Read Iban 2 Samuel 14 Bible Online

2 Samuel 14 - Iban bible

2 Samuel 14

¹Joap nemu Raja David endang balat lelengauka Absalom.

²Nya alai iya ngasuh siku seruan mansang ngagai Tekoa, ngambi siku indu ke pintar, ti diau di Tekoa. Lebuh indu nya datai, Joap lalu bejaku enggau iya, “Aku ngasuh nuan ngeluluka diri ngulit. Rasukka pekayan ulit nuan, lalu anang nyugu buk nuan. Keluluka diri baka ke lama udah ngulit.

³Udah nya, mansang nuan ngagai raja, lalu sebut ngagai iya utai ti diasuh aku sebut nuan.” Udah nya Joap lalu madahka utai ti patut disebut iya.

⁴Indu nya lalu betemu enggau raja, nyungkurka diri ke tanah masa raja. Lalu ku iya, “Tulung aku, Tuan Raja!”

⁵“Nama penusah nuan?” ku raja nanya iya. “Aku tu indu balu ke seranta, tuan,” ku iya nyaut. “Laki aku udah mati.

⁶Aku bisi dua iku anak lelaki. Nyadi sekali seduai iya belaya di umai. Orang nadai nyeraraka seduai iya, lalu siku ari seduai iya tebunuhka menyadi iya.

⁷Nyadi diatu, tuan, semua kaban belayan aku nyau ngelaban aku magang, lalu sida ngasuh aku nyerahka anak aku ngagai sida, ngambika sida ulih munuh iya laban iya udah munuh menyadi iya. Enti aku nyerahka iya ngagai sida, aku nadai agi anak. Anak aku nya ke dikarapka aku. Enti sida munuh iya, laki aku nadai purih.”

⁸“Pulai meh nuan,” ku raja nyaut. “Aku deka ngatur pekara nya.”

⁹“Tuan Raja,” ku indu nya bejaku, “Kami sebilik deka betanggungjawapka sebarang utai ti dikereja nuan. Nuan enggau ruang bilik raja sigi nadai penyalah.”

¹⁰Ku raja nyaut, “Enti orang bisi ngemba nuan, bai iya ngagai aku, ngambika iya enda ngachau nuan agi.”

¹¹Ku indu nya bejaku, “Tuan Raja, aku minta nuan besampi ngagai TUHAN Allah Taala nuan, ngambika kaban belayan aku enda bebalaska pemati anak aku, ngambika anak aku ti siku nya enda dibunuh sida.” Disaut David, “Aku besemaya, dalam nama TUHAN ti idup, nadai penusah deka ninggang anak nuan.”

¹²“Tuan Raja, awakka aku nyebut siti agi utai,” ku indu nya bejaku. “Sebut meh,” ku raja nyaut.

¹³Ku indu nya bejaku enggau raja, “Enti pia, nama kebuah nuan ngereja utai ti salah baka nya ngagai bala nembiak Allah Taala? Laban lebuh nuan meri pemutus penemu nya, Raja ngukum diri empu, laban nuan enda ngambi anak nuan pulai baru.

¹⁴Semua kitai enda tau enda mati. Kitai tu baka ai ti tesiuh ngagai tanah, ti enda ulih digumpul agi. Indah Allah Taala deh enda ngangkatka orang ke udah mati pulai idup baru, tang Tuan Raja patut nemu jalai mai orang ke udah dibuai ngagai menua bukai, pulai baru. [28]

¹⁵Nyadi aku datai laban aku deka nyebut tu ngagai Tuan Raja, laban jaku orang udah ngenakutka ati aku. Aku bejaku enggau Raja, nyangka ukur Raja deka ngereja utai ti dipinta aku.

¹⁶Laban Raja sigi deka mending, lalu ngelepaska aku ari jari orang ke nguji muai aku enggau anak aku ari menua ti diberi Allah Taala ngagai nembiak Iya.

¹⁷ Dalam pikir aku, jaku semaya nuan, Tuan Raja, deka ngasuh pengidup aku likun, laban nuan, Tuan Raja baka melikat Allah Taala, ulih ngelala bida entara utai ti manah enggau utai ti jai.[29] Awakka TUHAN Allah Taala nuan meruan enggau nuan!”

