Read Iban 2 Samuel 18 Bible Online

2 Samuel 18 - Iban bible

2 Samuel 18

¹Raja David lalu ngempuruka semua bala iya, magi sida ngagai seribu iku, enggau seratus iku dalam siti-siti raban, lalu ngatur bala pemesai nguluka sida.

²Udah nya, iya lalu ngasuh sida bejalai dalam tiga iti raban. Joap nguluka siti raban, menyadi iya Abisai nguluka siti raban, lalu Itai ke datai ari Gat nguluka siti raban. Ku raja bejaku enggau bala iya, “Aku empu deka bejalai sama enggau kita.”

³“Nuan enda tau bejalai enggau kami,” ku sida nyaut. “Munsuh enda beduli enti sema kami bukai rari, tauka enti setengah ari bala kami mati. Tang nyawa nuan lebih agi berega ari nyawa sepuluh ribu iku kami. Nya alai manah agi nuan diau di nengeri tu, lalu ngirumka tulung ngagai kami.”

⁴“Ni ti manah ku kita,” ku raja nyaut. Udah nya iya lalu bediri ngimbai pintu penama, lebuh bala iya bejalai pansut, seribu enggau seratus iku dalam siti-siti raban.

⁵Iya lalu meri atur ngagai Joap, Abisai enggau Itai: “Anang ngemediska jang Absalom.” Semua bala soldadu bela ninga raja meri atur nya ngagai bala pemesai iya.

⁶Bala soldadu David lalu bejalai ari nengeri nya, lalu betempuh enggau orang Israel ba Utan Epraim.

⁷Bala orang Israel alah laban bala David. Balat amat sida alah. Dua puluh ribu iku sida dibunuh sehari nya.

⁸Sida belaban di serata menua nya, lalu mayuh agi orang mati dalam utan, ari ke mati beperang.

⁹Absalom lalu ngenyit besatup enggau sekeda bala David. Nyadi Absalom nepan siku keledai, lalu lebuh iya ensuruk dan kayu oak ti besai, pala Absalom lalu tekait ba dan kayu nya. Keledai iya majak belanda, ninggalka Absalom kating-kating begantung.

¹⁰Siku ari bala David meda iya, lalu madahka ngagai Joap, “Tuan, aku bisi meda Absalom kating-kating ba sekayu batang oak!”

¹¹Disaut Joap, “Enti nuan bisi meda iya, nama kebuah nuan enda munuh iya? Aku deka meri ngagai nuan sepuluh singkap duit pirak, enggau siti belulang.”

¹²Tang ku orang nya nyaut, “Enti sema nuan meri aku seribu singkap duit pirak, enggai meh aku ngangkatka tunjuk ngelaban anak raja. Semua kitai bela ninga raja meri atur ngagai nuan, Abisai enggau Itai, ‘Anang ngemediska jang Absalom.’

¹³Tang enti aku enda ngasika raja, lalu munuh Absalom, raja deka nemu pasal nya, laban semua berita didingaka iya magang, lalu nuan tetap enggai ibuhka aku.”

¹⁴“Nadai guna aku masau jam bejaku enggau nuan tu,” ku Joap bejaku. Joap lalu mai tiga iti sangkuh, lalu ngerejangka sangkuh nya ngagai dada Absalom, ke endang agi idup, kating-kating ba kayu oak nya.

¹⁵Udah nya, sepuluh iku soldadu Joap lalu mansang ngagai Absalom, mantap lalu munuh iya.

¹⁶Joap lalu ngasuh orang nyepu terumpit, kena nesau orang badu agi belaban, lalu bala soldadu iya badu agi begagaika orang Israel.

¹⁷Sida ngambi bangkai Absalom, muai bangkai iya ngagai lubang kebung dalam utan nya, lalu nugungka batu kena ngelamun bangkai nya. Semua orang Israel ngerarika diri ngagai nengeri diri empu.

¹⁸Sekumbang iya agi idup, Absalom bisi udah ngaga siti tiang pengingat ke diri empu ba Lebak Raja, laban iya nadai anak lelaki nampung peturun iya. Nya alai iya meri nama iya empu ngagai tiang pengingat nya, lalu nyentuk ngagai sehari tu tiang pengingat nya mengkang dikumbai Tiang Pengingat Absalom.

