Read Iban 2 Samuel 19 Bible Online

2 Samuel 19 - Iban bible

2 Samuel 19

¹Orang lalu madahka ngagai Joap pasal David ke nyabak sereta ngulitka Absalom.

²Nya alai sehari nya pengaga semua bala soldadu David ke menang lalu betukar nyadi ulit, laban sida ninga berita raja ke ngulitka anak iya.

³Sida bela enda bemunyi mulaika diri ngagai nengeri, baka bala soldadu ke malu ke diri rari ari munsuh.

⁴Raja mampul mua lalu nyabak duie-duie, “O anak aku! Anak aku Absalom! Absalom anak aku!”

⁵Joap lalu mansang ngagai rumah raja, lalu bejaku enggau raja, “Sehari tu nuan udah ngemaluka bala nuan ti udah ngidupka nyawa nuan, bala anak lelaki, bala anak indu nuan, bala bini nuan, enggau bala indu simpan nuan.

⁶Nuan nyakal orang ke rinduka nuan, lalu nyukung orang ke begedika nuan! Nuan udah terang ngayanka diri enda begunaka bala pemesai enggau bala soldadu nuan. Gaya peda aku, nuan gaga agi ati enti sema Absalom agi idup sehari tu, lalu semua kami bukai mati magang.

⁷Nya alai, manah nuan mansang ngagai bala nembiak nuan, ngambika sida enda irau ati. Aku besumpah dalam nama TUHAN, enti nuan enda, nadai siku sida deka mengkang enggau nuan pagila. Nya deka nyadi penusah ti pemadu besai ti kala diasaika nuan sepemanjai umur nuan.”

⁸Udah nya raja angkat, lalu duduk semak pintu kuta nengeri nya. Lebuh bala soldadu iya ninga iya bisi dia, sida lalu datai ngagai iya. Lebuh utai tu benung nyadi, orang Israel udah ngerarika diri ngagai rumah diri empu.

⁹Sida belabuh bekelikuh enggau pangan diri di serata menua nya. “Raja David udah ngelepaska kitai ari jari munsuh kitai,” ku sida madahka ngagai pangan diri. “Iya udah ngelepaska kitai ari jari orang Pilistin, tang diatu iya udah rari ari Absalom, lalu ninggalka menua tu.

¹⁰Kitai udah nata Absalom nyadi raja, tang iya udah mati beperang. Nya alai, nama kebuah orang nadai nguji ngambi Raja David pulai baru?”

¹¹Berita pasal jaku orang Israel bisi didinga Raja David. Nya alai, iya lalu ngasuh Imam Sadok seduai Abiatar betanya ngagai bala tuai orang Judah, “Nama kebuah kita dudi ari orang bukai nulung mai raja pulai baru ngagai istana iya?

¹²Kita tu kaban belayan aku, darah-getah aku. Nama kebuah kita ngenudika diri mai aku pulai baru?”

¹³David mega ngasuh sida nyebut jaku tu ngagai Amasa, “Nuan tu kaban belayan aku. Berengkah ari diatu aku ngasuh nuan nyadi tuai soldadu aku, nganti Joap. Awakka Allah Taala munuh aku, enti aku enda ngasuh nuan!”

¹⁴Jaku David disukung semua orang Judah, lalu sida ngirumka pesan ngagai raja, minta iya pulai sama enggau bala pemesai iya.

¹⁵Lebuh Raja David benung di rantau jalai mulaika diri, iya lalu diambat bala orang Judah ba Sungai Jordan. Sida nya udah datai ari Gilgal, deka ngiring iya meraka sungai nya.

¹⁶ Lebuh maya nya mega, Simei anak Gera, orang ari raban bansa Benjamin, lalu beguai-guai datai ari Bahurim mansang ngagai Sungai Jordan, deka ngambat Raja David.

¹⁷Iya mai enggau iya seribu iku orang ari raban bansa Benjamin. Lalu Siba, orang gaji ruang bilik Saul, mega datai mai lima belas iku anak lelaki iya, enggau dua puluh iku orang gaji. Sida datai ba Sungai Jordan dulu agi ari raja.

¹⁸Sida meraka sungai nya, deka ngiring bala raja meraka, sereta ngereja sebarang utai ti diasuh raja. Lebuh Raja David udah sedia deka meraka, Simei lalu nyungkurka diri semak kaki raja.

¹⁹Ku Simei, “Tuan Raja, aku minta nuan badu agi ingatka penyalah ti udah dikereja aku lebuh nuan angkat ari Jerusalem suba. Anang nyalah aku ketegal nya, tauka ingatka penyalah nya agi.

²⁰Tuan, aku nemu diri udah bedosa. Nya kebuah aku terubah orang ke datai ari raban bansa ti di utara ngambat Tuan Raja sehari tu.”

²¹Abisai anak Seruiah lalu bejaku, “Simei patut dibunuh, laban iya udah nyumpah orang ke udah dipilih TUHAN nyadi raja.”

