Read Iban 2 Samuel 17 Bible Online

2 Samuel 17 - Iban bible

2 Samuel 17

¹Apin lama udah bekau nya, Ahitopel bejaku enggau Absalom, “Awakka aku milih dua belas ribu iku orang, ngambika aku nitihka David malam tu.

²Aku deka nyerang iya lebuh iya agi lelak, sereta lemi semengat. Iya deka panik, lalu semua bala iya deka rari. Aku deka munuh semina raja siku aja,

³lalu udah nya mai semua bala iya ngagai nuan, indah-indah baka bini ke pulai baru ngagai laki. Nuan semina deka munuh siku orang aja.[37] Semua orang bukai deka likun magang.”

⁴Jaku lalau nya ngerinduka ati Absalom, enggau bala tuai orang Israel.

⁵Ku Absalom bejaku, “Pesanka Husai, awakka kitai ningaka penemu iya.”

⁶Lebuh Husai datai, Absalom lalu bejaku enggau iya, “Tu jaku lalau ti udah diberi Ahitopel ngagai kitai. Kati tau kitai nitihka jaku lalau nya? Enti enda, awakka nuan madahka utai ti patut dikereja kitai.”

⁷Husai lalu nyaut, “Jaku lalau ti diberi Ahitopel ngagai kita sekali tu, enda manah.

⁸Nuan empu nemu, apai nuan David, enggau semua bala iya endang orang ke tau serang magang, mangah baka indu beruang ti nyaga anak. Nambahka nya, apai nuan landik belaban, lalu iya enda tinduk begulai enggau bala soldadu.

⁹Diatu iya nyangka belalai dalam lubang gua, tauka ba endur bukai. Lebuh bala soldadu kitai rebah lebuh David terubah nyerang, barang sapa ninga nya, deka madahka bala nuan udah alah.

¹⁰Lebuh utai nya nyadi, indah orang ke pemadu berani baka singa, deh deka takut, laban semua orang dalam menua Israel nemu apai nuan endang soldadu ti kering, lalu bala iya endang orang ke kering belaban.

¹¹Jaku lalau aku baka tu. Gempuruka semua orang Israel ari Dan nyentuk ngagai Beer-seba, ngemayuh igi pasir ti ba tebing tasik, lalu nuan empu enda tau enda nguluka sida beperang.

¹²Kitai deka nemu David, ba sebarang endur alai iya diau, lalu nyerang iya lebuh iya enda ngadang. Iya enggau bala iya sigi enda tau idup.

¹³Enti iya nyurutka diri ngagai nengeri, semua bala kitai deka mai tali, lalu narit nengeri nya [38] ngambika nengeri nya runtuh. Sigi pen nadai meh batu tau ditejuka tinggal ba nengeri nya.”

¹⁴Ku Absalom enggau semua orang Israel bejaku, “Jaku lalau Husai manah agi ari enggi Ahitopel.” Laban TUHAN endang udah ngasuh sida enggai nitihka jaku lalau ti manah, ti diberi Ahitopel, ngambika TUHAN ngerusak Absalom.

¹⁵Udah nya Husai lalu madahka ngagai Imam Sadok seduai Abiatar jaku lalau ti udah diberi iya ngagai Absalom, enggau ngagai semua tuai orang Israel, enggau jaku lalau ti udah diberi Ahitopel.

¹⁶Lalu ku Husai, “Angkat jampat diatu! Bai pesan ngagai David. Iya enda tau bemalam ba pemeraka sungai di menua puang. Iya enda tau enda meraka Sungai Jordan diatu, ngambika iya enggau bala iya enda semua kena tangkap, lalu dibunuh.”

¹⁷Nyadi Abiatar anak Jonatan enggau Ahimas anak Sadok nganti ba mata ai di En-rogel, ba tisi nengeri Jerusalem, laban seduai iya enda berani dipeda orang tama ngagai nengeri nya. Siku indu endang selalu datai lalu madahka ngagai seduai iya utai ti nyadi. Udah nya baru seduai iya mupuk lalu madahka utai nya ngagai Raja David.

¹⁸Tang sekali, nembiak siku bisi meda seduai iya. Nembiak nya lalu madahka ngagai Absalom. Nya alai seduai iya lalu beguai-guai angkat ari endur nya lalu belalai dalam rumah orang siku di Bahurim. Orang nya bisi siti telaga semak rumah iya. Seduai iya lalu nurun ngagai telaga nya.

¹⁹Bini orang nya lalu mai tikai kena map mua telaga nya, nganchau tikai nya ba mua telaga, lalu naburka leka utai ba tikai nya, ngambika orang nadai nemu seduai iya bisi dia.

²⁰Bala pemesai Absalom lalu datai ngagai rumah nya, lalu nanya ngagai indu nya, “Dini alai Ahimas seduai Jonatan?” “Seduai iya udah meraka sungai,” ku iya nyaut. Bala orang nya lalu begigaka seduai iya, tang nadai tetemuka seduai iya. Nya alai sida lalu pulai baru ngagai Jerusalem.

²¹Lebuh sida udah mupuk, Ahimas seduai Jonatan lalu mansutka diri ari telaga nya, lalu mansang madahka berita ngagai Raja David. Seduai iya madahka ngagai Raja David pasal utai ti udah diperambu Ahitopel kena ngelaban iya, lalu ku seduai iya, “Kitai enda tau enda jampat meraka sungai nya.”

²²Nya alai David enggau bala iya lalu belabuh meraka Sungai Jordan, lalu ba urung rerak tawas, semua sida udah meraka magang.

²³Lebuh Ahitopel nemu jaku lalau iya enda diguna, iya lalu nyendiaka keledai iya, lalu pulai ngagai nengeri iya empu. Lebuh iya udah ngaduka semua pekara iya, iya lalu ngantung diri. Iya dikuburka ba kubur sida sebilik.

²⁴David endang udah datai ba nengeri Mahanaim lebuh orang Israel meraka Sungai Jordan. (

²⁵Absalom udah ngasuh Amasa nyadi tuai soldadu, nganti Joap. Amasa nya anak Jeter, orang bansa Ismail. [39] Indai iya Abigail anak Nahas, menyadi Seruiah, indai Joap.)

²⁶Absalom enggau bala iya lalu nirika kem di menua Giliat.

²⁷Lebuh David datai di Mahanaim, iya lalu diambat Sobi anak Nahas, ari nengeri Rabah di menua Amon, Machir anak Amil, ari Lo-debar, enggau Barsilai, ari Rogelim, di menua Giliat.

²⁸Sida mai mangkuk, periuk tanah, enggau peninduk. Sida mega mai pemakai: gandum, barli, tepung, kemping, kachang mirah, kachang mirah ti besai, ai manyi, engkiju, krim, enggau jelu bedus. Sida endang nemu David enggau bala iya lapar, aus, sereta lelak di menua puang.