Read Iban 2 Samuel 15 Bible Online

2 Samuel 15 - Iban bible

2 Samuel 15

¹Udah bekau nya, Absalom nyendiaka sebuah kerita perang enggau kuda ke iya empu, enggau lima puluh iku orang nyaga iya lebuh iya bejalai.

²Iya selalu angkat tumu pagi, lalu bediri semak jalai raya, ba pintu kuta nengeri. Genap kali orang datai dia mai pekara ti diasuh sida putarka raja, Absalom ngangauka orang nya, lalu nanyaka penatai iya. Lebuh orang nya udah madahka raban bansa diri,

³Absalom bejaku munyi tu ngagai orang nya, “Nuan nadai ngelanggar adat, tang pengari ari raja nadai ditu mendingka pekara nuan.”

⁴Lalu ku Absalom nampung jaku iya, “Naka meh pemanah enti sema aku nyadi hakim! Nya baru orang ke deka bechara, tauka minta atur, tau datai ngagai aku, lalu aku deka meri sida atur ti lurus.”

⁵Lebuh orang nya mansang lalu nyungkurka diri di mua Absalom, Absalom ngunjurka jari iya lalu merap sereta nyium orang nya.

⁶Absalom ngereja nya ngagai semua orang Israel ke mansang minta atur raja. Nya chara iya nguingka ati sida ngambika sida taluk ngagai iya.

⁷Lepas empat [31] nya Absalom lalu bejaku enggau Raja David, “Tuan, aku minta nuan ngemendarka aku mansang ngagai Hebron, laban aku deka ngamatka semaya aku enggau TUHAN.

⁸Lebuh aku diau di Gesur, di menua Siria suba, aku besemaya enggau TUHAN, enti Iya mai aku pulai baru ngagai Jerusalem, aku deka nyembah Iya di Hebron.” [32]

⁹“Mupuk meh nuan enggau selamat,” ku raja bejaku. Absalom lalu mupuk ngagai Hebron.

¹⁰Tang iya ngasuh bala seruan bejalai ngagai semua raban bansa orang Israel, mai jaku tu, “Lebuh kita ninga munyi terumpit, kita enda tau enda manjung, ‘Absalom udah nyadi raja di Hebron!’ ”

¹¹Dua ratus iku orang ari Jerusalem mupuk enggau Absalom; sida tu udah dipesanka Absalom, lalu sida tu mupuk nadai nemu ulu-ili.

¹²Lebuh iya benung ngenjuk piring, Absalom mega ngasuh orang mansang ngagai nengeri Gilo, madahka Ahitopel, siku ari orang ke nyadi penyanding penemu Raja David. Pengawa Absalom ti deka angkat ngelaban mansang kering-sekering, lalu bala Absalom mansang mayuh-semayuh.

¹³Siku seruan lalu madahka ngagai David, “Orang Israel besumpah madahka diri deka taluk ngagai Absalom.”

¹⁴David lalu bejaku enggau bala pemesai iya ke bisi enggau iya di Jerusalem, “Kitai enda tau enda mupuk diatu, enggai ke kitai enda ulih rari ari Absalom! Angkat jampat, enggai ke iya datai, ngalahka kitai, lalu munuh semua orang dalam nengeri tu!”

¹⁵“Au, Tuan Raja,” ku sida nyaut. “Kami sedia deka ngereja semua utai ti diasuh nuan.”

¹⁶Raja lalu mupuk, disempulang semua sida sebilik, kelimpah ari sepuluh iku indu simpan iya, ke ditinggalka iya, ngambika bisi ngintu istana.

¹⁷Lebuh raja enggau semua bala iya angkat ari nengeri nya, sida lalu ngetu ba rumah ti pengujung bendar.

¹⁸Semua bala pemesai iya bejalai mansa iya. Enam ratus iku bala soldadu ti udah nitihka iya ari Gat, mega mansa iya.

