Read Iban Pemungkal 39 Bible Online

Pemungkal 39 - Iban bible

Pemungkal 39

¹Nyadi orang Ismail nya udah mai Josep ngagai menua Ejip, lalu nyual iya ngagai Potipar, siku pemesai raja, ti nyadi kepala orang ke nyaga istana.

² TUHAN bisi enggau Josep, lalu ngasuh iya mujur dalam semua utai. Iya diau dalam rumah tuan iya.

³Lebuh Potipar nemu TUHAN bisi enggau Josep, lalu ngasuh iya mujur dalam semua utai ti dikereja iya,

⁴Potipar gaga ati ke Josep, lalu ngasuh Josep ngemataka rumah iya, enggau semua reta tengkira iya.

⁵Belabuh ari nya, ketegal Josep, TUHAN merekatka ruang bilik orang Ejip nya, enggau semua utai ti dikemisi iya dalam rumah enggau ba umai iya.

⁶Potipar ngasuh Josep ngemataka semua utai iya. Nya alai iya enda ibuh ngiruh diri agi bekiraka utai, kelimpah ari pemakai iya empu. Nyadi Josep tu orang ke tegap sereta sigat gamal.

⁷Nyau ke lama, bini Potipar lalu bisi ati ke Josep, lalu nguji mai Josep tinduk.

⁸Tang Josep enggai. Ku iya bejaku enggau bini Potipar, “Laki nuan nadai agi ibuh ngiruh diri bekiraka sebarang utai dalam rumah tu, laban aku bisi ditu. Iya udah ngasuh aku ngemataka semua utai iya.

⁹Kuasa aku dalam rumah tu ngemesai kuasa iya empu, lalu iya nadai nagang aku ngena semua utai dalam rumah tu, kelimpah ari nuan empu. Nya alai, baka ni ku aku tau ngereja utai ti kamah tu, lalu bedosa ngelaban Allah Taala?”

¹⁰Nya alai, taja pen bini Potipar tiap hari ngumbuk Josep, tang Josep mengkang enggai.

¹¹Tang sekali, lebuh Josep tama ngagai rumah nya deka mansang gawa, bala orang gaji nadai dia.

¹²Bini Potipar lalu narit Josep ba baju panjai iya, ku iya, “Aram tinduk enggau aku.” Tang Josep ngerarika diri, lalu belanda ke luar. Tang baju panjai iya ditarit bini Potipar ari tubuh Josep lalu tinggal ba jari indu nya.

¹³Lebuh bini Potipar meda Josep udah ninggalka baju panjai iya, lalu belanda ke luar ari rumah nya,

¹⁴iya lalu ngangauka bala orang gaji. Ku iya, “Peda kita! Orang Hebrew ke dibai laki aku ngagai rumah tu, udah ngeleseka kitai. Iya tama ngagai bilik aku, lalu nguji masung aku, tang aku nyerauh enggau naka penginggar nyawa aku.

¹⁵Lebuh iya ninga aku nyerauh, iya belanda ke luar, ninggalka baju panjai iya ngimbai aku.”

¹⁶Bini Potipar nyimpan baju panjai Josep, nyentuk ngagai maya Potipar datai di rumah.

¹⁷Udah nya iya lalu nusui cherita nya ngagai laki iya. Ku iya, “Orang Hebrew ti nyadi ulun, ke dibai nuan kitu, tama ngagai bilik aku, lalu masung aku.

¹⁸Tang lebuh aku nyerauh, iya belanda ke luar, ninggalka baju panjai iya ngimbai aku.”

¹⁹Potipar lalu pedis ati.

²⁰Iya lalu ngasuh orang nangkap Josep, lalu nutup iya dalam rumah jil, ba endur alai bala orang jil ke ditutup raja. Dia meh endur alai Josep diau.

²¹ Tang TUHAN bisi enggau Josep lalu merekatka iya, datai ke kepala orang ke nyaga rumah jil nya nyau rinduka iya.

²²Orang nya ngasuh Josep nyadi tuai ke bala orang jil ti bukai, lalu ngasuh iya betanggungjawapka semua utai ti dikereja dalam rumah jil nya.

²³Kepala rumah jil nya enda agi ibuh ngemataka pengawa Josep, laban TUHAN bisi enggau Josep, lalu ngasuh iya mujur dalam semua utai ti dikereja iya.