Read Iban Pemungkal 30 Bible Online

Pemungkal 30 - Iban bible

Pemungkal 30

¹Tang Rachel mengkang nadai anak. Nya alai iya kepapaska menyadi iya, lalu ku iya bejaku enggau Jakop, “Beri aku anak. Enti enda, manah agi aku mati.”

²Jakop lalu ringat ngagai Rachel. Ku iya, “Aku ukai Allah Taala, laban Iya ke nagang nuan bisi anak.”

³Ku Rachel, “Tu ulun aku, Bilhah. Manah agi enti nuan tinduk enggau iya, ngambika iya tau ngadaka anak ke aku, ngambika aku tau nyadi indai, ulih iya.”

⁴Rachel lalu nyerahka Bilhah ngagai laki iya Jakop, lalu Jakop beleman enggau Bilhah.

⁵Bilhah lalu ngandung, lalu ngadaka siku anak lelaki ke Jakop.

⁶Ku Rachel, “Allah Taala udah kasihka aku. Iya udah ninga sampi aku, lalu udah meri aku siku anak lelaki.” Nya alai iya meri anak nya nama Dan.[89]

⁷Bilhah ngandung baru, lalu ngadaka anak lelaki ti kedua ke Jakop.

⁸Ku Rachel, “Aku bebendar amat bepekit mayuh anak ngelaban menyadi aku, tang aku udah menang.” Nya alai iya meri anak mit nya nama Naptali.[90]

⁹Lebuh Leah nemu diri nyau badu agi beranak, iya lalu nyerahka ulun iya, Silpah, ngagai Jakop, nyadika bini Jakop.

¹⁰Udah nya Silpah lalu ngadaka siku anak lelaki ke Jakop.

¹¹Ku Leah, “Aku udah bulih berekat.” Nya alai iya meri iya nama Gat.[91]

¹²Silpah lalu ngadaka siku agi anak lelaki ke Jakop,

¹³lalu ku Leah, “Ati aku lantang amat! Diatu sida ke indu deka ngumbai aku lantang ati.” Nya alai iya meri iya nama Aser.[92]

¹⁴Lebuh maya orang ngetau gandum, Reuben nurun ke umai, lalu tetemuka kayu pengerindu.[93] Iya lalu mai kayu nya ngagai indai iya, Leah. Ku Rachel bejaku enggau Leah, “Beri aku mimit kayu pengerindu anak nuan nya.”

¹⁵Disaut Leah, “Nuan udah ngambi laki aku: kati nya enda chukup ke nuan, lalu diatu nuan deka mega ngambi kayu pengerindu anak aku?” Ku Rachel, “Enti nuan meri aku kayu pengerindu anak nuan nya, aku deka nejuka nuan tinduk enggau Jakop malam tu.”

¹⁶Lebuh Jakop pulai ari umai lemai nya, Leah lalu mansang ngambat iya, ku iya, “Nuan tinduk enggau aku malam tu, laban aku udah meli nuan ngena kayu pengerindu anak aku.” Nya alai malam nya Jakop beleman enggau Leah.

¹⁷Allah Taala lalu nyaut sampi Leah. Iya ngandung, lalu ngadaka anak lelaki ti kelima.

¹⁸Ku Leah, “Allah Taala udah meri aku upah, laban aku udah nyerahka ulun aku ngagai laki aku.” Nya alai iya meri anak iya nya nama Isakar.[94]

¹⁹Leah ngandung baru, lalu ngadaka anak lelaki ti keenam.

²⁰Ku Leah, “Allah Taala udah meri aku pemeri ti manah. Diatu baru laki aku deka nerima aku, laban aku udah ngadaka enam iku anak lelaki ke iya.” Nya alai iya meri anak mit nya nama Sebulun.[95]

²¹Udah nya iya ngadaka siku anak indu ke diberi iya nama Dinah.

²²Udah nya Allah Taala ingatka Rachel. Iya nyaut sampi Rachel, lalu ngasuh Rachel ulih beranak.

²³Rachel ngandung, lalu ngadaka siku anak lelaki. Ku iya, “Allah Taala udah muai pemalu aku, laban iya udah meri aku siku anak lelaki.

