Read Iban Pemungkal 43 Bible Online

Pemungkal 43 - Iban bible

Pemungkal 43

¹Lapar pungkang di menua Kanaan majak balat-sebalat,

²lalu lebuh gandum ti udah dibeli sida Jakop sebilik ari menua Ejip nyau abis, Jakop lalu bejaku enggau bala anak iya, “Alai kita kin ke baru lalu meli pemakai ke kitai.”

³Ku Judah bejaku enggau iya, “Orang nya nangkan kami enggau jaku, madahka kami enda tau betemu enggau iya, enti kami enda mai menyadi kami.

⁴Enti nuan deka ngasuh Benjamin enggau kami, nya baru kami deka mupuk lalu meli pemakai ke nuan.

⁵Enti nuan enda nyagi Benjamin enggau kami, kami enggai kin, laban orang nya madahka kami enda ulih betemu enggau iya, enti menyadi kami nya enda enggau kami.”

⁶Ku Jakop, “Nama kebuah kita ngenusahka aku ngemalat tu, madahka diri bisi menyadi bukai?”

⁷Ku sida nyaut, “Orang nya majak nanyaka pasal kami enggau pasal kitai sebilik, ‘Kati apai kita agi meruan? Kati kita bisi siku agi menyadi?’ Kami nadai chara bukai, tang nyaut tanya iya. Baka ni ku kami nemu iya deka ngasuh kami mai menyadi kami ngagai iya?”

⁸Ku Judah bejaku enggau apai iya, “Awakka nembiak nya enggau aku, ngambika kami mupuk diatu. Nya baru bala kitai enda mati keberuran.

⁹Aku ngadai nyawa aku empu, lalu nuan tau ngumbai aku betanggungjawapka iya. Enti aku enda mai iya pulai baru enggau likun ngagai nuan, aku meh betanggungjawapka penyalah nya.

¹⁰Enti kami enda betangguh ngelama nya, ngendua kali pen ulih meh kami udah kin.”

¹¹Apai sida lalu bejaku enggau sida, “Enti utai nya enda tau enda baka nya, bai meh utai ti pemadu manah ari umai kitai dalam ma kita, nyadika pemeri ke tuan gabenor nya, dambar, ai manyi, rempah, kachang, enggau buah almon.

¹²Bai mega dua kali mayuh agi duit, laban kita enda tau enda mulaika duit ti udah diberi pulai ngagai kita ba mua guni kita. Nyangka sida saru.

¹³Bai menyadi kita, lalu pulai kitu enggau naka pengelengkas.

¹⁴Awakka Allah Taala ti Pemadu Bekuasa ngasuh orang nya kasihka kita, ngambika iya meri Benjamin enggau menyadi kita pulai baru. Enti aku enda tau enda lenyau anak, nadai ku enggau meh.”

¹⁵Sida menyadi lalu mai pemeri, enggau dua kali mayuh agi duit, lalu mupuk ngagai menua Ejip, mai Benjamin. Sida lalu betemu enggau Josep.

¹⁶Lebuh Josep meda Benjamin datai enggau sida, iya lalu bejaku enggau kepala ulun ke ngemataka rumah iya, “Bai sida tu ngagai rumah aku. Sida deka merarau enggau aku tengah hari tu lagi. Sayat lalu bela siku jelu.”

¹⁷Ulun nya lalu ngereja nitihka asuh Josep, lalu mai sida menyadi ngagai rumah Josep.

¹⁸Lebuh sida benung dibai ngagai rumah nya, sida takut. Ku pikir sida, “Kitai dibai kitu ketegal duit ti udah dipulaika baru ngagai guni kitai lebuh kitai kitu terubah iya suba. Sida deka ngamuk kitai, ngambi keledai kitai, lalu ngaga kitai nyadi ulun iya.”

¹⁹Nya alai, lebuh sida datai ba mua pintu rumah nya, sida lalu bejaku enggau kepala ulun nya,

²⁰“Tuan, kami sekali udah datai ditu suba, deka meli pemakai.

²¹Lebuh kami ngetu bemalam di rantau jalai lebuh kami pulai, kami muka guni kami, lalu genap iku kami tetemuka duit ba mua guni kami. Semua duit kami bisi dia magang. Kami udah mai duit nya pulai baru ngagai kita.

²²Kami udah mega mai duit mayuh agi ari nya kena kami meli pemakai. Kami enda nemu sapa nyimpan duit nya dalam guni kami.”

²³Disaut ulun nya, “Anang irau. Anang takut. Allah Taala kita, Allah Taala apai kita, tentu udah nyimpan duit nya dalam guni kita. Aku sigi bisi udah nerima bayar ari kita.” Udah nya iya lalu mai Simeon ngagai sida.

²⁴Ulun nya lalu mai sida menyadi tama ngagai rumah Josep. Iya meri sida ai kena sida masu kaki, lalu meri keledai sida makai.

²⁵Sida lalu nyendiaka pemeri ti deka diberi sida ngagai Josep lebuh iya datai tengah hari nya, laban sida udah dipadahka sida deka merarau enggau iya.

²⁶Lebuh Josep datai di rumah, sida lalu mai pemeri sida ke dalam rumah, ngagai iya, lalu sida nyungkurka diri ke tanah di mua iya.

²⁷Iya nanyaka pengerai sida sebuat, lalu ku iya, “Kita bisi madahka pasal apai kita ke nyau tuai. Kati ku baka iya diatu? Kati iya agi meruan gerai nyamai?”

²⁸Disaut sida, “Ulun nuan, iya nya apai kami, agi meruan gerai nyamai.” Sida besugang lalu meremi di mua iya.

²⁹Lebuh Josep meda menyadi iya Benjamin, iya lalu bejaku, “Kati tu menyadi bunsu kita ke dipadahka kita ngagai aku? Allah Taala merekatka nuan, anak.”

³⁰Udah nya Josep lalu tekala nya ninggalka sida, laban ati iya balat rinduka menyadi iya. Iya nyau deka nyabak, nya alai iya tama ngagai bilik iya empu, lalu nyabak.

³¹Lebuh iya udah empungas mua diri, iya pansut, lalu enggau naka ulih nagang diri nyabak. Iya lalu ngasuh orang nyendiaka pemakai.

³²Josep makai ba mija siti, lalu bala menyadi iya ba mija siti. Orang Ejip ke makai dia, makai ba mija siti, laban sida ngumbai sida ngemaruhka pangkat diri enti sida begulai makai enggau orang Hebrew.

³³Sida menyadi lalu diasuh duduk, betunga mua enggau Josep, nitihka penuai umur sida, belabuh ari iya ke pemadu tuai ngagai iya ke bunsu. Lebuh sida meda chara sida diatur duduk, sida beperening ngagai pangan diri, alit ati.

³⁴Pemakai lalu disadung ngagai sida ari mija Josep, lalu Benjamin diberi lima kali mayuh agi pemakai ari semua sida bukai. Sida makai ngirup enggau Josep datai ke sida nyau mabuk.