¹⁹Udah nya Ahimas anak Sadok lalu bejaku enggau Joap, “Awakka aku belanda ngagai raja mai berita manah pasal TUHAN ti udah ngelepaska raja ari kuasa bala munsuh iya.”

²⁰“Anang,” ku Joap bejaku. “Sehari tu nuan enda mai berita ti manah. Hari bukai, nyangka nuan tau, tang ukai sehari tu, laban anak raja udah mati.”

²¹Udah nya Joap lalu bejaku enggau ulun iya ti bansa orang Etiopia, “Alai padahka ngagai raja utai ti udah dipeda nuan.” Ulun nya meremi, lalu belanda mupuk.

²²Tang Ahimas mengkang majakka penemu diri, “Aku enda bedulika utai ti deka nyadi. Awakka aku mega mai berita nya.” “Nama kebuah nuan deka ngereja nya, anak,” ku Joap nanya. “Nadai orang deka ngupah nuan ketegal nya.”

²³“Aku enda ngira nya,” ku Ahimas bejaku baru, “laban aku endang deka mupuk.” “Enti pia, mupuk meh nuan,” ku Joap bejaku. Nya alai Ahimas belanda niti jalai nengah Lebak Jordan. Enda lama udah nya, iya lalu ulih tegelihka ulun nya.

²⁴Nyadi David benung duduk ba endur ti lapang ba entara pintu-dalam enggau pintu-luar nengeri nya. Orang ke jaga niki ngagai puchuk dinding kuta, lalu bediri ba perabung pintu penama nya. Iya malik ke luar, lalu tepedaka orang siku belanda kediri-diri.

²⁵Iya lalu ngangau madahka ngagai raja, lalu ku raja, “Enti iya kediri, iya mai berita ti manah.” Orang ke belanda nya nyau majak datai semak.

²⁶Udah nya jejaga lalu tepedaka siku agi orang belanda kediri-diri, lalu iya ngangauka orang ke nyaga pintu penama, “Peda nyin! Siku agi orang belanda!” Raja lalu nyaut, “Iya mega mai berita ti manah.”

²⁷Ku jejaga nya, “Ari peda aku, orang ke belanda dulu nya baka gamal Ahimas.” “Orang nya manah,” ku raja bejaku.” Iya mai berita ti manah.”

²⁸Ahimas lalu ngangau meri tabi ngagai raja, nyungkurka diri ke tanah di mua raja, lalu bejaku, “Pujika TUHAN Allah Taala nuan, ti udah ngasuh nuan menang ngalahka orang ke ngelaban Tuan Raja!”

²⁹“Kati jang Absalom nadai apa-apa?” ku raja nanya. Ahimas lalu nyaut, “Tuan, lebuh pemesai nuan, Joap, ngasuh aku mupuk, aku bisi meda bala orang begau, tang aku enda nemu utai ti ngasuh sida begau.”

³⁰“Alai nuan bediri din,” ku raja bejaku enggau iya. Ahimas mansang kia, lalu bediri dia.

³¹Udah nya ulun ti bansa orang Etiopia pen datai, lalu bejaku enggau raja, “Aku mai berita ti manah ngagai Tuan Raja! Sehari tu TUHAN udah ngasuh nuan menang ngelaban semua orang ke ngelaban nuan!”

³²“Kati jang Absalom nadai apa-apa?” ku raja nanya. Ku ulun nya nyaut, “Naka meh pemanah enti sema utai ti udah nyadi ba Absalom, nyadi mega ba semua munsuh nuan, tuan, enggau ba semua orang ke angkat ngelaban nuan.”

³³Raja enda ulih natka ati diri ti kelalu balat tusah. Iya lalu niki ngagai bilik siti ba pintu penama nya, lalu nyabak. Ku iya, “O anak aku! Anak aku Absalom! O Absalom, anak aku! Manah agi aku mati nganti nuan, anak! O Absalom anak aku!”