Read Iban Pemungkal 42 Bible Online

Pemungkal 42 - Iban bible

Pemungkal 42

¹Lebuh Jakop ninga menua Ejip bisi gandum, iya lalu bejaku enggau bala anak iya. Ku iya, “Nama kebuah kita dugau-dugau ngapa nadai ngereja utai?

² Aku ninga menua Ejip bisi gandum. Alai kita kin, lalu beli gandum ke kitai ngambika kitai enda mati keberuran.”

³Menyadi tiri Josep ke sepuluh iku lalu mupuk ngagai menua Ejip deka meli gandum.

⁴Tang Jakop enda nyagi menyadi tampung pala Josep ke benama Benjamin mupuk enggau sida, enggai ke Benjamin bebadi.

⁵Bala anak Jakop lalu bejalai sama enggau orang bukai, mansang meli gandum, laban menua Kanaan kena laban lapar pungkang.

⁶Josep, ti nyadi gabenor menua Ejip, nyual gandum ngagai orang ke datai ari serata dunya. Nya alai bala menyadi Josep datai, lalu nyungkurka diri ke tanah di mua iya.

⁷Lebuh Josep meda bala menyadi iya, iya ngelala sida, tang iya ngaga diri baka ke enda ngelala sida. Iya bejaku kasar lebuh iya nanya sida. Ku iya, “Datai ari ni kita tu?” “Kami tu datai ari menua Kanaan, deka meli pemakai,” ku sida nyaut.

⁸Josep ngelala bala menyadi iya, tang sida enda ngelala iya.

⁹ Iya teingatka mimpi diri pasal sida, lalu ku iya, “Kita tu pematau. Kita datai ditu laban kita keran deka nemu pengelemi menua kami.”

¹⁰“Ukai baka nya, tuan,” ku sida nyaut. “Kami ke ulun nuan tu datai laban kami deka meli pemakai.

¹¹Semua kami tu diri menyadi magang. Kami tu ukai pematau, tuan. Kami tu manah ati.”

¹²Ku Josep bejaku enggau sida, “Kita datai laban kita keran deka nemu pengelemi menua kami.”

¹³Ku sida, “Semua kami tu dua belas iku diri menyadi, tuan. Kami tu anak orang siku di menua Kanaan. Siku menyadi kami udah mati, lalu iya ke bunsu tinggal enggau apai kami.”

¹⁴Josep lalu bejaku ngagai sida, “Munyi ti ku aku, semua kita tu pematau magang.

¹⁵Aku deka ngabas pengamat jaku kita. Aku besumpah atas nama raja, kita enda tau angkat ari tu, enti menyadi bunsu kita enda datai ditu.

¹⁶Siku ari bala kita enda tau enda mupuk lalu ngambi iya. Kita ti bukai deka kena tan lalu ditutup dalam rumah jil ditu, nyentuk ngagai maya utai ti ku kita nya udah ditentuka amat magang. Enti enda, seagi-agi tuan raja idup, kita tu endang amat bala pematau.”

¹⁷Lebuh iya udah tembu bejaku, iya lalu nutup sida tiga hari dalam rumah jil.

¹⁸Ba hari ti ketiga, Josep bejaku enggau sida, “Aku tu orang ke nangika Allah Taala, lalu aku enda munuh kita enti kita ngereja utai ti diasuh aku.

¹⁹Kena aku ngabas pemetul ati kita, siku ari bala kita deka ditutup dalam rumah jil, alai kita ke udah kena tan. Kita ti bukai tau mupuk, lalu mai gandum ti udah dibeli kita, ngagai kita sebilik ke lapar.

