Read Iban Pemungkal 46 Bible Online

Pemungkal 46 - Iban bible

Pemungkal 46

¹Jakop lalu nyikap semua reta tengkira iya, lalu mansang ngagai Beer-seba. Dia iya lalu ngenjuk piring ngagai Allah Taala apai iya Isak.

²Lalu ku Allah Taala bejaku ngagai iya dalam genera, “Jakop! Jakop!” “Tu aku,” ku iya nyaut.

³Lalu ku Allah Taala bejaku,”Aku tu Allah Taala, ke disembah apai nuan. Anang takut mansang ngagai menua Ejip, laban Aku deka ngaga peturun nuan nyadi bansa ti kering di menua nya.

⁴Aku deka bejalai enggau nuan ngagai menua Ejip, lalu Aku deka mai peturun nuan pulai baru ngagai menua tu. Josep bisi enggau nuan lebuh nuan mati ila.”

⁵Jakop lalu angkat ari Beer-seba. Bala anak iya lalu nepanka iya, bala anak sida, enggau bala bini sida dalam kerita ti udah dikirumka raja menua Ejip.

⁶ Sida mai jelu tupi sida, enggau reta tengkira ti udah ulih sida di menua Kanaan, lalu mupuk ngagai menua Ejip. Jakop mai semua peturun iya enggau iya, iya nya:

⁷bala anak iya, bala uchu lelaki iya, bala anak indu iya, enggau bala uchu indu iya.

⁸Baka tu ku raban sida Jakop sebilik ke mansang enggau iya ngagai menua Ejip: Reuben, anak tuai Jakop

⁹enggau bala anak Reuben: Hanok, Pallu, Hesron, enggau Karmi.

¹⁰Simeon enggau bala anak iya: Jemuel, Jamin, Ohat, Jachin, enggau Saul, ke diadaka siku indu orang Kanaan.

¹¹Lewi enggau bala anak iya: Gerson, Kohat, enggau Merari.

¹²Judah enggau bala anak iya: Selah, Peres, enggau Serah. (Anak lelaki Judah ti bukai, Er enggau Onan, udah mati di menua Kanaan.) Anak Peres nya Hesron enggau Hamul.

¹³Isakar enggau bala anak iya: Tola, Puah, Jasup, enggau Simron.

¹⁴Sebulun enggau bala anak iya: Seret, Elon enggau Jahleel.

¹⁵Tu meh bala anak Jakop ke diadaka Leah di menua Mesopotamia, kelimpah ari anak indu iya ke benama Dinah. Semua peturun Jakop ari Leah, tiga puluh tiga iku.

¹⁶Gat enggau bala anak iya: Sepon, Hagi, Suni, Esbon, Eri, Arot, enggau Areli.

¹⁷Aser enggau bala anak iya: Imnah, Isbah, Isbi, Beriah, enggau menyadi sida ke benama Serah. Anak lelaki Beriah nya Heber seduai Malkil.

¹⁸Sida enam belas iku tu peturun Jakop, ari Silpah, indu ke ulun ke diberi Laban ngagai anak indu iya Leah.

¹⁹Bini Jakop ke benama Rachel ngadaka dua iku anak: Josep seduai Benjamin.

²⁰ Josep bisi dua iku anak di menua Ejip, Manasi seduai Epraim, ke diadaka Asenat anak indu Potipera. Potipera nya siku imam di Heliopolis.

²¹Bala anak Benjamin: Bela, Beker, Asbel, Gera, Naaman, Ehi, Ros, Mupim, Hupim, enggau Art.

²²Sida empat belas iku tu peturun Jakop, ari Rachel.

²³Dan enggau anak iya Husim.

²⁴Naptali enggau bala anak iya: Jahseel, Guni, Jeser, enggau Silem.

²⁵Sida tujuh iku tu peturun Jakop ari Bilah, indu ke ulun ke diberi Laban ngagai anak indu iya Rachel.

²⁶Penyampau peturun Jakop ari tubuh iya empu ke pindah ngagai menua Ejip nya enam puluh enam iku, enda ngitung bini bala anak iya.

²⁷ Pemayuh sida Jakop sebilik di menua Ejip nya tujuh puluh iku, nyengkaum anak Josep dua iku ke diadaka di menua nya.

²⁸Jakop ngasuh Judah bejalai dulu minta Josep ngambat sida di Gosen. Lebuh sida datai dia,

²⁹Josep nepan kerita perang iya, lalu mansang ngagai Gosen, ngambat apai iya. Lebuh seduai iya betemu, Josep merap apai iya, lalu nyabak lama amat.

³⁰Ku Jakop bejaku enggau Josep, “Aku sedia deka mati, laban aku udah meda nuan, lalu nemu nuan agi idup.”

³¹Udah nya Josep lalu bejaku enggau sida menyadi iya, sereta enggau semua sida apai iya sebilik, “Aku deka mupuk lalu madahka ngagai raja, munyi tu, ‘Bala menyadi aku, enggau sida apai sebilik, ti udah diau di menua Kanaan suba, diatu udah datai ngagai aku.

³²Sida nya pengibun bedus, laban sida endang beridup nginang jelu tupi, lalu sida udah mai raban bedus, enggau raban jelu sapi sida, enggau semua reta tengkira sida.’

³³Lebuh raja mesanka kita, lalu nanyaka pengawa ti dikereja kita,

³⁴kita enda tau enda madahka diri endang orang ke nginang jelu tupi seumur idup, baka aki ini kita kelia. Nya baru iya deka ngasuh kita diau di menua Gosen.” Josep nyebut nya laban orang Ejip keji begulai enggau orang ke pengibun bedus.