Read Iban Pemungkal 35 Bible Online

Pemungkal 35 - Iban bible

Pemungkal 35

¹ Ku Allah Taala bejaku ngagai Jakop, “Alai nuan mansang ngagai Betel diatu, lalu diau dia. Gaga siti alta dia ke Allah Taala ti udah pegari di mua nuan lebuh nuan rari ari menyadi nuan, Esau.”

²Nya alai Jakop lalu bejaku enggau sida sebilik, sereta enggau semua orang ke enggau iya. Ku iya, “Buai semua petara orang bansa bukai ke disimpan kita. Tuchi diri empu, lalu rasukka gari ti beresi.

³Kitai deka angkat ari endur tu, lalu mansang ngagai Betel. Din aku deka ngaga siti alta ke Allah Taala, ti udah nyaup aku lebuh aku dituntung penusah, lalu udah enggau aku di semua endur ti udah alai aku bejalai.”

⁴Nya alai sida lalu nyerahka ngagai Jakop semua petara orang bansa bukai ke udah disimpan sida, sereta enggau semua antin ti dikena sida. Jakop lalu numbakka utai nya di baruh sepun kayu oak semak Sekem.

⁵Lebuh Jakop, enggau bala anak lelaki iya baru deka mupuk, orang ke diau dalam nengeri ti semak nya dia bela takut magang, lalu sida enda begagaika Jakop enggau bala anak iya.

⁶Jakop, enggau semua bala iya datai di Lus, ti dikumbai Betel diatu, di menua Kanaan.

⁷Iya ngaga sebuah alta dia, lalu ngumbai endur nya Allah Taala ti di Betel, laban Allah Taala udah pegari di mua iya dia lebuh iya rari ari menyadi iya Esau.

⁸Ulun Rebekah ke benama Deborah mati, lalu dikuburka di baruh sepun kayu oak ti muak ke selatan nengeri Betel. Nya alai endur nya dikumbai, “Kayu Oak Alai Nyabak.”[108]

⁹Lebuh Jakop pulai ari Mesopotamia, Allah Taala pegari baru di mua iya, lalu merekatka iya.

¹⁰ Ku Allah Taala bejaku ngagai iya, “Nama nuan Jakop, tang belabuh ari diatu, nama nuan Israel.” Nya alai iya diberi nama Israel.

¹¹ Lalu ku Allah Taala bejaku ngagai iya, “Aku tu Allah Taala ti Pemadu Bekuasa. Beranak betelesak meh nuan. Nuan deka nurunka mayuh bengkah bansa, lalu nuan deka nyadi aki ini ke bala raja.

¹²Aku deka meri ngagai nuan menua ti udah diberi Aku ngagai Abraham enggau Isak, lalu Aku deka mega meri menua nya ngagai peturun nuan, ti deka nangkanka nuan.

¹³Udah nya Allah Taala lalu ninggalka iya.

¹⁴ Ba endur alai Allah Taala ti bejaku enggau iya, dia meh endur alai Jakop nirika siti tiang batu pengingat lalu nuang wain enggau minyak kana ba batu nya.

¹⁵Jakop lalu ngumbai endur nya Betel.

¹⁶Jakop enggau sida sebilik angkat ari Betel, lalu lebuh sida agi jauh ari Eprat, Rachel muat pedis perut deka beranak. Tang iya mar amat beranak.

¹⁷Lebuh iya balat amat pedis perut, indu bidan lalu bejaku enggau iya, “Anang takut, Rachel. Anak nuan lelaki.”

¹⁸Tang Rachel nyau deka mati, lalu lebuh iya baru deka ngapuska seput, iya meri anak iya nama Benoni, [109] tang Jakop meri anak nya nama Benjamin.[110]

¹⁹Lebuh Rachel udah mati, iya lalu dikuburka ba tisi jalai ngagai Eprat, ti dikumbai Betlehem diatu.

²⁰Jakop nirika siti tiang batu pengingat ba endur nya, lalu batu nya mengkang ngelai endur alai kubur Rachel nyentuk ngagai sehari tu.

²¹Jakop mindah ari endur nya, lalu nirika kem iya sepiak menara Eder.

²² Lebuh Jakop diau di menua nya, Reuben beleman enggau Bilhah, siku indu simpan apai iya. Lebuh Jakop ninga nya iya pedis ati. Nyadi Jakop bisi dua belas iku anak lelaki.

²³Anak lelaki ke diadaka Leah nya Reuben (anak tuai Jakop), Simeon. Lewi, Judah, Isakar, enggau Sebulun.

²⁴Anak lelaki Rachel: Josep seduai Benjamin.

²⁵Anak lelaki ke diadaka ulun Rachel ke benama Bilhah: Dan enggau Naptali.

²⁶Anak lelaki ke diadaka ulun Leah ke benama Silpah: Gat seduai Aser. Tu bala anak lelaki ke ada di Mesopotamia.

²⁷ Jakop bejalai ngagai apai iya di Mamre, semak Hebron, alai Abraham enggau Isak ti diau menya.

²⁸Isak idup nyentuk ngagai umur iya seratus lapan puluh taun

²⁹lalu iya mati lebuh umur iya nyau tuai amat. Anak iya Esau seduai Jakop, lalu nguburka iya.