Read Iban Pemungkal 44 Bible Online

Pemungkal 44 - Iban bible

Pemungkal 44

¹Josep lalu bejaku enggau kepala ulun ke ngemataka rumah iya. Ku iya, “Isi guni sida enggau pemakai, naka ti ulih bai sida, lalu engkahka duit sida ba mua guni sida siku-siku.

²Engkahka mangkuk pirak aku ba mua guni menyadi bunsu sida, sama enggau duit ti dikena iya meli gandum.” Ulun nya lalu ngereja nitihka asuh Josep.

³Tumu pagi hari siti, sida menyadi lalu diasuh mupuk, mai keledai sida.

⁴Lebuh sida baru apin jauh udah ngejang ari nengeri nya, Josep lalu bejaku enggau kepala ulun ke ngemataka rumah iya, “Alai nuan nitihka sida. Lebuh nuan betemu enggau sida, tanya sida munyi tu, ‘Nama kebuah kita malas pemanah ngena penyai?

⁵Nama kebuah kita ngenchuri mangkuk pirak tuan aku?[118] Mangkuk nya dikena iya ngirup, enggau nilit nasit. Besai amat penyalah kita tu!’ ”

⁶Lebuh ulun nya nyau udah tetitihka sida, iya lalu nyebut jaku nya ngagai sida.

⁷Ku sida nyaut iya, “Nama kebuah nuan bejaku munyi nya, tuan? Kami besumpah, kami nadai ngereja utai nya.

⁸Nuan nemu, kami udah mai pulai baru ngagai nuan, ari menua Kanaan, duit ti ditemu kami ba mua guni kami. Nya alai, nama kebuah kami ngenchuri pirak tauka emas ari rumah tuan nuan?

⁹Tuan, enti siku ari bala kami bisi ditemu nyimpan utai nya, iya deka diukum bunuh, lalu semua kami ke bukai deka nyadi ulun kita.”

¹⁰Ku ulun nya bejaku, “Aku besetuju. Tang semina orang ke ngenchuri mangkuk nya aja deka nyadi ulun aku. Kita ti bukai tau mupuk.”

¹¹Sida lalu beguai-guai ngulurka guni sida ke tanah, lalu genap iku sida bela muka guni diri.

¹²Ulun Josep lalu begigaka mangkuk nya enggau silik, belabuh ba menyadi sida ke pemadu tuai, nyentuk ngagai menyadi bunsu sida. Mangkuk nya lalu ditemu dalam guni Benjamin.

¹³Bala sida menyadi lalu nyarikka gari diri, manggaika guni sida ba keledai sida, lalu nikal ngagai nengeri nya.

¹⁴Lebuh Judah enggau bala menyadi iya datai ba rumah Josep, Josep agi mengkang dia. Sida meremi di mua iya,

¹⁵lalu ku Josep bejaku enggau sida, “Nama utai tu ti dikereja kita? Kati kita enda nemu, orang ke bepangkat baka aku tu, tau nilit utai ti dikereja kita?”

¹⁶Ku Judah nyaut, “Kami nadai nemu jalai bejaku agi, tuan. Kami sigi nadai jalai bejaku. Kami enda ulih ngumbai diri nadai penyalah, laban Allah Taala udah ngayanka penyalah kami. Diatu semua kami tu nyadi ulun nuan magang, ukai semina iya ke ditemu nyimpan mangkuk nuan.”

¹⁷Ku Josep bejaku, “Aku enggai ngereja baka nya! Semina iya ke nyimpan mangkuk nya aja deka nyadi ulun aku. Kita ti bukai tau pulai enggau selamat ngagai apai kita.”

¹⁸Judah lalu mansang ngagai Josep, lalu bejaku, “Tuan, awakka aku bejaku beterus-terang enggau nuan. Anang ringat ngagai aku, laban ba aku nuan tu baka reti raja.

¹⁹Tuan, nuan suba bisi nanya kami munyi tu, ‘Kati kita bisi apai, tauka menyadi bukai?’

²⁰Lalu ku kami nyaut, ‘Kami bisi apai, tang iya nyau tuai. Lalu kami bisi siku agi menyadi ke diadaka lebuh apai kami nyau tuai. Menyadi nembiak nya udah mati, lalu ka semina siku iya aja ti agi idup ari anak indai iya. Lalu apai iya balat rinduka iya.’

²¹Tuan, nuan ngasuh kami mai iya kitu, ngambika nuan ulih meda iya,

²²lalu kami madahka nembiak nya enda ulih ninggalka apai iya. Enti iya ninggalka apai iya, apai iya deka mati.

²³Udah nya nuan nyebut, ‘Kita enda tau agi betemu enggau aku enti menyadi bunsu kita enda datai enggau kita.’

²⁴“Lebuh kami pulai baru ngagai apai kami, kami madahka utai ti disebut nuan.

²⁵Udah nya apai kami lalu ngasuh kami pulai kitu ke baru, meli pemakai.

²⁶Ku kami nyaut, ‘Kami enda tau kin. Kami enda tau betemu enggau orang nya enti menyadi bunsu kami enda enggau kami. Kami semina tau kin, enti menyadi bunsu kami mupuk enggau kami.’

²⁷Ku apai kami bejaku, ‘Kita nemu, bini aku Rachel semina ngadaka dua iku anak.

²⁸Siku ari seduai nya udah ninggalka aku. Iya tetap udah dipecharikka jelu babas, laban aku nadai agi kala meda iya sekumbang iya ti udah ninggalka aku.

²⁹Enti kita mai anak aku tu ari aku, lalu iya bebadi, ati aku deka balat tusah, lalu aku deka mati, laban aku nyau tuai.’

³⁰“Nya alai, tuan,” ku Judah nampung jaku iya, “enti aku pulai baru ngagai apai aku lalu apai aku meda nembiak nya nadai enggau aku, iya deka mati. Apai kami rapat amat enggau nembiak tu, lalu iya nyau kelalu tuai, lalu enti iya tusah ati, iya deka mati.

³²Nambahka nya, aku udah ngadai nyawa diri ngagai apai aku, ke nembiak tu. Aku madahka ngagai apai aku, enti aku enda mai nembiak tu pulai baru ngagai iya, aku empu deka betanggungjawapka penyalah nya seumur idup.

³³Nya alai, tuan, aku minta diri tinggal ditu nyadi ulun nuan, nganti nembiak tu. Awakka iya pulai enggau bala menyadi iya.

³⁴Baka ni ku aku tau pulai ngagai apai aku, enti nembiak tu enda pulai sama enggau aku? Aku enda tan meda apai aku merinsa laban penusah tu.”