Read Iban Pemungkal 4 Bible Online

Pemungkal 4 - Iban bible

Pemungkal 4

¹Udah nya Adam lalu besetubuh enggau bini iya. Bini iya ngandung, lalu ngadaka anak lelaki siku. Ku bini iya bejaku, “Aku ngadaka anak lelaki tu ari saup TUHAN.” Nya alai iya meri iya nama Kain.[27]

²Udah nya iya ngadaka siku agi anak lelaki benama Abel. Abel nyadi pengibun bedus, lalu Kain nyadi orang bumai.

³Nyau kelama udah bekau nya, Kain mai sekeda utai ti diketau iya, lalu meri utai nya nyadika piring ngagai TUHAN.

⁴ Udah nya Abel mai anak bungas ari raban bedus iya, nyayat jelu nya, lalu meri perengka tubuh ti pemadu manah nyadika piring. TUHAN rinduka Abel enggau piring iya,

⁵tang Iya enda rinduka Kain enggau piring iya. Kain ringat, lalu mua iya mengut-mengut.

⁶Udah nya TUHAN lalu bejaku enggau Kain, “Nama kebuah nuan ringat, lalu mengut-mengut?

⁷Enti nuan udah ngereja utai ti ngena, nuan tentu deka tuchum;[28] tang laban nuan udah ngereja utai ti jai, dosa diatu benung ngipa nuan ba mua pintu nuan. Iya keran deka merintah nuan, tang nuan enda tau enda ngalahka iya.”

⁸ Udah nya Kain bejaku enggau menyadi iya Abel, “Aram tua ke babas.” [29] Lebuh seduai iya di babas, Kain ngamuk lalu munuh menyadi iya.

⁹TUHAN lalu nanya Kain, “Dini alai menyadi nuan Abel?” Disaut Kain, “Nadai aku nemu. Kati aku pengibun menyadi aku?”

¹⁰ Udah nya TUHAN lalu bejaku, “Nama utai tu ti udah dikereja nuan? Darah menyadi nuan nyabak ngangauka Aku ari tanah.

¹¹Lalu diatu nuan kena sumpah ari tanah[30] ti udah merangapka nyawa nerima darah menyadi nuan ti neritik ari jari nuan.

¹²Lebuh nuan bumai ba tanah, tanah nya enda mansutka asil. Nuan deka bejalai segau-segau di dunya tu, nadai endur alai diau.”

¹³Ku Kain bejaku enggau TUHAN, “Ukum tu kelalu berat ke aku.

¹⁴Sehari tu Nuan muru aku ari menua tu enggau ari mua Nuan. Aku deka bejalai segau-segau di dunya tu, nadai endur alai diau, lalu barang sapa tetemuka aku, deka munuh aku.”

¹⁵Tang ku TUHAN nyaut, “Ukai baka nya. Enti orang munuh nuan, orang nya deka diukum tujuh kali lipat.” TUHAN lalu ngengkahka siti kelai ba Kain, enggai ke orang ke betemu enggau iya munuh iya.

¹⁶Kain lalu beserara ari TUHAN, lalu diau di menua ti dikumbai “Segau-segau,” muak ke timur ari menua Eden.

¹⁷Kain enggau bini iya bisi siku anak lelaki benama Enok. Udah nya Kain lalu nirika sebuah nengeri, lalu iya ngumbai nengeri nya Enok, ngangkatka nama anak iya.

¹⁸Enok bisi siku anak lelaki benama Irat. Irat nya apai Mehujael. Mehujael bisi siku anak lelaki benama Metusael. Metusael nya apai Lamek.

¹⁹Lamek bisi dua iku bini, Adah enggau Silah.

²⁰Adah ngadaka Jabal, ke nurunka orang ke betupika jelu, lalu diau dalam langkau kain.

²¹Menyadi iya ke benama Jubal, nurunka semua orang ke nebah belikan enggau kesuling.

²²Silah ngadaka Tubal Kain, ke begagaka semua macham pekekas kena gawa[31] ari temaga enggau ari besi. Menyadi indu Tubal Kain nya Naamah.

²³Ku Lamek bejaku enggau bini iya ke dua iku nya, “Adah enggau Silah, pendingka aku: Aku udah munuh siku lelaki, laban iya ngemakalka[32] aku.

²⁴Enti orang ke munuh Kain diukum tujuh kali lipat, orang ke munuh Lamek[33] deka diukum tujuh puluh tujuh kali lipat.”

²⁵Adam enggau bini iya bisi siku agi anak lelaki. Ku bini iya bejaku, “Allah Taala udah meri aku siku anak lelaki kena nganti Abel ti udah dibunuh Kain.” Nya alai Awa meri iya nama Set.[34]

²⁶Set bisi siku anak lelaki benama Enos. Nya meh maya mensia belabuh ngangauka nama TUHAN.