Read Iban Pemungkal 37 Bible Online

Pemungkal 37 - Iban bible

Pemungkal 37

¹Jakop mengkang diau di menua Kanaan, ti udah alai apai iya diau,

²lalu tu jerita pasal ruang bilik Jakop. Lebuh Josep umur tujuh belas taun, iya enggau menyadi iya ke diadaka Bilhah enggau Silpah, iya nya indu simpan apai iya, ngibun raban bedus enggau raban kambin. Josep mai berita ti enda manah ngagai apai iya, pasal utai ti dikereja bala menyadi iya.

³Jakop rindu agi ke Josep ari iya ke rinduka anak iya ti bukai, laban Josep udah diperanakka lebuh umur Jakop nyau tuai. Iya ngaga baju panjai, ti panjai lengan, ke Josep.

⁴Lebuh bala menyadi Josep meda apai sida rindu agi ke Josep ari iya ti rinduka sida, sida begedika Josep, datai ke sida nyau enggai bejaku manah enggau iya.

⁵Nyadi sekali, Josep bemimpi. Lebuh iya madahka mimpi diri ngagai bala menyadi iya, sida lalu balat agi begedika iya.

⁶Ku iya, “Dinga kita mimpi aku.

⁷Semua kitai bisi di umai, nanchang tangkai gandum. Tanchang tangkai gandum aku angkat lalu bediri chegit-chegit. Tanchang tangkai gandum kita lalu ngelingi tanchang tangkai gandum aku, lalu meremi ngagai iya.”

⁸“Kati nuan ngumbai dirika nyadi raja kami?” ku bala menyadi iya bejaku. Nya alai sida balat agi begedika iya ketegal mimpi nya, enggau ketegal utai ti disebut iya.

⁹Udah nya Josep lalu bemimpi baru, lalu madahka mimpi nya ngagai bala menyadi iya, “Aku udah bemimpi baru. Aku bemimpi meda mata hari, bulan, enggau sebelas igi bintang meremi ngagai aku.”

¹⁰Iya mega nusui mimpi nya ngagai apai iya, lalu apai iya nganu iya: “Mimpi nama utai baka nya? Kati nuan ngumbai indai nuan, bala menyadi nuan, enggau aku deka meremi ngagai nuan?”

¹¹ Bala menyadi Josep kepapaska iya, tang apai iya majak berundingka semua pekara nya.

¹²Nyadi sekali, lebuh bala menyadi Josep udah bejalai ngagai Sekem, ngibun raban jelu apai sida,

¹³Jakop bejaku enggau Josep, “Aku ngasuh nuan mupuk ngagai bala menyadi nuan ke ngibun raban bedus di Sekem.” Disaut Josep, “Au.”

¹⁴Ku apai iya, “Mupuk nuan, lalu abas bala menyadi nuan enggau raban jelu ti diibun sida. Udah nya pulai kitu baru, lalu bai berita ngagai aku.” Nya alai apai iya ngasuh iya mupuk ari Emperan Hebron. Josep lalu datai di Sekem

¹⁵lalu lebuh iya benung segau-segau ba sebelah menua nya, orang siku tepedaka iya, lalu nanya iya, “Nama utai digiga nuan?”

¹⁶“Aku ngiga bala menyadi aku, ke ngibun raban jelu sida,” ku iya nyaut. “Kati nuan ulih madahka endur alai sida?”

¹⁷Ku orang nya, “Sida udah angkat ari tu. Aku ninga sida madahka diri deka bejalai ngagai Dotan.” Josep lalu mupuk nitihka bala menyadi iya, lalu tetemuka sida di Dotan.

¹⁸Lebuh sida tepedaka iya ari jauh, sebedau iya datai, sida lalu bepekat deka munuh iya.

¹⁹Ku sida bejaku enggau pangan diri, “Nyin bujang ke bemimpi nya datai.

²⁰Aram kitai munuh iya lalu muai bangkai iya ke dalam telaga ti rangkai. Kitai tau madahka iya udah mati laban jelu. Nya baru kitai nemu namaka penyadi mimpi iya nya.”

²¹Tang lebuh Reuben ninga nya, iya nguji nagang sida. Ku iya, “Anang munuh iya.

²²Buai iya aja ngagai telaga di menua puang tu, tang anang ngemediska iya.” Reuben bejaku munyi nya laban iya deka ngidupka nyawa Josep, lalu mai iya pulai baru ngagai apai iya.

²³Lebuh Josep datai ba bala menyadi iya, sida lalu nyarikka baju panjai[111] ari tubuh iya.

²⁴Udah nya sida mai iya, lalu muai iya ngagai telaga ti nadai agi ai.

²⁵Lebuh sida benung makai, sida tepedaka seraban orang Ismail datai ari Giliat mansang ngagai menua Ejip. Jelu unta sida nyau sarat laban rempah enggau dambar.

²⁶Ku Judah bejaku enggau bala menyadi iya, “Nama utai ti ulih kitai enti kitai munuh menyadi kitai tu, lalu bepelamka pemati iya?

²⁷Aram kitai nyual iya ngagai orang Ismail nya. Nya baru kitai enda ibuh ngemediska iya, laban iya endang menyadi, endang darah-getah kitai empu.” Sida menyadi iya lalu besetuju.

²⁸ Lebuh bala orang dagang ari menua Midian mansa, bala menyadi Josep[112] narit Josep pansut ari telaga nya, lalu nyual iya ngagai orang Ismail nya. Rega iya dua puluh singkap pirak. Orang bansa Ismail nya lalu mai iya ngagai menua Ejip.

²⁹Lebuh Reuben pulai baru ngagai telaga nya, iya lalu nemu Josep nadai agi dia, lalu iya nyarikka gari diri laban kelalu tusah ati.

³⁰Iya pulai baru ngagai sida menyadi, ku iya, “Nembiak nya nadai agi dia! Baka ni ku aku enggau nya?”

³¹Udah nya sida munuh siku kambin, lalu nyepuhka baju panjai Josep ke dalam darah kambin nya.

³²Sida mai baju panjai nya ngagai apai sida, ku sida, “Kami bisi nemu utai tu. Kati tu gari anak nuan?”

³³Jakop ngelala baju panjai nya, lalu ku iya, “Baju Josep meh tu! Jelu babas udah makai iya. Anak aku, Josep, udah dipecharikka jelu!”

³⁴Jakop lalu nyarikka gari diri laban iya kelalu tusah ati, lalu ngerasukka kain guni.[113] Lama amat iya ngulitka anak iya.

³⁵Semua anak lelaki iya, enggau anak indu iya, datai merindang iya, tang iya enggai diperindang sida. Ku iya, “Aku deka ngulitka anak aku datai ke aku mati.” Nya alai iya majak ngulitka anak iya, Josep.

³⁶Nyadi ba urung maya nya di menua Ejip, orang Midian nya udah nyual Josep ngagai Potipar, siku pemesai raja, ti nyadi kepala ke bala soldadu ke nyaga istana raja.