Read Iban Pemungkal 38 Bible Online

Pemungkal 38 - Iban bible

Pemungkal 38

¹Ba urung maya nya, Judah ninggalka sida menyadi iya lalu diau enggau lelaki siku ke benama Hirah, ke datai ari nengeri Adulam.

²Nya meh endur alai Judah betemu enggau indu bansa Kanaan siku ti agi biak. Nama apai indu nya Sua. Judah lalu jadi enggau indu nya,

³lalu indu nya ngadaka anak lelaki siku ke Judah, lalu Judah meri iya nama Er.

⁴Bini iya ngandung baru, lalu ngadaka siku agi anak lelaki, lalu bini iya meri anak mit nya nama Onan.

⁵Indu nya lalu ngadaka siku agi anak lelaki, lalu iya diberi nama Selah. Judah agi di Aksip lebuh anak mit nya ada.

⁶Judah ngambi siku bini ke anak tuai iya Er. Nama indu nya Tamar.

⁷Tang Er jai ulah, lalu nya nyungkak TUHAN ringat. Nya alai TUHAN munuh iya.

⁸Udah nya Judah lalu bejaku enggau menyadi Er ke benama Onan, “Alai nuan tinduk enggau balu menyadi nuan. Kereja tanggungjawap nuan nyadi laki ke balu menyadi nuan, ngambika menyadi nuan bisi purih.”

⁹Tang Onan nemu, enti iya enggau balu menyadi iya bisi anak, anak mit nya ila ukai dikumbai enggi iya. Nya alai lebuh iya beleman enggau balu menyadi iya, iya nejuka ai mani iya nyaya, ngambika menyadi iya nadai purih.

¹⁰Utai ti dikereja Onan nyungkak TUHAN ringat, lalu TUHAN mega munuh iya.

¹¹Udah nya Judah lalu bejaku enggau menantu iya, Tamar, “Alai nuan pulai ngagai rumah apai nuan, lalu mengkang nyadi orang ke balu nyentuk ngagai maya anak aku, Selah, udah besai.” Iya nyebut nya laban iya enggai ke Selah kena bunuh, baka menyadi iya ke dua iku. Nya alai Tamar pulai ngagai rumah apai iya empu.

¹²Nyau kelama udah bekau nya, bini Judah mati. Lebuh Judah udah badu ngulit, iya enggau pangan iya, Hirah, orang Adulam, mansang ngagai Timnah, alai jelu bedus iya benung dikukur.

¹³Orang bisi madahka ngagai Tamar pasal mentua lelaki iya ti deka datai di Timnah, laban iya deka ngukur bedus iya.

¹⁴Tamar lalu nukar pekayan ulit iya, nambai mua diri ngena kain, lalu nudukka diri ba pintu penama ngagai Enaim, sebuah nengeri ti ba tisi jalai ti nuju ngagai Timnah. Tamar sigi nemu Selah, anak bunsu Judah endang udah besai, tang Selah lalu apin diasuh jadi enggau iya.

¹⁵Lebuh Judah tepedaka Tamar, iya ngumbai Tamar nya indu sundal, laban Tamar udah nambai mua diri.

¹⁶Judah mansang ngagai iya ba tisi jalai nya, lalu bejaku, “Berapa pinta nuan?” (Judah enda nemu indu nya menantu iya empu.) Ku indu nya nyaut, “Nama utai ti deka diberi nuan ngagai aku?”

¹⁷Ku Judah nyaut, “Aku deka ngirumka ngagai nuan siku kambin ti agi biak ari raban jelu aku.” Ku indu nya bejaku, “Barang ku jaku, enti nuan deka meri aku utai nyadika gadai, nganti nuan ke ngirumka kambin nya ngagai aku.”

¹⁸“Nama gadai ti patut diberi aku ngagai nuan?” ku Judah nanya. Disaut indu nya, “Tinchin ti dikena nuan ngechop, enggau tali iya, enggau tungkat ti dibai nuan nya.” Judah lalu meri utai nya ngagai iya. Udah nya seduai iya lalu beleman enggau pangan diri. Tamar lalu ngandung.

¹⁹Tamar pulai, muka tambai mua iya, lalu ngerasukka pekayan ulit iya.

²⁰Judah lalu ngasuh pangan iya, Hirah, mai siku kambin, lalu ngambi pulai baru ari indu nya utai ti udah dikena nyadika gadai. Tang Hirah nadai tetemuka indu nya.

²¹Iya nanya sekeda lelaki di Enaim. Ku iya, “Dini alai indu sundal ke ba tisi jalai tu suba?” “Nadai indu sundal udah kala bisi ditu.” ku sida nyaut.

²²Hirah pulai ngagai Judah, ku iya, “Aku nadai tetemuka iya. Bala lelaki ke dia madahka, nadai indu sundal udah bisi kala dia.”

²³Ku Judah, “Awakka iya nyimpan utai nya, enggai ke orang ketawaka kitai. Aku amat nguji mayar iya, tang nuan nadai tetemuka iya.”

²⁴Kira tiga bulan udah bekau nya, orang bisi madahka ngagai Judah munyi tu: “Menantu nuan, Tamar, nyau ngulah diri baka indu sundal, lalu iya diatu ngandung.” Judah lalu bejaku, “Bai iya ke luar, lalu tunu iya datai ke iya mati.”

²⁵Lebuh Tamar benung dibai ke luar, iya lalu ngasuh orang madahka mentua lelaki iya, “Aku ngandung laban orang ke bempu utai tu. Peda utai tu, lalu giga sapa orang ke bempu utai tu, tinchin ti kena ngechop, enggau tali iya, enggau tungkat tu.”

²⁶Judah ngelala utai nya, lalu ku iya, “Iya nadai penyalah. Aku empu ti enda ngereja tanggungjawap aku ke iya. Aku patut udah ngasuh anak lelaki aku Selah jadi enggau iya.” Judah nadai agi beleman enggau iya udah bekau nya.

²⁷Lebuh Tamar nyau chukup bulan, iya ditemu bisi dua iku anak dalam kandung iya.

²⁸Lebuh iya benung radai, siku ari anak mit nya mansutka siti jari. Indu bidan lalu nangkap jari nya, lalu nanchangka ubung mirah ba jari nya, ku iya, “Iya tu dulu ada.”

²⁹Tang anak mit nya narit jari iya ke dalam baru, lalu menyadi iya dulu agi ada. Udah nya ku indu bidan nya bejaku, “Nya chara nuan ada!” Nya alai anak mit nya diberi nama Peres.[114]

³⁰Udah nya, menyadi iya ada, mai ubung mirah ba jari iya, lalu iya diberi nama Serah.[115]