Read Iban Pemungkal 49 Bible Online

Pemungkal 49 - Iban bible

Pemungkal 49

¹Jakop mesanka bala anak iya, lalu bejaku, “Begempuru ngelingi aku laban aku deka madahka ngagai kita utai ti deka nyadi ba kita jemah ila:

²“Begempuru ditu, lalu pendingka aku, kita anak Jakop. Dingaka apai kita Israel.

³“Reuben, anak tuai aku, nuan nyadika pengering aku Anak tuai aku, Anak ke pemadu sumbung sereta pemadu kering ari semua anak aku.

⁴Nuan tu baka ai bah ti deras, Tang nuan enda tentu diguna orang, Laban nuan udah tinduk enggau indu simpan aku Lalu enda bebasaka peninduk apai nuan.

⁵“Simeon seduai Lewi endang diri menyadi. Seduai iya ngena senyata bebunuhka orang.

⁶Aku enggai bepekat enggau seduai iya, Lalu aku enggai mega baum enggau seduai iya, laban seduai iya munuh orang ketegal seduai iya ringat. Lalu seduai iya merinsaka jelu sapi ti lelaki kena seduai iya ngelantangka diri.

⁷Awakka sumpah ninggang pengeringat seduai iya, laban pengeringat nya balat amat, Lalu awakka sumpah nya ninggang pemangah seduai iya, laban pemangah seduai iya kasar amat. Aku deka naburka seduai iya ngagai serata menua Israel. Aku deka ngachirka seduai iya ngagai semua orang Israel.

⁸Judah, menyadi nuan deka muji nuan. Nuan deka nyekal rekung munsuh nuan. Bala menyadi nuan deka meremi ngagai nuan.

⁹ Judah baka singa, Ti munuh utai ti deka diempa iya, lalu pulai baru ngagai lubang iya, Ngeliat lalu gali. Nadai orang berani ngachau iya.

¹⁰Judah deka megai tungkat ti diraja, Lalu peturun iya deka seruran merintah. Semua bansa deka mai chukai sida ngagai iya Lalu meremi di mua iya, laban sida ngasika iya.

¹¹Iya nanchangka keledai iya ti agi biak ngagai batang anggur, Ngagai randau ti pemadu manah. Iya masu gari iya ngena wain ti mirah baka darah.

¹²Mata iya nyau mirah laban iya ngirup wain, Ngeli iya burak laban iya ngirup ai tusu.[121]

¹³“Sebulun deka diau ba tebing tasik. Kapal deka sangkai ba tebing iya. Rampa menua iya nyentuk ngagai Sidon.

¹⁴“Isakar enda lebih ari keledai Ti gali unjur dalam kandang bedus.

¹⁵Tang iya meda menua nya manah alai belelak Lalu menua nya ngerinduka ati. Nya alai iya lalu ngenjingka belakang iya ngesan utai Lalu iya nyadi ulun ke dipejalka ngereja pengawa ti berat.

¹⁶“Dan deka merintah bansa iya empu, baka raban bansa orang Israel ti bukai.

¹⁷Dan nya ular ti ba tisi jalai raya, Ular ti bisa ba tisi jalai, Ti mantuk tumbit kuda, Ngambika orang ke nepan kuda nya labuh telentang kebelakang.

¹⁸“Aku nganti pengelepas ari Nuan, TUHAN.

¹⁹“Gat deka diserang bala perumpak, Tang iya deka mutar, lalu begagaika sida.

²⁰“Menua Aser deka mansutka pemakai ti manah. Iya deka mansutka pemakai ke raja.

²¹“Naptali nya rusa ti belanda enda ditanchang, Ti ngadaka anak ti manah gamal.[122]

²²“Josep nya baka keledai kampung ti bediri ngimbai mata ai, Anak keledai kampung ti ba serimbing bukit.[123]

²³Munsuh iya bebendar amat nyerang iya Lalu begagaika iya ngena panah enggau laja.

²⁴Tang panah iya mengkang enda beguyat, Lalu lengan iya kering[124] Ulih kuasa Allah Taala ti Pemadu Bekuasa ke disembah Jakop, Ulih Pengibun Domba, ke nyaga orang Israel.

²⁵Allah Taala ti disembah apai nuan deka nyaup nuan, Allah Taala ti Pemadu Bekuasa deka merekatka nuan Ngena ai ujan ti labuh ari langit Enggau ngena ai ti dalam ti di baruh tanah, Meri nuan mayuh jelu sapi enggau mayuh anak,

²⁶Berekat ti diberi apai kita kering agi ari berekat ti datai ari bukit ti meruan belama iya ari pengaya ti datai ari munggu ti meruan belama iya Awakka semua berekat nya meruan ba atas pala Josep, ba kening iya ti udah diseraraka ari bala menyadi iya.

²⁷“Benjamin nya baka ukui kampung ti mangah. Pagi lemai iya munuh lalu makai.”

²⁸Tu meh dua belas raban bansa orang Israel, lalu tu meh utai ti disebut apai sida, lebuh iya bejaku meri selamat tinggal ngagai siku-siku anak iya.

²⁹Udah nya Jakop lalu bejaku enggau bala anak lelaki iya munyi tu, “Aku nyau deka mati. Kuburka aku begulai enggau bala apai aku, dalam lubang gua ti ba padang ti udah diempu Epron, orang Iti,

³⁰ di Makpilah, tunga ke timur Mamre, di menua Kanaan. Abraham udah meli lubang gua enggau padang nya ari Epron, nyadika tanah pendam.

³¹ Nya meh endur alai Abraham nguburka bini iya, Sarah. Dia meh sida nguburka Isak enggau bini iya Rebekah. Lalu nya mega endur alai aku nguburka Leah.

³²Padang enggau lubang gua nya udah dibeli ari orang Iti. Dia meh alai kita deka nguburka aku.”

³³ Lebuh Jakop udah tembu meri semua atur ngagai bala anak iya, iya gali lalu ngapuska seput.