Read Iban Pemungkal 33 Bible Online

Pemungkal 33 - Iban bible

Pemungkal 33

¹Jakop meda Esau datai enggau empat ratus iku bala iya. Nya alai iya lalu magi bala anak mit entara Leah, Rachel enggau dua iku indu simpan iya.

²Iya ngasuh indu simpan iya enggau anak sida bejalai dulu, ditangkanka Leah enggau bala anak iya, lalu ke penudi iya, Rachel enggau Josep di belakang.

³Jakop bejalai dulu ari sida, lalu meremi ke tanah tujuh kali lebuh iya mansang ngagai menyadi iya.

⁴Tang Esau belanda ngambat iya, merap iya, lalu nyium iya. Seduai iya sama nyabak.

⁵Lebuh Esau malik, lalu tepedaka sida ke indu enggau sida ke mit, iya lalu nanya, “Sapa orang enggau nuan tu?” “Tuan, tu bala anak ti udah diberi Allah Taala ngagai aku,” ku Jakop nyaut.

⁶Udah nya indu simpan iya ke dua iku lalu mansang ke mua, sama enggau anak seduai iya, lalu meremi.

⁷Udah nya Leah enggau bala anak iya mansang ke mua, lalu ke penudi iya bendar, Josep seduai Rachel mansang ke mua, lalu meremi.

⁸Ku Esau nanya, “Kati ku pasal raban siti nya ti udah betemu enggau aku tadi? Nama reti utai nya?” Ku Jakop nyaut, “Kena minta pengasih ari nuan.”

⁹Tang ku Esau, “Aku endang udah chukup mayuh utai, menyadi. Simpan nuan aja meh utai nuan nya.”

¹⁰Ku Jakop, “Anang baka nya. Enti nuan kasihka aku, terima aja meh pemeri aku tu. Lebuh aku meda mua nuan, aku asai ke meda mua Allah Taala, laban nuan udah manah enggau aku.

¹¹Nya alai aku minta nuan nyambut pemeri tu, ti udah dibai aku ke nuan, laban Allah Taala udah kasihka aku, lalu udah meri aku semua utai ti dipeguna aku.” Jakop majak ngumbuk Esau, datai ke Esau nyambut pemeri nya.

¹²Ku Esau, “Aram kitai mupuk ari endur tu. Aku deka bejalai enggau nuan.”

¹³Disaut Jakop, “Nuan nemu, bala anak mit tu lemi, lalu aku enggai nyadi enda ngira raban jelu bedus, enggau raban jelu tupi enggau anak sida. Enti sida dipejalka bejalai bebendar sehari, semua sida deka mati.

¹⁴Mupuk dulu meh nuan. Awakka aku nitihka nuan belubah-lubah enggau naka ulih aku sama enggau raban jelu enggau bala sida ke mit, datai ke tua ulih betemu baru di Edom.”

¹⁵Ku Esau, “Enti pia, awakka aku ninggalka sekeda bala aku enggau nuan.” Tang ku Jakop nyaut, “Enda ibuh baka nya, asal nuan lantang ati enggau aku.”

¹⁶Nya alai, Esau mupuk sehari nya ngagai Edom.

¹⁷Tang Jakop mupuk ngagai Sukot. Dia iya lalu ngaga sebuah rumah ke diri empu, enggau bansal ke jelu tupi iya. Nya kebuah endur nya dikumbai Sukot.[106]

¹⁸Lebuh Jakop pulai ari Mesopotamia, iya datai enggau selamat ba nengeri Sekem, di menua Kanaan, lalu nirika kem iya ba padang semak nengeri nya.

¹⁹ Iya meli padang nya ari peturun Hamor, apai Sekem, ngena seratus singkap pirak.

²⁰Iya lalu ngaga siti alta dia, lalu ngumbai alta nya El-Elohe-Israel.[107]