²⁴Awakka TUHAN meri aku siku agi anak lelaki.” Nya alai iya meri iya nama Josep.[96]

²⁵Udah bekau pengada Josep, Jakop bejaku enggau Laban, “Awakka aku mupuk, lalu pulai ngagai menua aku empu.

²⁶Beri ngagai aku semua bini enggau anak aku, ti udah ulih aku bekereja ke nuan, ngambika aku angkat ari menua tu. Nuan nemu pemendar aku udah bekereja ke nuan.”

²⁷Ku Laban bejaku enggau Jakop, “Awakka aku nyebut tu: Ari tujum aku empu, aku nemu TUHAN udah merekatka aku, ketegal nuan.

²⁸Sebut aja upah nuan, ngambika aku mayar nuan.”

²⁹Disaut Jakop, “Nuan nemu pemendar aku udah bekereja ke nuan, lalu raban jelu bedus nuan udah nambah-menambah sekumbang aku ke ngibun sida.

³⁰Jelu nuan mimit aja sebedau aku datai, tang diatu sida udah mayuh amat, lalu TUHAN udah merekatka nuan, di sebarang endur aku bejalai.[97] Diatu maya udah datai alai aku patut ngira pengidup diri empu.”

³¹“Nama utai ti patut dibayar aku ngagai nuan?” ku Laban nanya. Disaut Jakop, “Aku enda minta gaji. Aku deka majak ngintu raban jelu nuan, enti nuan besetuju enggau penemu aku:

³²Awakka aku bejalai nengah semua raban jelu nuan sehari tu, lalu ngambi semua anak domba ti chelum[98] enggau semua anak kambin ti beselat bulu, tauka perintik. Nya aja gaji ti dipinta aku.

³³Ila nuan deka nemu enti aku manah ati enggau nuan tauka enda. Lebuh nuan datai meresa gaji aku, lalu nemu aku bisi kambin ti enda perintik tauka beselat bulu, tauka bedus ti enda chelum, nuan deka nemu utai nya udah ulih aku ngenchuri.”

³⁴Disaut Laban, “Aku besetuju. Aram tua ngereja nitihka atur ti ku nuan.”

³⁵Tang sehari nya, Laban mindahka semua kambin ti lelaki, ti besurik, tauka beselat bulu, enggau semua kambin ti indu ke perintik, tauka beselat bulu, tauka bisi chura burak ba sida. Iya mega mindahka semua jelu bedus ti chelum, lalu ngasuh bala anak lelaki iya ngibun raban jelu nya.

³⁶Iya lalu ninggalka Jakop, mai raban jelu nya kira pejalai tiga hari ari endur nya. Jakop lalu ngibun teda raban jelu Laban ti bukai.

³⁷Jakop lalu ngambi dan kayu poplar, kayu almon, enggau kayu plan ti agi idup, lalu ngelitika sekeda kulit ba dan kayu nya siti-siti, ngambika dan nya besurik burak.

³⁸Iya lalu ngengkahka dan kayu nya di mua raban jelu nya, ba dulang alai sida ngirup. Iya ngengkahka dan kayu nya dia, laban jelu nya bung lebuh sida datai ngirup.

³⁹Nya alai, lebuh kambin beranak di mua dan kayu nya, sida ngadaka anak ti besurik, perintik, enggau beselat bulu.

⁴⁰Jakop nyeraraka jelu bedus ari jelu kambin, lalu ngasuh sida bediri nunga jelu ti besurik, enggau ti bechura chelum, ti ari raban jelu Laban. Nya meh chara iya nambahka pemayuh jelu ngagai raban jelu iya empu, lalu nyeraraka jelu nya ari raban jelu Laban.

⁴¹Lebuh jelu ti bepengerai nya bung, Jakop ngengkahka dan kayu nya di mua sida, ba dulang alai sida ngirup, ngambika sida beranak ba sebelah dan kayu nya.

⁴²Tang iya enda ngengkahka dan kayu nya di mua jelu ti lemi. Enda lama udah nya, Laban semina bisi jelu ti lemi, lalu Jakop bempu semua jelu ti bepengerai.

⁴³Nya meh jalai Jakop nyadi kaya amat. Raban jelu iya mayuh, ulun iya mayuh, jelu unta, enggau keledai iya pen mayuh.