¹⁸Ku raja nyaut, “Aku deka nanyaka siti utai ngagai nuan, lalu nuan enda tau enda madahka utai ti bendar ngagai aku.” Indu nya lalu nyaut, “Tanyaka aja meh sebarang utai ti deka ditanyaka nuan, Tuan Raja.”

¹⁹Raja lalu nanya, “Kati Joap bisi udah ngasuh nuan ngereja utai tu?” Ku indu nya nyaut, “Aku besumpah atas nama semua utai ti kudus, Tuan Raja, aku nadai jalai nyeliahka tanya nuan nya.[30] Siku pemesai nuan ke benama Joap udah ngasuh aku ngereja tu, lalu madahka utai ti patut disebut aku.

²⁰Tang iya ngereja nya kena iya beluruska pekara tu. Tuan Raja empu endang bepenemu-dalam baka melikat Allah Taala, lalu nemu semua utai ti nyadi.”

²¹Udah bekau nya raja lalu bejaku enggau Joap, “Aku udah mutuska runding deka ngereja utai ti dipinta nuan. Mupuk meh nuan, lalu bai jang Absalom pulai kitu baru.”

²²Joap lalu nyungkurka diri di mua David, meri basa ngagai iya. Ku iya, “Awakka Allah Taala merekatka nuan, Tuan Raja! Diatu baru aku nemu nuan rinduka aku, laban nuan udah besetujuka peminta aku.”

²³Udah nya iya angkat, lalu mansang ngagai Gesur, lalu mai Absalom pulai ngagai Jerusalem.

²⁴Tang raja meri atur, enda ngasuh Absalom diau dalam istana. “Aku enggai meda iya,” ku raja bejaku. Nya alai Absalom diau dalam rumah iya empu, lalu nadai betemu enggau raja.

²⁵Nadai orang di menua Israel ke balat agi dipuji ari Absalom ketegal penyigat gamal iya. Iya nadai penimpang kenyau ari punjung pala nyentuk ngagai ujung kaki.

²⁶Buk iya tebal, lalu iya nguntin buk iya sekali setaun lebuh buk nya kelalu panjai sereta berat. Pemerat buk iya kira dua kilogram, enti nitihka atur timbang ti dikena raja.

²⁷Absalom bisi tiga iku anak lelaki, enggau siku anak indu ke benama Tamar. Tamar nya bajik amat gamal.

²⁸Absalom diau dua taun di Jerusalem, tang iya nadai kala betemu enggau raja.

²⁹Udah nya iya mesanka Joap laban iya deka ngasuh Joap nyadika pengari iya betemu enggau raja. Tang Joap enggai betemu enggau Absalom. Absalom mesanka iya baru, tang Joap mengkang enggai betemu enggau iya.

³⁰Absalom lalu bejaku enggau bala orang gaji iya, “Tanah Joap ngimbai tanah aku, lalu iya bisi barli tumbuh dia. Alai kita nunu barli nya.” Sida mupuk, lalu nunu barli nya.

³¹Joap lalu mansang ngagai rumah Absalom, lalu nanya, “Nama kebuah bala nuan nunu umai aku?”

³²Disaut Absalom, “Laban nuan enggai betemu enggau aku lebuh aku mesanka nuan. Aku deka ngasuh nuan betemu enggau raja ngarika aku, lalu mantaika tanya aku tu ngagai iya: ‘Nama kebuah aku ninggalka Gesur lalu datai kitu? Manah agi aku mengkang diau din.’ ” Lalu ku Absalom nampung jaku iya, “Aku minta nuan nulung aku, ngambika aku ulih betemu enggau raja. Enti aku bisi penyalah, awakka iya munuh aku.”

³³Nya alai Joap mansang betemu enggau Raja David, lalu madahka utai ti udah disebut Absalom. Raja lalu mesanka Absalom. Absalom lalu betemu enggau raja, nyungkurka diri di mua iya. Raja lalu nyium iya.