Read Iban Pemungkal 50 Bible Online

Pemungkal 50 - Iban bible

Pemungkal 50

¹Josep lalu ningkapka diri ba apai iya lalu merap iya, nyabak sereta nyium mua iya.

²Udah nya Josep lalu ngasuh orang ngintu bangkai apai iya ngambika iya enda but.

³Pengawa nya dikereja dalam pengelama empat puluh hari. Tu endang pengelama orang nyendiaka tubuh orang ke mati ngambika bangkai nya enda but. Orang Ejip lalu ngulitka iya tujuh puluh hari.

⁴Lebuh maya ngulit udah tembu, Josep lalu bejaku enggau bala pemesai raja, “Aku minta kita mai pesan tu ngagai raja:

⁵ ‘Lebuh apai aku baru deka ngapuska seput, iya ngasuh aku besemaya nguburka iya ba lubang kubur ti udah disediaka iya di menua Kanaan. Nya alai, awakka aku mupuk lalu nguburka apai aku. Udah nya aku deka pulai kitu baru.’ ”

⁶Disaut raja, “Mupuk meh nuan, lalu kuburka apai nuan, munyi ti udah disemaya nuan enggau iya.”

⁷Nya alai Josep mupuk, deka nguburka apai iya. Semua bala pemesai raja, orang ke tinggi pangkat dalam opis raja, enggau semua bala orang ke tampak nama di menua Ejip, mupuk magang enggau Josep.

⁸Sida sebilik, bala menyadi iya, enggau bala sida ke ari ruang bilik apai iya, semua mupuk magang enggau iya. Ka semina sida ke agi mit, enggau jelu bedus, kambin, jelu sapi aja ti tinggal di menua Gosen.

⁹Orang ke nepan kerita perang, enggau orang ke nepan kuda, mega mupuk enggau iya. Mayuh amat bala sida.

¹⁰Lebuh sida datai ba endur alai nungku gandum di Atat, muak ke timur Sungai Jordan, sida ngulitka Jakop dia tujuh hari.

¹¹Lebuh orang Kanaan meda sida ngulit di Atat, sida lalu bejaku, “Bebendar amat orang Ejip ngulit!” Nya kebuah endur nya dikumbai Abel Misraim.[125]

¹²Nya alai bala anak Jakop ngereja utai nitihka pesan iya.

¹³ Sida mai bangkai iya ngagai menua Kanaan, lalu nguburka iya dalam lubang gua di Makpilah, tunga ke timur Mamre, ba tanah ti udah dibeli Abraham ari Epron, orang Iti, nyadika tanah pendam.

¹⁴Lebuh Josep udah nguburka apai iya, iya pulai ngagai menua Ejip sama enggau bala menyadi iya, sereta enggau semua orang ke udah enggau iya nguburka apai iya.

¹⁵Udah bekau pemati apai sida, bala menyadi Josep lalu bejaku, “Kati enti Josep begedika kitai, lalu bekira deka malas kitai ti udah ngemediska iya?”

¹⁶Sida lalu ngirumka pesan ngagai Josep, “Sebedau apai kitai mati,

¹⁷iya ngasuh kami nyebut ngagai nuan munyi tu, ‘Ampun penyalah ti udah dikereja bala menyadi nuan ngagai nuan.’ Nya alai kami minta nuan ngampun penyalah ti udah dikereja kami ke nembiak Allah Taala ti disembah apai nuan.” Josep nyabak lebuh iya nerima pesan nya.

¹⁸Udah nya bala menyadi iya empu datai lalu meremi di mua iya, “Kami datai ditu laban kami deka nyerahka diri nyadi ulun nuan,” ku sida bejaku.

¹⁹Tang ku Josep bejaku enggau sida, “Anang takut. Aku enda nemu ngaga diri nyadi Allah Taala.

²⁰Kita ngiga akal ti jai kena kita ngelaban aku, tang Allah Taala udah mutarka utai nya nyadi utai ti manah, ngambika ngidupka nyawa orang mayuh, lalu orang mayuh agi mengkang idup diatu, ketegal utai nya udah nyadi.

²¹Nya alai, anang takut. Aku deka ngintu kita enggau bala anak kita.” Iya bejaku siru amat enggau sida, minta sida badu agi irau ati. Jaku iya negu ati sida.

²²Josep mengkang diau di menua Ejip begulai enggau raban ruang bilik apai iya. Umur iya seratus sepuluh taun lebuh iya mati.

²³Iya idup meda bala anak enggau bala uchu Epraim. Iya mega agi idup lebuh bala anak Makir, iya nya uchu Manasi, ada dalam ruang bilik iya.

²⁴Ku iya bejaku enggau bala menyadi iya, “Aku diatu nyau deka mati, tang Allah Taala tetap deka ngemataka kita, lalu mai kita pansut ari menua tu ngagai menua ti udah disemaya Iya ngena sumpah ngagai Abraham, Isak enggau Jakop.”

²⁵ Udah nya Josep lalu ngasuh bala iya besumpah. Ku iya, “Kita enda tau enda besemaya deka mai bangkai aku enggau kita, lebuh Allah Taala nguluka kita ngagai menua nya.”

²⁶Josep mati umur 110 taun di menua Ejip. Sida lalu ngintu tubuh iya ngambika iya enda but, lalu nyimpan iya dalam sentubung.