Read Iban Pemungkal 34 Bible Online

Pemungkal 34 - Iban bible

Pemungkal 34

¹Nyadi sekali, Dinah, anak dara Jakop seduai Leah, mansang nemuai ngagai indu orang Kanaan.

²Lebuh Sekem, anak Hamor, orang Ibi, ti nyadi tuai di menua nya, meda Dinah, iya lalu masung iya.

³Iya rinduka Dinah anak indu Jakop, lalu iya bejaku manah enggau Dinah.

⁴Ku Sekem bejaku enggau apai iya, “Aku bisi amat ati deka ngambi Dinah nyadika bini aku.”

⁵Nyadi Jakop sigi nemu anak indu iya endang udah dipasung orang, tang laban bala anak lelaki iya agi di padang ngemataka jelu tupi iya, iya nadai ngereja sebarang utai sebedau sida pulai.

⁶Hamor, apai Sekem lalu mansang berandau enggau Jakop.

⁷Ba urung maya nya mega bala anak Jakop datai di rumah pulai ari umai. Lebuh sida ninga berita nya, sida ringat lalu pedis ati ngagai Sekem ti udah ngereja nya, lalu udah mechat orang Israel masung anak indu Jakop.

⁸Ku Hamor bejaku enggau Jakop, “Anak aku Sekem rinduka anak indu nuan. Aku minta nuan ngemendarka iya jadi enggau anak indu nuan.

⁹Awakka tua ngaga siti sempekat kena ngemendarka orang ari bansa kami jadi enggau orang ari bansa kita.

¹⁰Nya baru kita ulih diau begulai enggau kami di menua kami tu. Kita tau diau di sebarang endur kita deka, lalu bedagang enggau sepeneka ati kita, lalu ngulihka reta tengkira ke diri empu.”

¹¹Udah nya Sekem empu lalu bejaku enggau apai Dinah, sereta enggau sida menyadi lelaki Dinah, “Aku minta kasih ngagai kita. Aku deka meri kita sebarang utai ti dipinta kita.

¹²Padahka ngagai aku pemeri ti dipinta kita, lalu letak derian nitihka peneka ati kita. Aku deka meri ngagai kita sebarang utai ti dipinta kita, asal ga kita deka nejuka aku jadi enggau Dinah.”

¹³Nyadi laban Sekem udah ngemaluka Dinah, menyadi indu sida, bala anak lelaki Jakop lalu nyaut Sekem enggau apai iya Hamor, ngena jalai tipu.

¹⁴Ku sida bejaku enggau Sekem, “Kami enda nyagi menyadi indu kami jadi enggau lelaki ti enda ditutus, laban nya ngemaluka kami.

¹⁵Kami semina ulih besetuju enti kita deka nyadi baka kami, nutus semua bala kita ke lelaki.

¹⁶Nya baru kami deka besetuju jadi enggau orang ari bansa kita. Kami deka diau mendam begulai enggau kita, lalu nyadi sebansa enggau kita.

¹⁷Tang enti nuan enda nerima atur kami tu, lalu ditutus, kami deka mai Dinah angkat ari tu.”

¹⁸Atur nya baka ke manah ba penemu Hamor enggau anak iya, Sekem,

¹⁹lalu orang bujang nya terus ngereja utai ti disebut sida, laban iya rinduka anak indu Jakop. Orang bujang nya endang orang ke pemadu dibasa dalam ruang bilik iya.

²⁰Hamor enggau anak iya Sekem lalu mansang ngagai endur alai baum ba pintu penama nengeri nya, lalu bejaku ngagai orang nengeri nya:

²¹“Orang tu manah enggau kitai begulai. Awakka sida diau di menua tu begulai enggau kitai, lalu bejalai kia-kia sepeneka ati sida. Menua tu chukup mega besai ke sida. Awakka kitai jadi enggau anak indu sida, lalu kitai nyerahka anak indu kitai jadi enggau sida.

²²Tang orang tu semina deka besetuju diau begulai enggau kitai, lalu nyadi sama sebansa enggau kitai, enti kitai besetuju nutus semua bala kitai ti lelaki, baka sida empu.

²³Nya baru semua jelu tupi enggau semua utai sida, deka diempu kitai. Nya alai, awakka kitai besetujuka sida diau begulai enggau kitai.”

²⁴Semua orang di nengeri nya besetuju magang enggau penemu ti dibantaika Hamor seduai Sekem, lalu semua lelaki ditutus magang.

²⁵Tiga hari udah bekau nya, lebuh sida ke lelaki agi natka abi tutus sida, dua iku anak Jakop, Simeon seduai Lewi, menyadi lelaki Dinah, mai pedang lalu belalai tama ngagai nengeri nya, lalu munuh semua orang ke lelaki,

²⁶nyengkaum Hamor enggau anak iya, Sekem. Udah nya seduai iya lalu ngambi Dinah ari rumah Sekem, lalu angkat ari nya.

²⁷Anak lelaki Jakop ti bukai lalu ngerampas utai ari nengeri nya kena malas pemalu menyadi indu sida.

²⁸Sida ngambi raban jelu bedus, sapi, keledai, enggau semua utai ti dalam nengeri nya, enggau utai ti di padang.

²⁹Sida ngambi semua utai ti berega, nangkap semua orang ke indu, enggau bala anak mit, lalu nabanka semua utai ari rumah orang.

³⁰Ku Jakop bejaku enggau Simeon seduai Lewi, “Seduai udah ngasuh aku ditinggang penusah, laban diatu orang Kanaan, orang Peris, enggau semua orang bukai di menua tu deka begedika aku magang. Bala kitai enda mayuh. Enti sida beserakup ngelaban kitai, lalu nyerang kitai, semua kitai sebilik deka mati magang.”

³¹Tang ku seduai iya nyaut, “Kami enggai sekali-kali nejuka menyadi kami digaga orang baka indu sundal.”