sida, “Diatu kami nemu TUHAN bisi enggau nuan, lalu dalam penemu kami, kitai patut ngaga sempekat. Kami minta nuan besemaya

²⁹enda ngemediska kami, baka kami ke nadai udah kala ngemediska kita. Kami udah nelap enggau kita, lalu ngasuh kita angkat enggau selamat. Diatu TUHAN terang udah merekatka nuan.”

³⁰Isak lalu nyendiaka pengerami makai besai ke sida, lalu sida makai ngirup dia.

³¹Tumu pagi hari siti, genap iku sida ngaga semaya, lalu nanggam semaya nya ngena sumpah. Isak meda sida mupuk, lalu sida beserara bebaik enggau pangan diri.

³²Sehari nya mega, bala ulun Isak datai lalu madahka ngagai iya pasal telaga ti udah ditumbak sida. Ku sida, “Kami udah tetemuka ai.”

³³Iya lalu ngumbai telaga nya “Besumpah.” [76] Nya kebuah nengeri nya dikumbai Beer-seba[77] nyentuk ngagai sehari tu.

³⁴Lebuh umur Esau empat puluh taun, iya jadi enggau dua iku indu orang Iti. Seduai nya Judit anak Beeri, enggau Basemat anak Elon.

³⁵Seduai nya balat amat ngenusahka ati Isak seduai Rebekah.