Read Iban Pemungkal 28 Bible Online

Pemungkal 28 - Iban bible

Pemungkal 28

¹Isak lalu ngangauka Jakop, merekatka iya, lalu bejaku enggau iya munyi tu, “Anang jadi enggau indu orang Kanaan,

²tang mansang nuan ngagai menua Mesopotamia, ngagai rumah aki nuan Bituel, lalu ambi siku ari indu ke dia nyadika bini nuan, siku ari anak indu aya nuan Laban.

³Awakka Allah Taala ti Pemadu Bekuasa[80] merekatka nuan, lalu ngasuh nuan beranak betelesak lalu nurunka mayuh bengkah bansa!

⁴ Awakka Iya merekatka nuan enggau peturun nuan baka Iya ti udah merekatka Abraham, lalu awakka nuan bempu menua tu, ti udah alai nuan diau, lalu udah diberi Allah Taala ngagai Abraham!”

⁵Isak lalu ngasuh Jakop mupuk ngagai menua Mesopotamia, ngagai Laban anak Bituel, orang Aram, menyadi lelaki Rebekah indai Jakop seduai Esau.

⁶Esau nemu Isak udah merekatka Jakop, lalu udah ngasuh Jakop mupuk ngagai menua Mesopotamia, ngiga bini. Esau mega nemu, lebuh Isak merekatka Jakop, iya nagang Jakop jadi enggau indu orang Kanaan.

⁷Esau nemu Jakop udah ngasika apai enggau indai iya, lalu udah mupuk ngagai menua Mesopotamia.

⁸Ari nya Esau nemu apai iya Isak sigi enggai nyagi iya jadi enggau indu orang Kanaan.

⁹Nya alai iya mansang ngagai Ismail anak Abraham, lalu jadi enggau anak indu Ismail ke benama Mahalat, menyadi indu Nebaiot.

¹⁰Jakop angkat ari Beer-seba mansang ngagai menua Haran.

¹¹Padam mata hari lemai nya iya datai ba siti endur ti kudus,[81] lalu bemalam dia. Iya gali deka tinduk, lalu iya bepanggalka sigi batu.

¹² Iya bemimpi meda siti tangga berindik ari tanah nyentuk ke langit, lalu bala melikat nurun niki nengah tangga nya.

¹³ Udah nya iya lalu meda TUHAN bediri ngimbai iya.[82] Ku TUHAN bejaku ngagai iya, “Aku tu TUHAN Allah Taala ke disembah Abraham enggau Isak. Aku deka meri menua ti alai nuan gali tu ngagai nuan, enggau ngagai peturun nuan.

¹⁴ Peturun nuan deka ngemayuh abus tanah ti di dunya. Sida deka nangkir rampa menua sida ngagai semua endur, lalu Aku deka merekatka semua bansa ngena nuan enggau peturun nuan.[83]

¹⁵Ingat, Aku deka seruran enggau nuan, lalu nyaga nuan di sebarang endur nuan bejalai, lalu Aku deka mai nuan pulai baru ngagai menua tu. Aku enda ninggalka nuan sebedau Aku tembu ngereja semua utai ti udah disemaya Aku enggau nuan.”

¹⁶Jakop lalu tedani, lalu ku iya, “TUHAN bisi ditu! Iya bisi ba endur tu, tang aku enda nemu nya!”

¹⁷Jakop berasai takut, lalu ku iya, “Takut amat aku ba endur tu! Tu tentu rumah Allah Taala. Tu tetap pintu ke serega.”

¹⁸Pagi hari siti Jakop angkat tumu, ngambi batu ti udah nyadika panggal iya, lalu nirika batu nya nyadika batu pengingat. Udah nya iya nuang minyak kana ngagai batu nya, kena iya nyerahka batu nya ngagai Allah Taala.

¹⁹Jakop lalu ngumbai endur nya Betel.[84] (Dulu menya, nengeri ba endur nya dikumbai Lus.)

²⁰Udah nya, Jakop lalu ngaga siti sumpah enggau TUHAN. Ku iya, “Enti Nuan deka meruan enggau aku, lalu nyaga aku dalam pejalai aku, sereta meri aku pemakai enggau gari,

²¹lalu enti aku pulai baru enggau likun ngagai rumah apai aku, Nuan meh nyadika Allah Taala aku.

²²Batu pengingat ti udah didirika aku tu, deka nyadi endur alai Nuan disembah, lalu aku deka meri ngagai Nuan sepuluh peratus ari semua utai ti diberi Nuan ngagai aku.”