Read Iban Pemungkal 27 Bible Online

Pemungkal 27 - Iban bible

Pemungkal 27

¹Lebuh Isak nyau tuai, lalu enda ulih meda agi, iya mesanka anak tuai iya Esau, lalu bejaku enggau iya, “Anak!” “Tu aku, apai” ku Esau nyaut.

²Ku Isak, “Aku nyau tuai. Aku enda nemu maya dirika mati.

³Nya alai bai panah enggau laja nuan, bejalai ke babas, ngulihka jelu ke aku,

⁴lalu sediaka pemakai ti nyamai ti dikerinduka aku, lalu bai pemakai nya ngagai aku, ngambika aku makai, lalu merekatka nuan sebedau aku mati.”

⁵Nyadi Rebekah bisi mending lebuh Isak bejaku enggau anak iya Esau. Nya alai lebuh Esau nurun ngasu,

⁶Rebekah lalu bejaku enggau anak iya Jakop, “Aku bisi ninga apai nuan bejaku enggau Esau,

⁷‘Bai siku jelu ngagai aku, lalu sediaka pemakai ti nyamai ke aku, ngambika aku makai iya lalu merekatka nuan di mua TUHAN sebedau aku mati.’

⁸Nya alai, anak, kereja utai ti diasuh aku.

⁹Alai nuan mansang ngagai raban jelu, lalu ambi dua iku kambin ti biak sereta gemu, ngambika aku manduk pemakai ti nyamai, ti balat dikerinduka apai nuan.

¹⁰Nuan enda tau enda mai pemakai nya ngagai apai nuan, ngambika iya makai pemakai nya, lalu merekatka nuan, sebedau iya mati.”

¹¹Tang ku Jakop bejaku enggau indai iya, “Nuan nemu, Esau bebulu, tang kulit aku alus.

¹²Kada enda apai deka ngama aku, lalu aku baka ke nipu iya, lalu minta diri kena sumpah, ukai bulih berekat.”

¹³Disaut indai iya, “Awakka semua sumpah ti disebut ngagai nuan, ninggang aku magang, anak. Kereja aja utai ti diasuh aku. Alai mupuk nuan lalu ambi kambin ti agi biak ke aku.”

¹⁴Jakop mupuk lalu ngambi dua iku kambin ti agi biak, lalu mai kambin dua iku nya ngagai indai iya. Indai iya lalu manduk pemakai ti balat dikerinduka Isak.

¹⁵Udah nya indai iya lalu ngambi gari Esau ti pemadu manah, ti disimpan Rebekah di rumah, lalu ngerasukka gari nya ba Jakop.

¹⁶Rebekah ngengkahka kulit kambin nya ba lengan Jakop, enggau ba rekung iya ti nadai bulu.

¹⁷Iya lalu nyuaka ngagai Jakop pemakai ti nyamai nya sama enggau roti ti udah dipanggang iya.

¹⁸Udah nya Jakop lalu mansang ngagai apai iya, lalu bejaku, “Apai!” Apai iya lalu nyaut, “Tu aku. Sapa nuan nya, anak?”

¹⁹Jakop lalu nyaut, “Aku tu anak tuai nuan, Esau. Aku udah ngereja utai ti diasuh nuan. Uji nuan duduk, lalu makai dagin ti dibai aku ngagai nuan, ngambika nuan merekatka aku.”

²⁰Tang ku Isak bejaku, “Baka ni ku nuan ngenyampat nya bulih jelu, anak?” Jakop lalu nyaut, “Laban TUHAN Allah Taala nuan udah ngasuh aku mujur.”

²¹Ku Isak bejaku enggau Jakop, “Datai semak kitu agi, ngambika aku ulih ngama nuan. Kati nuan tu amat Esau?”

²²Jakop lalu mansang semak agi ngagai apai iya. Isak lalu ngama iya, lalu bejaku, “Nyawa nuan munyi nyawa Jakop, tang lengan nuan asai lengan Esau.”

²³Isak enda ngelala Jakop, laban lengan iya bebulu baka lengan Esau. Lebuh iya baru deka merekatka Jakop,

²⁴iya lalu nanya baru, “Kati nuan tu amat anak aku Esau?” “Aku meh tu, apai,” ku Jakop nyaut.

²⁵Lalu ku Isak bejaku, “Bai dagin nya ngagai aku. Lebuh aku udah makai dagin nya lagi, nya baru aku merekatka nuan.” Jakop lalu mai dagin nya ngagai apai iya, enggau wain mimit.

