Read Iban Pemungkal 9 Bible Online

Pemungkal 9 - Iban bible

Pemungkal 9

¹ Allah Taala lalu merekatka Noah enggau bala anak iya, ku Iya, “Beranak betelesak meh kita, lalu ngemenuhka dunya.

²Semua jelu, burung, enggau ikan deka takutka kita. Semua sida di baruh kuasa kita magang.

³Diatu kita tau makai sida, lalu kita tau mega makai utai ti tumbuh. Aku meri semua utai nya nyadika pemakai kita.

⁴ Tang kita enda tau makai dagin ti agi bedarah, laban darah ngundan seput.

⁵Aku deka meri ukum bunuh ngagai sebarang sapa munuh orang. Aku deka meri ukum bunuh ngagai jelu ti munuh mensia.

⁶ Barang sapa munuh orang deka dibunuh, laban mensia digaga neladan gamal Allah Taala.

⁷ “Beranak betelesak meh kita, lalu ngemenuhka dunya.”

⁸Ku Allah Taala bejaku ngagai Noah enggau bala anak iya,

⁹“Aku ngaga sempekat enggau nuan sereta enggau peturun nuan ti nangkanka nuan,

¹⁰sereta enggau semua utai ti idup - semua burung, enggau semua jelu - semua utai ti pansut ari bandung sama enggau nuan.

¹¹Ngena sempekat tu, Aku besemaya enda agi ngerusak dunya enggau semua utai ti idup di dunya, ngena ai bah.

¹²Kena Aku nanda sempekat ti meruan belama iya tu ti digaga Aku enggau nuan, sereta enggau semua utai ti idup,

¹³Aku ngengkahka anakraja ba remang nyadika kelai kena nandaka sempekat Aku enggau dunya.

¹⁴Genap kali Aku mungkur langit ngena mua hari, lalu anakraja pegari ba remang,

¹⁵Aku deka ingatka sempekat Aku enggau nuan, sereta enggau semua jelu: ai bah enda agi ngerusak semua utai ti idup di dunya tu.

¹⁶Lebuh anakraja nya ayan ba remang, Aku deka meda iya, lalu ingatka sempekat ti meruan belama iya tu entara Aku enggau semua utai ti idup di dunya tu.

¹⁷Nya meh kelai sempekat ti digaga Aku enggau semua utai ti idup di dunya tu.”

¹⁸Anak lelaki Noah ke pansut ari bandung nya Sem, Ham, enggau Japet. (Ham nya apai Kanaan.)

¹⁹Anak Noah ke tiga iku nya meh orang ke nurunka semua mensia di dunya tu.

²⁰Noah nya orang bumai. Iya nya orang ke terubah-rubah numbuhka kebun anggur.

²¹Lebuh iya udah ngirup wain, iya mabuk, nelanjaika diri lalu gali dalam langkau kain iya.

²²Lebuh Ham, iya nya apai Kanaan, meda apai iya telanjai, iya lalu pansut ke luar, lalu madahka menyadi iya ke dua iku.

²³Udah nya Sem seduai Japet lalu ngambi baju panjai siti, lalu megai baju panjai nya ari belakang seduai iya, ba bau seduai. Seduai iya lalu bejalai surut tama ngagai langkau kain nya, lalu mungkur apai sida, nguingka mua seduai iya kebukai ngambika seduai iya enda meda apai sida telanjai.

²⁴Lebuh Noah udah gerai mabuk, lalu nemu pasal utai ti udah dikereja anak bunsu iya ngagai iya,

²⁵iya lalu bejaku, “Tulah Kanaan! Iya deka nyadi ulun sida menyadi iya.

²⁶Puji meh TUHAN Allah Taala Sem! Kanaan deka nyadi ulun Sem!

²⁷Awakka Allah Taala nambahka pemesai menua Japet![40] Awakka peturun iya diau begulai enggau peturun Sem! Kanaan deka nyadi ulun Japet.”

²⁸Udah bekau bah besai nya, Noah idup 350 taun da agi.

²⁹Iya mati umur 950 taun.