Read Iban Pemungkal 29 Bible Online

Pemungkal 29 - Iban bible

Pemungkal 29

¹Jakop lalu majakka pejalai iya, lalu datai ba menua orang di timur.

²Iya lalu tepedaka siti telaga ba padang, enggau tiga bengkah raban bedus tingkap ngelingi telaga nya, laban raban bedus nya diberi ngirup ari telaga nya. Nyadi batu ti dikena nutup mua telaga nya besai amat.

³Lebuh semua raban bedus udah datai magang, nya baru bala pengibun bedus maringka batu nya ke tisi, lalu meri raban bedus nya ngirup. Udah nya sida maringka batu nya pulai baru ngagai mua telaga nya.

⁴Jakop lalu nanya bala pengibun bedus nya, “Unggal, ari ni penatai kita?” “Ari Haran,” ku sida nyaut.

⁵Iya lalu nanya, “Kati kita ngelala Laban uchu Nahor?” “Ngelala,” ku sida pengibun bedus nya nyaut.

⁶“Kati iya agi gerai nyamai?” ku Jakop nanya. “Agi,” ku sida nyaut. “Nyin anak indu iya Rachel mai raban bedus apai iya kitu.”

⁷Ku Jakop, “Hari agi tinggi, apin maya alai mai jelu tu pulai. Manah meri jelu tu ngirup, lalu mai sida ngagai padang baru.”

⁸Disaut sida pengibun bedus, “Kami enda tau ngereja nya, sebedau semua raban bedus udah datai magang, lalu batu nya dibaring ke tisi. Udah nya baru kami meri jelu ngirup.”

⁹Lebuh Jakop agi benung bejaku enggau sida, Rachel pen datai mai raban bedus apai iya.

¹⁰Lebuh Jakop meda Rachel mai raban bedus aya iya Laban, iya mansang ngagai telaga, maringka batu nya ke tisi, lalu meri raban jelu bedus nya ngirup.

¹¹Udah nya iya nyium Rachel, lalu nyabak gaga ati.

¹²Ku Jakop madahka ngagai Rachel, “Aku tu anak Rebekah, kaban apai nuan.” Rachel lalu belanda, madahka apai iya.

¹³Lebuh apai Rachel ninga Jakop nya anak menyadi iya Rebekah, iya lalu belanda ngambat Jakop, merap lalu nyium iya, lalu mai iya ke rumah. Lebuh Jakop madahka pasal semua utai ti udah nyadi,

¹⁴Laban lalu bejaku, “Nuan tu endang darah-getah aku empu.” Jakop lalu diau dia sebulan.

¹⁵Ku Laban bejaku enggau Jakop, “Nuan kaban belayan aku, tang aku enda tau ngasuh nuan bekereja ke aku enda begaji. Nya alai, ni pemesai gaji dipinta nuan?”

¹⁶Nyadi Laban bisi dua iku anak dara. Iya ke tuai agi benama Leah, lalu iya ke biak agi benama Rachel.

¹⁷Leah numbas pemajik, tang Rachel manah raras tubuh sereta bajik gamal.

¹⁸Jakop rinduka Rachel, nya alai ku iya, “Aku bekereja ke nuan tujuh taun kena aku ngulihka Rachel.”

¹⁹Ku Laban nyaut, “Manah agi aku meri iya ngagai nuan, ari ke meri iya ngagai orang bukai. Diau ditu enggau aku.”

²⁰Jakop lalu bekereja tujuh taun, kena iya ngulihka Rachel, lalu ba Jakop tujuh taun nya asai ti dua tiga hari aja laban iya rinduka Rachel.

²¹Udah nya Jakop lalu bejaku enggau Laban, “Awakka aku jadi enggau Rachel laban timpuh udah chukup.”

²²Laban lalu nyendiaka gawai tikah, lalu ngambi semua orang ngabang.

²³Tang malam nya, iya enda mai Rachel, tang mai Leah, ngagai Jakop, lalu Jakop beleman enggau Leah. (

²⁴Laban meri ulun iya ti indu ke benama Silpah ngagai Leah nyadika ulun Leah.)

²⁵Pagi hari siti nya baru Jakop nemu indu nya Leah. Iya lalu bejaku ngagai Laban, “Nama kebuah nuan ngereja utai baka tu ngagai aku? Aku udah bekereja ke nuan kena aku ngulihka Rachel. Nama kebuah nuan nipu aku?”

²⁶Ku Laban nyaut, “Nitihka adat kami di menua tu, anak indu ke biak enda tau ditikah dulu agi ari anak indu ke tuai.

²⁷Nganti udah tembu gawai tikah seminggu tu, nya baru aku meri Rachel ngagai nuan, enti nuan deka bekereja ke aku tujuh taun da agi.”

²⁸Jakop besetuju, lalu lebuh gawai tikah seminggu nya udah tembu, Laban lalu meri anak iya Rachel nyadika bini Jakop. (

²⁹Laban lalu meri ulun iya ti indu ke benama Bilhah ngagai Rachel nyadika ulun Rachel.)

³⁰Jakop mega beleman enggau Rachel, lalu iya balat agi rinduka Rachel, ari iya ti rinduka Leah. Udah nya Jakop lalu bekereja ke Laban tujuh taun da agi.

³¹Lebuh TUHAN meda Jakop rindu agi ke Rachel ari iya ti rinduka Leah, TUHAN lalu ngasuh Leah beranak mayuh, tang Rachel mengkang nadai anak.

³²Leah ngandung, lalu ngadaka anak lelaki siku. Ku iya, “TUHAN udah meda penusah aku. Diatu baru laki aku deka rinduka aku.” Nya alai Leah meri iya nama Reuben.[85]

³³Leah ngandung baru, lalu ngadaka siku agi anak lelaki. Ku iya, “TUHAN udah meri aku siku agi anak lelaki, laban Iya udah ninga aku enda dikerinduka Jakop.” Nya alai Leah meri anak iya nya nama Simeon.[86]

³⁴Leah ngandung baru, lalu ngadaka siku agi anak lelaki. Ku iya, “Diatu laki aku tentu deka rindu agi ke aku, laban aku udah ngadaka tiga iku anak lelaki ke iya.” Nya alai Leah meri iya nama Lewi.[87]

³⁵Udah nya Leah ngandung baru, lalu ngadaka siku agi anak lelaki. Ku iya, “Sekali tu aku deka muji TUHAN.” Nya alai iya meri iya nama Judah.[88] Udah nya iya enda agi beranak.