Read Iban 2 Samuel 1 Bible Online

2 Samuel 1 - Iban bible

2 Samuel 1

¹Udah bekau pemati Saul, lebuh David pulai ari ti ngalahka orang Amalek, iya diau di Siklak dua hari.

²Hari siti siku lelaki datai ari kem sida Saul. Gari iya nyau charik lalu pala iya udah dikerabuka enggau amau. Lebuh iya datai di mua David, iya nyungkurka diri ke tanah, masa David.

³David lalu nanya iya, “Ari ni penatai nuan?” Orang nya lalu nyaut, “Aku udah rari ari kem orang Israel.”

⁴Lalu ku David bejaku ngagai iya, “Kati ku baka utai? Padahka ngagai aku.” Orang nya lalu nyaut, “Bala soldadu kami udah rari ari endur alai kami ke bamuk ngelaban munsuh. Mayuh amat bala kami mati. Saul enggau anak iya Jonatan mega mati.”

⁵David lalu nanya iya, “Baka ni ku nuan nemu Saul enggau Jonatan udah mati?”

⁶ Ku orang nya nyaut, “Nyadi aku bisi ba Bukit Gilboa, lalu aku tepedaka Saul ngenjingka diri bediri, bekering ba sangkuh iya, lalu kerita perang enggau bala soldadu munsuh ke nepan kuda ngelulung iya.

⁷Lebuh iya nguing kebelakang, iya lalu tepedaka aku. Iya ngangauka aku, lalu aku nyaut, ‘Tuan!’

⁸Lalu ku iya bejaku ngagai aku, ‘Sapa nuan?’ Aku lalu madahka diri bansa orang Amalek.

⁹Lalu ku iya bejaku ngagai aku, ‘Datai kitu, lalu bunuh aku. Aku balat bakal, tang lalu apin mati.’

¹⁰Nya alai aku lalu mansang ngagai iya, lalu munuh iya, laban aku nemu iya enda ulih idup, lebuh iya udah rebah. Udah nya aku lalu ngambi makota ari pala iya, enggau gelang ari lengan iya, lalu aku mai utai nya ngagai nuan, tuan.”

¹¹David muka lalu nyarikka gari diri; lalu semua bala iya mega nunda iya;

¹²lalu sida nyabak, ngulit, sereta bepasa nyentuk ngagai lemai hari nya ke Saul enggau Jonatan, enggau ke bala soldadu TUHAN enggau ke orang Israel, laban sida udah mati beperang.

¹³David lalu nanya nembiak ti udah mai berita nya ngagai iya, “Ari ni penatai nuan?” Nembiak nya lalu nyaut, “Aku diau ditu, tang aku bansa orang Amalek.”

¹⁴David lalu nanya iya, “Baka ni ku nuan enda takut munuh raja ti udah dipilih TUHAN?”

¹⁵David lalu ngangauka siku ari bala iya, lalu ku iya bejaku, “Bunuh iya!” Orang nya lalu mantap orang Amalek nya, balat amat ngemakalka iya.

¹⁶Lalu ku David bejaku ngagai orang Amalek nya, “Nuan empu betanggungjawapka pemati diri; laban mulut nuan empu udah besaksi ngelaban nuan, lebuh nuan madahka diri udah munuh raja ke dipilih TUHAN.”

¹⁷David lalu nyabakka Saul seduai Jonatan,

¹⁸ lalu iya ngasuh leka sabak nya diajar ngagai orang Judah. (Leka sabak nya bisi ditulis dalam Bup Jasar.) Ku iya:

¹⁹“Bala tuai kami udah mati ba sebelah munggu menua Israel! Soldadu kami ke pemadu berani udah rebah!

²⁰Anang nusui berita nya di Gat tauka ba jalai raya di Askelon. Anang ngasuh indu orang di menua Pilistin gaga. Anang nejuka anak indu orang bansa bukai rami gaga.

²¹“Awakka bukit Gilboa enda ditinggang ujan tauka ambun. Awakka tanah di menua nya nadai tumbuh utai! Laban terabai orang ke berani mengkang dia kena pechat. Terabai Saul enda agi dipugar ngena minyak.

²²Panah Jonatan munuh, pedang Saul enda kala mai pengasih, numbangka orang ke kering, munuh munsuh.

²³“Saul seduai Jonatan, orang ke badas sereta dikesayauka, idup begulai, mati begulai, laju agi ari menaul, kering agi ari singa.

²⁴“Indu orang Israel, ngulit meh kita ke Saul! Iya udah meri kita gari ti mirah-redam lalu ngias kita ngena batu ti berega enggau emas.

²⁵“Bala soldadu ti berani, udah rebah. Sida mati beperang. Jonatan garing-garing mati ba bukit.

²⁶“Aku nyabakka nuan, menyadi aku Jonatan. Naka meh pemalat aku sayauka nuan! Pengerindu nuan ke aku endang amat besai, lebih agi ari pengerindu sida ke indu.

²⁷“Bala soldadu ti berani, udah rebah, lalu senyata sida ditinggalka, nadai tau diguna agi.”