¹⁹Lalu ku raja bejaku enggau Itai, ti nyadi tuai sida, “Nama kebuah nuan mupuk enggau kami? Pulai nuan, lalu diau begulai enggau raja ke baru nya. Nuan orang bansa bukai, lalu nuan udah tasah ari menua diri.

²⁰Nuan apin lama udah diau ditu. Nya alai, nama kebuah aku nejuka nuan belelang enggau aku? Indah aku empu deh enda nemu tunga pejalai diri. Nya alai pulai nuan, lalu bai semua bala nuan. Awakka TUHAN manah sereta tetap ati ngagai nuan.”

²¹Tang ku Itai nyaut, “Tuan Raja, aku besumpah dalam nama TUHAN, aku deka seruran bejalai enggau nuan, ngagai sebarang endur nuan bejalai, taja pen aku nemu diri deka mati.”

²²“Manah meh nya!” ku David nyaut. “Mupuk meh nuan enggau kami!” Nya alai Itai mupuk enggau David, sama enggau bala iya, enggau semua sida sebilik.

²³Orang mayuh nyau bekeduie nyabak lebuh bala David mupuk. Raja lalu meraka sungai Kidron, dientudika bala iya. Sida lalu bejalai tunga ngagai menua puang.

²⁴Abiatar, Sadok enggau semua orang Lewi ngesan Peti Lampang Batu Adat TUHAN. Sida ngengkahka [33] Peti nya datai ke semua orang udah mansa pansut ari nengeri nya.

²⁵Udah nya raja lalu bejaku enggau Sadok, “San Peti Lampang Batu Adat nya pulai baru ngagai nengeri. Enti TUHAN rinduka aku, jemah ila ga Iya tau ngasuh aku pulai baru, ngambika aku ulih meda Peti Lampang Batu Adat nya baru enggau endur alai Peti nya diau.

²⁶Tang enti TUHAN enda rinduka aku, nadai ku enggau. Awakka Iya ngereja sebarang utai ti dikedekaka Iya ngagai aku.”

²⁷Lalu ku David nampung jaku iya ngagai Sadok, “Dinga nuan, [34] bai anak nuan Ahimas enggau Abiatar anak Jonatan pulai ngagai nengeri enggau selamat.

²⁸Aku deka nganti berita ari nuan ba pemeraka sungai di menua puang.”

²⁹Sadok enggau Abiatar lalu mai Peti Lampang Batu Adat nya pulai baru ngagai Jerusalem, lalu diau dia.

³⁰David lalu niki ngagai Bukit Kana, nyabak. Iya bejalai enda bekasut, lalu pala iya betudung. Semua orang ke bejalai enggau iya, mega betudung pala magang sereta nyabak.

³¹Lebuh orang madahka ngagai David Ahitopel udah ngalih ari Absalom, iya lalu besampi, “TUHAN, aku minta Nuan ngasuh semua jaku lalau ari Ahitopel mapap magang!”

³²Lebuh David datai ba tuchung bukit nya, ba siti endur alai besembiang, pangan ke dikarapka iya, Husai orang Arki, lalu betemu enggau iya. Gari iya charik, lalu pala iya dibalut amau.

³³Ku David bejaku enggau iya, “Enti nuan mupuk enggau aku, nuan semina ngiruh aku ngapa.

³⁴Tang enti nuan pulai ngagai nengeri, lalu madahka ngagai Absalom nuan deka taluk bekereja ke iya, baka nuan ti udah taluk bekereja ke Aku, nya baru nuan ulih nyakal semua jaku lalau ti diberi Ahitopel.

³⁵Imam Sadok enggau Imam Abiatar deka bisi dia enggau nuan. Nya alai padahka ngagai seduai iya semua utai ti didinga nuan dalam istana raja.

³⁶Anak seduai iya Ahimas enggau Jonatan bisi enggau seduai iya dia, lalu nuan tau ngasuh seduai iya mai ngagai aku semua utai ti didinga nuan.”

³⁷Nya alai, Husai, pangan David, lalu pulai baru ngagai Jerusalem, senutuk enggau maya Absalom datai ba nengeri nya.