Read Iban Pemungkal 6 Bible Online

Pemungkal 6 - Iban bible

Pemungkal 6

¹ Lebuh mensia udah diau ngachir di serata dunya, lalu ngadaka anak indu,

²sekeda anak Allah Taala[37] meda sida indu nya bajik gamal. Nya alai sida lalu jadi enggau indu ke dikerinduka sida.

³Udah nya TUHAN lalu bejaku, “Aku enda nyagi mensia idup[38] belama iya, laban sida endang tau mati. Belabuh ari diatu sida enda tau idup ngelui 120 taun.”

⁴ Lebuh maya nya kelia, enggau udah lepas nya, orang ke besai gamal bisi diau di dunya tu. Sida nya peturun indu mensia ti jadi enggau bala anak Allah Taala. Sida nya bujang berani ti tampak nama dulu kelia.

⁵ Lebuh TUHAN meda penyai semua orang di dunya tu, enggau runding sida ke seruran jai,

⁶Iya ngesal udah ngaga sida lalu ngengkahka sida di dunya tu. Iya balat amat ngesalka nya

⁷datai ke Iya nyau bejaku, “Aku deka munuh semua mensia ti udah digaga Aku, enggau jelu enggau burung, laban Aku ngesal udah ngaga sida.”

⁸Tang Noah ngelantangka ati TUHAN.

⁹ Tu jerita pasal Noah. Iya bisi tiga iku anak lelaki, Sem, Ham, enggau Japet. Noah nya orang ke nadai penyalah. Semina iya siku aja ke lurus lebuh rambau iya kelia. Iya diau begulai sejalai enggau Allah Taala,

¹¹tang semua orang bukai jai magang di mua Allah Taala, lalu penyai udah ngelekai ngagai semua endur.

¹²Allah Taala merening lalu meda penyai dunya, laban semua mensia bela ngereja penyai magang.

¹³Allah Taala lalu bejaku enggau Noah, “Aku deka ngeluska semua mensia. Aku deka ngerusak sida abis lengis, laban dunya tu penuh laban pengawa sida ke jai.

¹⁴Gaga sebuah bandung ke diri empu ngena kayu ramu ti manah. Sapat bandung nya ngagai mayuh bengkah bilik, lalu pelali iya ngena tar, ari dalam enggau ari luar.

¹⁵Pemanjai iya seratus tiga puluh tiga meter, buka iya dua puluh dua meter, lalu peninggi iya tiga belas meter.

¹⁶Gaga perabung[39] ke bandung nya, lalu gaga lubang penyenguk empat puluh empat sentimeter peninggi entara perabung enggau gandung bandung nya. Gaga tiga tingkat dalam bandung nya, lalu gaga siti pintu ba tisi bandung nya.

¹⁷Aku deka ngasuh ai bah ngampuhka dunya kena ngerusak semua utai ti idup. Semua utai di dunya tu deka mati magang,

¹⁸tang Aku deka ngaga siti sempekat enggau nuan. Nuan, bini nuan, sida anak nuan, enggau bini sida, enda tau enda tama ngagai bandung nya.

¹⁹Lebuh nuan tama ngagai bandung nya, bai siku lelaki enggau siku indu ari semua bansa jelu, enggau semua bansa burung, ngambika sida mengkang idup.

²¹Bai semua bansa pemakai ke kita empu, enggau ke sida.”

²² Noah lalu ngereja semua utai nitihka asuh Allah Taala.