Read Iban 2 Samuel 16 Bible Online

2 Samuel 16 - Iban bible

2 Samuel 16

¹ Lebuh David baru udah melunggang tuchung bukit nya, iya lalu betemu enggau Siba, orang gaji Mepiboset, ke mai enggau iya dua iku keledai ti ngundan dua ratus iti tuku roti, seratus iti gupung salai buah anggur, seratus iti gupung buah ti baru diketau, enggau siti kambut ti penuh laban wain.

²Raja David lalu nanya iya, “Nama guna nuan enggau semua utai nya?” Siba lalu nyaut, “Keledai tu alai sida Raja sebilik nepan; roti enggau buah nya ke bala Raja; lalu wain nya tau diirup sida lebuh sida nyau lelak di menua puang.”

³ “Dini alai Mepiboset, uchu tuan nuan Saul?” ku raja nanya iya. “Iya mengkang di Jerusalem,” ku Siba nyaut, “laban iya ngarapka orang Israel deka mulaika perintah aki iya Saul ngagai iya.”

⁴Raja lalu bejaku enggau Siba, “Awakka nuan bempu semua pesaka Mepiboset.” “Aku tu nembiak nuan, Tuan Raja,” ku Siba nyaut. “Awakka Tuan Raja selalu rinduka aku!”

⁵Lebuh Raja David datai di Bahurim, siku ari kaban belayan Saul, ke benama Simei anak Gera, datai betemu enggau Raja David, lalu nyumpah Raja David lebuh iya datai.

⁶Simei belabuh nikauka batu ngagai David enggau ngagai bala pemesai iya, taja pen David dikelingi bala iya enggau bala jejaga iya.

⁷Simei nyumpah iya, ku iya, “Angkat ari tu! Angkat nuan pemunuh! Nuan tu jai!

⁸Nuan udah ngerampas perintah Saul, lalu diatu TUHAN deka ngukum nuan, laban nuan udah munuh sida Saul sebilik. TUHAN udah meri perintah nya ngagai anak nuan Absalom, lalu nuan diatu deka dirusak, nuan pemunuh!”

⁹Abisai (indai iya Seruiah) lalu bejaku enggau raja, “Tuan Raja, nadai kebuah nejuka ukui tu nyumpah nuan. Awakka aku mansang ngagai iya lalu mumpung pala iya!”

¹⁰“Tu ukai pekara nuan,” ku raja bejaku enggau Abisai, sereta enggau menyadi Abisai ke benama Joap. “Enti iya nyumpah aku laban iya diasuh TUHAN, sapa bisi kuasa nanyaka kebuah iya nyumpah aku?”

¹¹Lalu ku David bejaku enggau Abisai enggau ngagai semua pemesai iya, “Indah anak aku empu deh nguji munuh aku. Nama kebuah kita tekenyit ati meda orang Benjamin tu? TUHAN udah ngasuh iya nyumpah, nya alai anang ngachau iya. Awakka iya nyumpah.

¹²Nyangka ukur TUHAN deka meda pemerinsa aku [35] lalu meri aku berekat, kena nganti sumpah iya.”

¹³David enggau bala iya lalu majak bejalai niti jalai nya. Simei mengkang bejalai nitihka sida, nengah serimbing bukit, nyumpah sereta betikauka batu enggau tanah ngagai sida lebuh iya bejalai.

¹⁴Raja enggau bala iya nyau lepi lebuh sida datai ba Sungai Jordan, [36] Sida lalu belelak dia.

¹⁵Absalom, enggau semua orang Israel ke enggau iya, lalu tama ngagai nengeri Jerusalem, lalu Ahitopel pen bisi mega enggau sida.

¹⁶Lebuh Husai, pangan ke dikarapka David, betemu enggau Absalom, iya lalu ngangau, “Gayu-guru meh Raja! Gayu-guru meh Raja!”

¹⁷Absalom lalu nanya iya, “Kini ke tunga penaluk nuan ke pangan nuan David? Nama kebuah nuan enda enggau iya?”

¹⁸Disaut Husai, “Baka ni ku aku ulih enggau iya? Aku nitihka orang ke udah dipilih TUHAN, ti udah dipilih bala orang tu, sereta dipilih semua orang Israel. Aku diau enggau nuan.

¹⁹Laban, sapa ke patut dititihka aku, enti ukai anak tuan aku? Baka aku ti udah nitihka apai nuan, baka nya mega aku deka nitihka nuan.”

²⁰Udah nya Absalom nguing ngagai Ahitopel, lalu bejaku, “Kala lebuh kitai agi ditu, nama utai ti patut dikereja kitai?”

²¹Ku Ahitopel nyaut, “Alai nuan beleman enggau bala indu simpan apai nuan, ti udah ditinggalka iya ngintu istana. Nya baru semua orang di menua Israel deka nemu apai nuan deka ngumbai nuan munsuh, lalu orang ke nitihka nuan deka berasai diperansang.”

²² Nya alai sida lalu nirika siti langkau kain ba perabung istana, lalu di mua orang mayuh Absalom tama ngagai langkau kain nya lalu beleman enggau bala indu simpan apai iya.

²³Semua jaku lalau ti diberi Ahitopel lebuh maya nya, diterima Absalom magang, indah-indah baka ke nerima jaku Allah Taala. David seduai Absalom sama nitihka jaku lalau ti diberi Ahitopel.