Read Iban Pemungkal 7 Bible Online

Pemungkal 7 - Iban bible

Pemungkal 7

¹Ku TUHAN bejaku ngagai Noah, “Bai semua kita sebilik tama ngagai bandung nya. Aku nemu, ka semina nuan siku aja dalam dunya tu ti ngereja utai ti ngena.

²Bai enggau nuan tujuh pasang ari semua bansa jelu ti tuchi, tang semina sepasang aja ari semua jelu ti enda tuchi.

³Bai mega tujuh pasang ari semua bansa burung. Kereja nya, ngambika semua bansa jelu enggau burung deka mengkang idup lalu beranak betelesak baru di dunya tu.

⁴Tujuh hari da agi, Aku deka ngasuh hari ujan 40 hari, 40 malam, kena ngerusak semua utai ti idup, ti udah digaga Aku.”

⁵Noah lalu ngereja semua utai nitihka asuh TUHAN.

⁶Umur Noah 600 taun lebuh bah besai nya nyadi di dunya tu.

⁷ Iya enggau bini iya, enggau anak iya, enggau bini sida, tama ngagai bandung nya, ngerarika diri ari bah besai nya.

⁸Siku lelaki enggau siku indu ari semua bansa jelu enggau burung, nemuka sida nya tuchi tauka enda,

⁹tama ngagai bandung nya sama enggau Noah, munyi ti udah diasuh Allah Taala.

¹⁰Tujuh hari udah bekau nya, bah besai lalu nyadi.

¹¹ Lebuh umur Noah 600 taun, kena hari ti ketujuh belas dalam bulan ti kedua, semua lubang ai ti di baruh tanah lalu pambus tebuka, lalu semua pintu ai ti di langit tebuka magang.

¹²Hari lalu enda ngetu-ngetu ujan 40 hari, 40 malam.

¹³Ba hari nya Noah enggau bini iya tama ngagai bandung, sama enggau anak seduai iya ke tiga iku, Sem, Ham enggau Japet, enggau bini sida.

¹⁴Semua bansa jelu, jelu tupi enggau jelu babas, ti besai enggau ti mit, enggau semua bansa burung sama tama enggau sida.

¹⁵Siku lelaki enggau siku indu ari genap bengkah bansa utai ti idup, tama ngagai bandung nya sama enggau Noah,

¹⁶nitihka asuh Allah Taala. Udah nya TUHAN lalu nikupka pintu bandung nya ari belakang Noah.

¹⁷Hari lalu enda ngetu-ngetu ujan 40 hari, datai ke ai nya nyau chukup alai bandung nya melepung.

¹⁸Ai mansang dalam-sedalam, lalu bandung nya melepung.

¹⁹Ai nya dalam amat, datai ke iya nyau ngampuhka semua bukit ti tinggi.

²⁰Ai nya majak dalam-sedalam datai ke penalam iya nyau kira tujuh meter ngampuhka tuchung bukit.

²¹Semua utai ti idup di dunya tu mati magang, nyengkaum semua burung, semua jelu enggau semua mensia.

²²Semua utai ti enseput di dunya tu, mati magang.

²³TUHAN ngerusak semua utai ti idup di dunya tu: mensia, jelu, enggau burung. Ka semina Noah, enggau semua orang ke sama enggau iya dalam bandung nya aja agi idup.

²⁴Ai nya mengkang enda surut dalam pengelama 150 hari.