²⁶Udah nya apai iya lalu bejaku enggau Jakop, “Datai kitu, lalu sium aku, anak.”

²⁷ Lebuh Jakop mansang deka nyium apai iya, Isak lalu tesiumka bau gari ti dikena Jakop. Isak lalu merekatka Jakop. Ku iya, “Pemanah bau anak aku nyau baka bau padang ti udah diberekatka TUHAN.

²⁸Awakka TUHAN meri nuan ambun ari langit, lalu ngasuh tanah nuan ami! Awakka TUHAN ngasuh nuan bulih gandum, enggau wain!

²⁹ Awakka orang bansa bukai bekereja ke nuan, lalu awakka orang meremi di mua nuan. Awakka nuan merintah semua kaban belayan nuan, lalu awakka peturun indai nuan meremi ngagai nuan. Awakka orang ke nyumpah nuan, tulah magang, lalu awakka orang ke merekatka nuan, diberekatka magang.”

³⁰Lebuh Isak udah tembu merekatka Jakop, lalu Jakop pen baru udah angkat ari endur nya, menyadi iya Esau tama, baru pulai ngasu.

³¹Iya mega manduk pemakai ti nyamai, lalu mai pemakai nya ngagai apai iya. Ku iya, “Apai, uji nuan angkat, lalu empa dagin ti dibai aku ke nuan, ngambika nuan merekatka aku.”

³²“Sapa nuan tu?” ku Isak nanya. “Anak tuai nuan, Esau,” ku Esau nyaut.

³³Isak lalu belabuh getar-getar, lalu nanya, “Enti pia, sapa orang nya tadi ti udah bulih jelu, lalu mai jelu nya ngagai aku? Aku udah makai utai nya sebedau nuan datai. Aku udah meri iya berekat ti penudi, nya alai berekat nya mengkang ba iya belama iya.”

³⁴Lebuh Esau ninga nya, iya lalu duie-duie nyabak sereta pedis ati. Ku iya bejaku, “Berekatka aku mega, apai!”

³⁵Disaut Isak, “Menyadi nuan udah datai kitu, lalu nipu aku. Iya udah ngambi berekat nuan.”

³⁶ Ku Esau bejaku, “Tu kedua kali iya udah ngakal aku. Indah nama iya deh Jakop.[78] Iya ngenchuri waris aku ti nyadi anak tuai, lalu diatu iya udah ngenchuri berekat aku. Kati nuan nadai ngalau berekatka aku, apai?”

³⁷Disaut Isak, “Aku udah ngaga iya nyadi tuan nuan, lalu aku udah ngaga semua kaban belayan iya, nyadi ulun iya magang. Aku udah meri iya gandum, enggau wain. Diatu aku nadai agi ulih ngereja utai ke nuan, anak!”

³⁸ Esau majak minta berekat ari apai iya: “Kati nuan semina bisi siti aja berekat, apai? Berekatka aku mega, apai!” Iya lalu nyabak.

³⁹ Udah nya Isak lalu bejaku enggau iya, “Nadai ambun ari langit deka ninggang nuan, Nuan nadai tanah ti ami.

⁴⁰ Nuan deka beridup ngena pedang nuan, Tang nuan deka nyadi ulun menyadi nuan. Tang taja pia, lebuh nuan angkat ngelaban iya,[79] nuan deka ngelepaska diri ari kuasa iya.”

⁴¹Esau lalu begedika Jakop, laban apai iya udah merekatka Jakop. Ku iya berunding, “Maya nyenggai apai nyau semak. Nya meh maya aku munuh Jakop.”

⁴²Tang lebuh Rebekah ninga pasal utai ti deka dikereja Esau, iya lalu mesanka Jakop, lalu bejaku enggau iya, “Dinga nuan. Menyadi nuan, Esau, berunding deka ngiga balas lalu munuh nuan.

⁴³Nya alai anak, titihka jaku aku. Alai nuan mupuk diatu ngagai Laban, menyadi aku di Haran,

⁴⁴lalu diau enggau iya enda lama, nganti menyadi nuan udah badu agi ringat ngagai nuan

⁴⁵lalu enda agi ingatka utai ti udah dikereja nuan ngagai iya. Udah nya baru aku deka ngasuh orang ngambi nuan pulai kitu. Nadai kebuah aku lenyau dua iku anak sereta hari.”

⁴⁶Ku Rebekah bejaku enggau Isak, “Aku nyau leju begulai enggau indu orang bansa bukai ke jadi enggau Esau. Enti Jakop jadi enggau indu orang Iti, manah agi aku mati.”