Read Iban Pemungkal 8 Bible Online

Pemungkal 8 - Iban bible

Pemungkal 8

¹Tang Allah Taala ingatka Noah enggau semua jelu ti sama enggau iya dalam bandung nya. Iya lalu ngasuh ribut bepuput, lalu ai bah nya mupuk surut.

²Lubang ai ti di baruh tanah, enggau pintu ai ti di langit ditutup. Ujan lalu teduh,

³lalu ai bah nya majak surut-sesurut dalam pengelama 150 hari.

⁴Ba hari ti ketujuh belas dalam bulan ti ketujuh, bandung nya lalu tepanggai ba gerinjing bukit Ararat.

⁵Ai majak surut, lalu kena satu hari bulan dalam bulan ti kesepuluh, tuchung bukit lalu belabuh ayan.

⁶Empat puluh hari udah bekau nya, Noah muka jenila

⁷lalu ngelepaska siku burung kak. Burung nya nadai pulai, tang majak terebai datai ke bah nya nyau udah abis surut.

⁸Udah nya Noah ngelepaska siku burung achang, kena nentuka enti ai nya amat udah surut.

⁹Tang laban ai bah nya agi ngelamun semua tanah, burung achang nya nadai nemu endur alai inggap, lalu iya pulai baru ngagai bandung nya. Noah nyengkau lalu ngambi burung achang nya ke dalam.

¹⁰Noah nganti tujuh hari da agi udah bekau nya. Udah nya iya ngelepaska burung achang nya baru.

¹¹Burung achang nya pulai baru ngagai iya lemai nya, manggum daun kana. Nya baru Noah nemu ai bah nya nyau udah abis surut.

¹²Udah nya Iya nganti tujuh hari da agi, lalu ngelepaska burung achang nya baru. Sekali tu, burung achang nya nadai pulai.

¹³Lebuh umur Noah nyau manggai 601 taun, kena satu hari bulan ti kesatu, ai bah nya nadai agi. Noah lalu muka atap bandung. Iya malik kiba kanan, lalu meda tanah nyau udah mupuk rangkai.

¹⁴Kena dua puluh tujuh hari bulan ti kedua, semua tanah nyau udah rangkai magang.

¹⁵Allah Taala lalu bejaku ngagai Noah,

¹⁶“Pansut nuan enggau bini nuan, anak nuan enggau bini sida ari bandung tu.

¹⁷Bai pansut magang semua burung enggau semua jelu, ngambika sida beranak betelesak lalu ngachir ba sebelah dunya.”

¹⁸Noah lalu pansut ari bandung nya sama enggau bini iya, enggau anak iya sereta enggau bini sida.

¹⁹Semua jelu enggau semua burung pansut magang ari bandung nya, nitihka bansa sida empu.

²⁰Noah lalu ngaga siti alta ke TUHAN. Iya ngambi siku ari genap bengkah bansa jelu enggau burung ti tuchi, lalu nunu sida segala ba alta nya, nyadika piring.

²¹Bau piring nya ngerinduka ati TUHAN, lalu ku Iya bejaku dalam ati Diri, “Aku enggai agi nyumpah tanah ketegal mensia, laban Aku nemu, kenyau ari sida agi biak, runding sida endang jai. Aku enggai agi ngerusak semua utai ti idup, baka ke udah dikereja Aku sekali tu.

²²Seagi-agi dunya tu mengkang bisi, maya betanam, enggau maya ngetau endang mengkang bisi. Maya chelap, enggau maya angat endang bisi. Musin panas, musin chelap, siang enggau malam, endang enda nemu abis.”