Read Iban Pemungkal 32 Bible Online

Pemungkal 32 - Iban bible

Pemungkal 32

¹Lebuh Jakop benung di rantau jalai, bala melikat Allah Taala betemu enggau iya.

²Lebuh iya meda sida, iya lalu bejaku, “Tu kem Allah Taala.” Nya alai iya ngumbai endur nya Mahanaim.[103]

³Jakop lalu ngasuh bala seruan iya bejalai dulu ari iya, ngagai menyadi iya Esau di menua Edom.

⁴Iya ngasuh sida bejaku munyi tu ngagai Esau: ‘Aku, Jakop, ti ulun nuan, madahka ngagai tuan aku, Esau, aku udah diau enggau Laban lalu apin ulih mulaika diri nyentuk ngagai ke diatu.

⁵Diatu aku bisi jelu sapi, keledai, bedus, kambin enggau ulun. Aku ngirumka pesan tu ngagai nuan, tuan, ngarapka nuan deka kasihka aku.”

⁶Lebuh bala seruan nya pulai baru ngagai Jakop, sida lalu bejaku, “Kami udah betemu enggau menyadi nuan, Esau, lalu iya diatu benung di rantau jalai deka betemu enggau nuan. Iya mai empat ratus iku orang enggau iya.”

⁷Jakop takut sereta irau ati. Iya lalu magi bala orang ke enggau iya, sereta enggau raban jelu bedus, kambin, jelu sapi enggau jelu unta iya, ngagai dua bengkah raban.

⁸Ku runding iya, “Enti Esau datai lalu nyerang raban ti keterubah, raban ti sebengkah nyangka ulih ngerarika diri.”

⁹Udah nya Jakop lalu besampi, “Allah Taala aki aku Abraham, enggau Allah Taala apai aku Isak, dingaka aku! Nuan TUHAN udah ngasuh aku pulai ngagai menua aku, ngagai kaban belayan aku, lalu Nuan deka ngasuh aku mujur dalam semua utai.

¹⁰Aku enda patut nerima semua pemanah enggau penetap ati ti udah ditunjukka Nuan ngagai aku ti ulun Nuan, laban dulu menya lebuh aku meraka Sungai Jordan aku semina mai siti tungkat aja, tang diatu aku pulai mai raban dua bengkah tu.

¹¹Aku besampi, minta Nuan ngelepaska aku ari kuasa menyadi aku, Esau. Aku takut, enggai ke iya datai nyerang, lalu munuh semua bala kami, nyengkaum indu nembiak.

¹² Kingatka Diri ti udah besemaya deka ngasuh aku mujur dalam semua utai, lalu deka meri aku peturun ngemayuh igi pasir ti ba tebing tasik, ti enda ulih diitung.”

¹³Lebuh iya udah bemalam dia semalam, Jakop lalu milih jelu ari raban jelu iya nyadika pemeri ti deka diberi iya ngagai menyadi iya, Esau: 200 iku kambin ti indu, enggau 20 iku kambin ti lelaki, 200 iku bedus ti indu enggau 20 iku jelu bedus ti lelaki, 30 iku jelu unta ti agi nusuka anak, sama enggau anak sida, 40 iku indu sapi enggau 10 iku sapi ti lelaki, 20 iku keledai ti indu, enggau 10 iku keledai ti lelaki.

¹⁶Iya lalu magi sida ngagai berapa iti raban, lalu ngasuh bala ulun iya mai siti-siti raban. Ku iya bejaku enggau sida, “Kita bejalai dulu ari aku, lalu gaga takah entara raban ti dulu ari raban ti dudi.”

¹⁷Ku iya bejaku enggau ulun iya ti terubah, “Lebuh menyadi aku Esau betemu enggau nuan, lalu iya nanya, ‘Sapa nama tuan nuan? Kini ke tunga pejalai kita? Sapa bempu jelu ti di mua nuan tu?’

¹⁸nuan enda tau enda nyaut, ‘Sida tu diempu ulun nuan Jakop. Iya ngirumka jelu tu nyadika pemeri ngagai tuan iya Esau. Jakop empu deka datai nunda-udi kami.’ ”

¹⁹Iya mega meri atur ti sebaka enggau nya ngagai ulun iya ti kedua, ketiga, enggau semua sida bukai ke mai raban jelu: “Tu utai ti enda tau enda disebut kita ngagai Esau, lebuh kita betemu enggau iya.

²⁰Kita enda tau enda nyebut, ‘Ulun nuan, Jakop, deka datai dudi ari kami.’ ” Ku pikir Jakop, “Aku deka ngasuh iya rinduka aku ngena pemeri. Lebuh aku betemu enggau iya, aku ngarapka iya deka ngampun aku.”

²¹Iya ngirumka pemeri nya dulu ari iya, tang malam nya iya empu bemalam ba kem nya.

²²Malam nya Jakop angkat, mai bini iya ke dua iku, indu simpan iya ke dua iku, enggau anak iya ke sebelas iku, lalu meraka Sungai Jabok.

²³Lebuh iya udah nganjung sida meraka sungai nya, iya mega nganjung semua reta tengkira iya ke seberai,

²⁴ tang iya empu ninggalka diri ba kem nya. Udah nya siku lelaki datai, lalu bibat enggau iya, nyentuk ngagai rerak tawas pagi hari siti.

²⁵Lebuh orang nya nemu diri enda ulih ngalahka Jakop, iya lalu mukut punggung Jakop. Tulang punggung Jakop lalu tebelingkah.

²⁶Ku orang nya bejaku, “Anang megai aku agi. Hari nyau tawas.” “Aku enggai ngelengkaka nuan, enti nuan enda merekatka aku,” ku Jakop nyaut iya.

²⁷“Sapa nama nuan?” ku orang nya nanya. “Jakop,” ku Jakop nyaut.

²⁸ Ku orang nya, “Nama nuan ukai Jakop agi. Nuan udah bibat ngelaban Allah Taala, enggau ngelaban mensia, lalu nuan udah menang. Nya alai, nama nuan Israel.” [104]

²⁹ Ku Jakop, “Padahka nama nuan ngagai aku.” Tang ku orang nya nyaut, “Nama kebuah nuan keran deka nemu nama aku?” Udah nya iya lalu merekatka Jakop.

³⁰Ku Jakop, “Aku udah betemu betunga mua enggau Allah Taala, lalu aku agi mengkang idup.” Nya alai, iya ngumbai endur nya Penil.[105]

³¹Mata panas endang udah niki lebuh Jakop angkat ari Penil, lalu iya bejalai pinchat laban punggung iya.

³²Nyentuk ngagai sehari tu bala peturun Israel enda makai gumpal isi ti ba punggung jelu, laban Jakop udah kena bukut ba gumpal isi nya.