Read Iban 2 Samuel 13 Bible Online

2 Samuel 13 - Iban bible

2 Samuel 13

¹Nyadi anak lelaki David ke benama Absalom bisi siku menyadi dara ti bajik gamal. Nama iya Tamar. Nyadi Amnon, siku agi anak lelaki David, bisi ati ke Tamar.

²Amnon nyau sakit laban iya balat merampauka menyadi iya Tamar. Laban Tamar agi dara bungas, iya enda disagi betemu enggau lelaki.

³Tang Amnon bisi siku pangan ti pintar. Nama iya Jonadap anak Samah. Nyadi Samah nya menyadi lelaki David.

⁴Ku Jonadap bejaku enggau Amnon, “O anak raja, nama kebuah nuan merampau diau tiap pagi? Uji padahka ngagai aku.” Disaut Amnon, “Aku rinduka Tamar, menyadi indu Absalom, menyadi-tiri aku.”

⁵Ku Jonadap bejaku enggau iya, “Uji nuan gali ba peninduk nuan, lalu ngeluluka diri sakit. Lebuh apai nuan datai ngabas nuan, sebut ngagai iya, ‘Asuh menyadi aku Tamar datai kitu, nyapi aku makai. Aku minta iya nyendiaka pemakai ke aku ditu di mua aku, lalu nyapi aku.’ ”

⁶Amnon lalu ngeluluka diri sakit, lalu gali ba peninduk iya. Lebuh Raja David datai ngabas iya, Amnon lalu bejaku enggau iya, “Aku minta nuan ngasuh Tamar datai lalu ngaga dua tiga igi kek ditu di mua aku, lalu nyapi aku.”

⁷David lalu mesanka Tamar, ku iya, “Alai nuan ngagai rumah Amnon, lalu nyendiaka pemakai ke iya.”

⁸Tamar mansang, lalu nemu Amnon gali ba peninduk iya. Tamar bisi mai tepung. Iya nyendiaka tepung nya, lalu ngaga kek mimit, dipeda Amnon empu, lalu manggang kek nya.

⁹Udah nya iya nuang kek nya ari kali ke Amnon. Tang Amnon enggai makai kek nya. Ku iya, “Asuh semua orang pansut.” Semua orang lalu pansut.

¹⁰Udah nya iya lalu bejaku enggau Tamar, “Bai kek nya kitu ngagai peninduk aku, lalu sapi aku.” Tamar lalu mai kek nya ngagai Amnon.

¹¹Lebuh Tamar nyapika kek nya ngagai Amnon, Amnon lalu masung Tamar. Ku iya, “Aram gali enggau aku!”

¹²“Enggai aku,” ku Tamar. “Anang mejalka aku ngereja utai ti balat ngasuh malu baka tu! Utai tu kelalu jai!

¹³Baka ni ku aku ulih ngayanka mua diri ngagai orang mayuh? Lalu nuan empu deka dipechat semua orang Israel. Aku minta nuan bejaku enggau raja. Iya tentu deka nyerahka aku ngagai nuan.”

¹⁴Tang Amnon enggai mendingka Tamar. Lalu laban iya kering agi ari Tamar, iya ulih masung Tamar.

¹⁵Udah nya Amnon balat amat begedika Tamar. Iya begedika iya lebih agi ari iya ti udah rinduka iya sebedau nya. Ku Amnon bejaku enggau Tamar, “Pansut nuan ari tu!”

¹⁶Tang ku Tamar nyaut, “Aku enggai. Enti nuan ngasuh aku pansut baka tu, penyalah nya deka nyadi besai agi [24] ari utai ti baru udah dikereja nuan!” Tang Amnon enggai mendingka Tamar.

¹⁷Iya lalu ngangauka orang gaji iya, lalu bejaku, “Bai indu tu pansut ari tu! Buai iya ke luar, lalu kunchi pintu!”

¹⁸Orang gaji nya lalu muru Tamar pansut, lalu ngunchi pintu. Nyadi Tamar ngena baju panjai, ti panjai lengan, ti endang dikena anak dara raja lebuh maya nya kelia.

¹⁹Tamar ngerabu pala iya enggau amau, nyarikka baju panjai iya, mampul mua diri, mupuk, nyabak duie-duie.