²²Tang ku David bejaku enggau Abisai, enggau menyadi iya Joap, “Nadai orang minta penemu ari seduai. Kati seduai ngasuh aku ditinggang penusah? Aku diatu nyadi raja menua Israel, nya alai nadai orang Israel deka dibunuh sehari tu.”

²³Lalu ku iya bejaku enggau Simei, “Aku besemaya enggau nuan, nuan enda diukum bunuh.”

²⁴ Udah nya Mepiboset, uchu Saul, lalu nurun betemu enggau raja. Iya apin masu kaki, apin nguntin ragum, tauka masu gari diri sekumbang raja ti udah ninggalka Jerusalem, nyentuk ngagai maya iya pulai menang.

²⁵Lebuh Mepiboset datai ari [40] Jerusalem deka ngambat raja, raja lalu bejaku enggau iya, “Mepiboset, nuan nadai enggau aku. Nama kebuah?”

²⁶Ku Mepiboset nyaut, “Tuan Raja lebih nemu, aku enda ulih bejalai. Aku ngasuh orang gaji aku nyendiaka penuduk ba keledai aku, ngambika aku ulih bejalai enggau nuan, tang iya mupuk nadai mai aku,

²⁷lalu udah nya iya nyebut utai ti bula pasal aku di mua Tuan Raja, tang nuan baka melikat Allah Taala. Nya alai kereja aja meh utai ti ngena ba ati nuan.

²⁸Semua raban ruang bilik apai aku endang patut dibunuh magang, Tuan Raja, tang nuan udah meri aku hak makai ba mija nuan. Aku nadai hak minta utai ti lebih ari nya ngagai Tuan Raja.”

²⁹Ku raja nyaut, “Nuan enda ibuh bejaku agi. Aku udah mutuska runding. Seduai Siba deka sama bempu pesaka Saul.”

³⁰Tang ku Mepiboset nyaut, “Awakka Siba bempu reta tengkira nya, aku enda ibuh, laban nuan udah pulai enggau selamat. Nya aja chukup ke aku.”

³¹ Barsilai, ari Giliat, udah mega datai ari Rogelim, deka ngiring raja meraka Sungai Jordan.

³²Barsilai nyau tuai amat umur. Umur iya lapan puluh taun. Iya kaya bendar, lalu udah meri raja pemakai lebuh raja diau di Mahanaim.

³³Ku raja bejaku enggau iya, “Aram enggau aku ngagai Jerusalem, ngambika aku ngintu nuan.”

³⁴Tang ku Barsilai nyaut, “Aku nadai lama agi idup. Aku nadai kebuah bejalai enggau Tuan Raja ngagai Jerusalem?

³⁵Umur aku nyau lapan puluh taun. Nadai utai ulih merindang ati aku agi. Utai ti diempa enggau diirup nyau nadai asai agi ba nyawa aku, lalu aku pen enda ulih ninga nyawa orang ke belagu. Aku semina ngiruh Tuan Raja aja.

³⁶Aku enda patut bulih upah ti ngemesai nya. Nya alai aku deka bejalai enggau nuan ngilah Sungai Jordan tu mimit.

³⁷Udah nya, awakka aku pulai lalu mati semak kubur apai indai aku. Tu anak aku Kimham. Iya deka bekereja ke nuan. Bai iya enggau nuan, Tuan Raja, lalu kereja utai ke iya nitihka pematut dalam runding nuan.”

³⁸Raja lalu nyaut, “Aku deka mai iya enggau aku, lalu ngereja utai ti dikinginka nuan ba iya. Lalu aku deka ngereja ke nuan sebarang utai ti dipinta nuan.”

³⁹Udah nya David enggau semua bala iya lalu meraka Sungai Jordan. Iya nyium kuyu Barsilai, lalu merekatka iya. Barsilai lalu pulai.

⁴⁰Lebuh Raja David udah meraka Sungai Jordan, diiring semua orang Judah enggau setengah ari orang Israel, iya lalu mansang ngagai Gilgal, lalu Kimham mupuk sama enggau iya.

⁴¹Udah nya semua orang Israel lalu betemu enggau raja, lalu bejaku enggau iya, “Tuan Raja, nama kebuah bala orang Judah ke menyadi kami ngumbai diri bisi hak mai nuan, lalu ngiring nuan, kita sebilik, enggau bala nuan meraka Sungai Jordan?”

⁴²Orang Judah lalu nyaut, “Kami ngereja nya laban raja nya siku ari bala kami empu. Nya alai, nama kebuah utai tu ngasuh kita ringat? Iya nadai kala mayar rega pemakai ke kami, lalu iya pen enda mega kala meri kami utai.”

⁴³Ku orang Israel nyaut, “Kami tau ngambu Raja David sepuluh kali lipat lebih ari kita, taja pen iya siku ari bala kita. Nama kebuah kita ngemaruhka kami baka nya? Kita enda tau enda ingat: kami tu orang ke terubah-rubah bejaku deka mai raja pulai baru!” Tang orang Judah kasar agi jaku ari orang Israel.