²⁰Udah nya kita enda tau enda mai menyadi bunsu kita ngagai aku, kena nunjukka kita amat madahka utai ti bendar, ngambika aku enda munuh kita.” Sida besetujuka atur nya

²¹lalu bejaku enggau pangan diri, “Sigi amat. Diatu baru kita natka pemerinsa ketegal utai ti udah dikereja kita ngagai menyadi kitai. Kitai meda pemalat ati iya tusah lebuh iya minta kasih ari kitai, tang kitai enggai mendingka iya. Nya meh kebuah kita dituntung penusah tu diatu.”

²² Ku Reuben, “Aku nagang kita ngemediska nembiak nya, tang kita enggai mending. Diatu kitai nerima balas ke pemati iya.”

²³Josep meretika utai ti disebut sida, tang sida enda nemu nya, laban sida udah bejaku enggau iya ngena siku penyalin jaku.

²⁴Josep ninggalka sida lalu nyabak. Lebuh iya nyau ulih bejaku baru, iya lalu pulai baru ngagai sida, ngambi Simeon, lalu ngasuh orang nanchang iya di mua sida.

²⁵Josep lalu ngasuh orang ngisi ma bala menyadi iya enggau gandum, lalu mulaika duit sida ngagai guni sida siku-siku, lalu meri sida pemakai nyadika bekal sida di rantau jalai. Semua utai nya lalu dikereja magang.

²⁶Bala menyadi iya lalu manggaika gandum ti udah dibeli sida, ba keledai sida, lalu mupuk.

²⁷Lebuh siku ari bala sida muka guni iya, deka meri keledai iya makai, iya lalu tetemuka duit ba mua guni iya.

²⁸“Duit aku udah diberi pulai baru,” ku iya ngangau ngagai bala menyadi iya.”Tu duit aku dalam guni aku!” Sida lalu tusah ati, sereta takut, lalu nanya pangan diri, “Nama utai ti udah dikereja Allah Taala ngagai kitai?”

²⁹Lebuh sida datai ngagai Jakop apai sida di menua Kanaan, sida nusui ngagai iya semua utai ti udah nyadi ba sida.

³⁰“Gabenor menua Ejip bejaku kasar amat enggau kami, lalu ngumbai kami matau menua iya.

³¹Kami lalu nyaut iya, ‘Kami tu ukai pematau. Kami tu manah ati.

³²Kami dua belas iku diri menyadi, sama saum apai. Siku menyadi kami udah mati, lalu iya ke bunsu tinggal di menua Kanaan enggau apai kami.’

³³Ku orang nya nyaut, ‘Tu jalai aku deka nemu enti kita amat manah ati. Siku ari bala kita deka tinggal enggau aku. Kita ti bukai deka mupuk lalu mai gandum ngagai kita sebilik ke lapar.

³⁴Bai menyadi bunsu kita ngagai aku. Nya baru aku deka nemu enti kita tu amat ukai pematau, tang orang ke manah ati. Aku deka meri menyadi kita pulai baru ngagai kita, lalu kita tau diau lalu bedagang di menua tu.’ ”

³⁵Udah nya, lebuh sida nuang guni sida, genap iku sida lalu tetemuka kandi duit diri dalam guni sida siku-siku. Lebuh sida meda duit nya, sida enggau apai sida, Jakop, lalu takut.

³⁶Ku apai sida bejaku enggau sida, “Kati kita ngasuh aku ngelenyauka semua anak aku? Josep nadai agi. Simeon nadai agi. Lalu diatu kita deka mai Benjamin. Tulah meh aku tu!”

³⁷Reuben lalu bejaku enggau apai iya, “Enti aku enda mai Benjamin pulai baru ngagai nuan, nuan tau munuh anak lelaki aku ke dua iku. Awakka aku nyaga Benjamin, lalu mai iya pulai baru.”

³⁸Tang ku Jakop, “Enda! Anak aku enda tau mupuk enggau kita. Menyadi iya udah mati. Ka semina siku iya aja ti agi tinggal. Kada enda iya bebadi di rantau jalai. Aku nyau tuai, lalu enti kita ngenusahka ati aku baka nya, aku deka mati.”