²⁰Lebuh menyadi lelaki iya Absalom meda nya, iya lalu nanya, “Kati Amnon bisi udah ngachau nuan? Anang kelalu tusah ati. Iya pen menyadi nuan, nya alai anang besebutka utai tu ngagai orang.” Tamar lalu diau dalam rumah Absalom, tusah ati sereta seilu-ilu diau kediri.

²¹Lebuh raja ninga pasal utai ti udah nyadi, iya pedis ati.

²²Lalu Absalom mega balat amat begedika Amnon laban iya udah masung menyadi indu iya Tamar, lalu Absalom enggai agi bejaku enggau Amnon.

²³Dua taun udah bekau nya, Absalom ngasuh orang ngukur bedus iya di Baal-hasor, semak nengeri Epraim, lalu iya ngangauka semua anak lelaki raja ngabang ngagai pengawa nya.

²⁴Iya mansang ngagai Raja David. Ku iya, “Tuan Raja, aku deka ngasuh orang ngukur bulu bedus aku. Kati nuan enggau bala pemesai nuan ulih datai ngagai pengerami nya?”

²⁵Disaut raja, “Enda, anak, enggai ke nuan kiruh laban kami, enti semua kami datai magang.” Absalom lalu mujuk raja, tang raja enggai nurutka iya. Raja lalu ngasuh Absalom mupuk.

²⁶Tang ku Absalom, “Enti nuan empu enda, abis kurang iya, lakka menyadi aku Amnon datai.” Raja lalu nanya, “Nama kebuah alai iya enda tau enda datai?”

²⁷Tang Absalom balat amat mujuk raja, datai ke David nyau nejuka Amnon enggau bala anak lelaki iya ti bukai mupuk enggau Absalom. Absalom nyendiaka pengerami makai besai, baka ke nyendiaka pemakai raja [25]

²⁸lalu meri atur ngajar bala orang gaji iya: “Peda enggau manah. Lebuh Amnon udah mabuk, lalu lebuh aku ngasuh kita munuh iya, bunuh iya. Anang takut. Aku empu deka betanggungjawapka nya. Kita enda tau enda berani, lalu anang kakang ati!”

²⁹Nya alai bala orang gaji lalu bejalaika atur Absalom, lalu munuh Amnon. Bala anak lelaki David ti bukai lalu nepan keledai sida, lalu rari.

³⁰Lebuh sida benung di rantau jalai pulai ngagai rumah sida empu, orang lalu madahka ngagai David, “Absalom udah munuh semua anak lelaki nuan. Nadai siku sida agi idup!”

³¹Raja lalu bediri, nyarikka gari diri, lalu ngalika diri ba tanah. Bala orang gaji ke bisi enggau iya dia, mega nyarikka gari diri.

³²Tang ku Jonadap bejaku, “Tuan Raja, sida enda munuh semua anak lelaki nuan. Semina Amnon aja ke mati. Enti nuan meda ulah Absalom, nya baru nuan nemu iya endang udah mutuska runding deka ngereja nya kenyau ari maya Amnon ke masung menyadi iya Tamar.

³³Nya alai anang arapka berita ti madahka semua anak lelaki nuan udah dibunuh magang.”

³⁴Lebuh maya nya Absalom endang udah rari. Siku soldadu ke jaga tepedaka bala orang nurun bukit nengah jalai raya ari Horonaim.[26] Iya mansang ngagai raja, lalu madahka utai ti dipeda iya.[27]

³⁵Ku Jonadap bejaku enggau David, “Nyin bala anak lelaki nuan datai, munyi ti dipadahka aku ngagai nuan.”

³⁶Lebuh iya baru udah nyebut nya, bala anak lelaki David pen datai. Sida, David enggau bala pemesai iya lalu belabuh nyabak duie-duie.

³⁷ Absalom rari ngagai Talami anak Amihut, raja ke merintah di Gesur, lalu diau dia tiga taun. David lama amat ngulitka anak iya Amnon.

³⁹Tang lebuh iya enda agi kelalu tusah ati ke Amnon, iya lalu lelengauka anak iya Absalom.