Read Iban 2 Samuel 2 Bible Online

2 Samuel 2 - Iban bible

2 Samuel 2

¹Udah bekau nya, David lalu betanya ngagai TUHAN, “Kati tau aku mansang ngagai sebuah nengeri di menua Judah?” “Tau,” ku TUHAN nyaut. “Nengeri ni?” ku David nanya. “Hebron,” ku TUHAN madahka.

² Nya alai David mupuk ngagai Hebron, mai bini iya ke dua iku: Ahinoam ke asal ari Jesril, enggau Abigail, balu Nabal, ke asal ari Karmel.

³Iya mega mai bala orang ke enggau iya, sereta enggau ruang bilik sida, lalu ngasuh sida diau ngentapka diri di nengeri ti mit ngelingi Hebron.

⁴ Udah nya orang ari menua Judah mansang ngagai Hebron, lalu nata David nyadi raja menua Judah. Lebuh David ninga orang di Jabes ti di menua Giliat udah nguburka Saul,

⁵iya lalu ngasuh sekeda orang mansang ngagai nengeri nya mai pesan tu: “Awakka TUHAN merekatka kita, laban kita udah ngayanka diri taluk ngagai raja kita lalu nguburka iya.

⁶Nya alai, awakka TUHAN diatu nelap enggau kita sereta tetap ati ngagai kita. Aku empu deka mega manah enggau kita, ketegal utai ti udah dikereja kita.

⁷Kita enda tau enda kering sereta berani! Raja kita, Saul, udah mati lalu orang Judah udah nata aku nyadi raja sida.”

⁸Kepala soldadu Saul, Abner anak Ner enggau anak lelaki Saul ke benama Is-boset udah ngerarika diri, lalu meraka Sungai Jordan mansang ngagai Mahanaim.

⁹Dia Abner lalu nyiri Is-boset nyadi raja menua Giliat, Aser,[1] Jesril, Epraim, enggau Benjamin, enggau semua menua Israel.

¹⁰Umur Is-boset empat puluh taun lebuh iya dichiri nyadi raja menua Israel, lalu iya merintah dua taun. Tang raban bansa Judah taluk ngagai David,

¹¹lalu David megai perintah menua Judah di Hebron tujuh taun setengah.

¹²Abner enggau bala pemesai perintah Is-boset mansang ari Mahanaim ngagai nengeri Gibeon.

¹³Joap (indai iya Seruiah), enggau bala pemesai David ti bukai lalu betemu enggau sida ba telaga di Gibeon, alai sida ke duduk betunga mua enggau pangan diri bentaraka telaga nya.

¹⁴Ku Abner bejaku enggau Joap, “Awakka bala nembiak kitai ari sepiak-sepiak belaban di mua kitai.” “Barang ku jaku,” ku Joap nyaut.

¹⁵Nya alai dua belas iku lelaki ke ngarika Is-boset enggau raban bansa Benjamin, lalu ngelaban dua belas iku lelaki ari bala David.

¹⁶Siku-siku sida lalu mulaska pala pangan, lalu ngerejangka pedang ngagai rusuk pangan diri. Semua dua puluh empat iku sida rebah lalu mati magang. Nya alai endur di Gibeon nya dikumbai “Padang Mata Pedang.”[2]

¹⁷Udah nya sida lalu bamuk balat amat, lalu Abner enggau orang Israel alah laban bala David.

¹⁸Anak Seruiah ke tiga iku bela bisi dia magang: Joap, Abisai, enggau Asahel. Asahel ke belanda laju baka rusa

¹⁹lalu terus belanda nitihka Abner.

²⁰Abner malik kebelakang, lalu bejaku, “Kati nya nuan Asahel?” “Aku meh tu,” ku Asahel nyaut.

²¹“Badu agi ngagai aku!” ku Abner. “Alai nuan belanda ngagai siku ari bala soldadu lalu ambi utai ari iya.” Tang Asahel majak belanda ngagai Abner.

²²Abner lalu bejaku baru ngagai Asahel, “Badu agi ngagai aku! Nama kebuah nuan mejalka aku munuh nuan? Baka ni ku aku ulih ngayanka mua diri ngagai menyadi nuan Joap?”

²³Tang Asahel enggai badu begagaika Abner. Nya alai Abner ngerejangka sangkuh iya kebelakang ngagai perut Asahel, ngebuska tubuh Asahel. Asahel rebah lalu mati, lalu semua orang ngetu magang lebuh sida datai ba endur alai Asahel ke rebah.

²⁴Tang Joap enggau Abisai lalu belabuh begagaika Abner. Ba urung padam mata panas, seduai iya datai ba Bukit Amah, tunga ke timur Giah, ba jalai ti nuju ngagai menua puang di Gibeon.

²⁵Bala orang Benjamin begempuru ngelingi Abner baru, lalu nan ba tuchung bukit nya.

²⁶Abner lalu ngangauka Joap, “Kati kitai enda tau enda belaban belama iya? Kati nuan enda nemu, ba pengujung iya ila, kitai nadai bulih penguntung ari pengawa tu, tang semina ati ti pedis aja? Kami tu kaban belayan nuan. Ni pengelama baru nuan ngasuh bala nuan badu agi begagaika kami?”

²⁷Joap lalu nyaut, “Aku besumpah dalam nama Allah Taala ti idup, enti nuan enda bejaku tadi, bala aku tetap deka majak begagaika nuan nyentuk ngagai rerak tawas pagila.”

²⁸Udah nya Joap lalu nyepu terumpit, kena iya nagang bala iya begagaika orang Israel. Sida lalu badu agi belaban.

²⁹Abner enggau bala iya lalu bejalai nengah Lebak Jordan semalam-malam nya, lalu meraka Sungai Jordan, lalu lebuh sida udah bejalai sepagi hari siti, sida lalu datai baru di Mahanaim.

³⁰Lebuh Joap badu agi begagaika Abner, iya ngempuruka semua bala iya, lalu nemu semilan belas iku sida udah mati nambahka Asahel.

³¹Bala David udah munuh tiga ratus enam puluh iku bala Abner ari raban bansa Benjamin.

³²Joap enggau bala iya lalu mai bangkai Asahel, lalu nguburka iya ba lumbung sida sebilik di Betlehem. Udah nya sida bejalai semalam-malam nya, lalu datai baru di Hebron tumu pagi hari siti.