Read Iban 2 Samuel 20 Bible Online

2 Samuel 20 - Iban bible

2 Samuel 20

¹ Nyadi di Gilgal bisi orang siku ti nadai guna, ke benama Sheba anak Bikri, ari raban bansa Benjamin. Iya nyepu terumpit, lalu ngangau, “Bunuh David! Kami enggai nitihka iya! Orang Israel, aram kitai pulai!”

²Nya alai orang Israel ninggalka David, lalu nitihka Sheba. Tang orang Judah mengkang taluk sereta nitihka David kenyau ari Sungai Jordan nyentuk ngagai Jerusalem.

³ Lebuh David datai ba istana iya di Jerusalem, iya lalu ngambi sepuluh iku indu simpan iya ti udah ditinggalka iya ngintu istana, lalu ngasuh sida kena tan. Iya meri sida utai ti dipeguna sida, tang iya enda beleman enggau sida. Sida enda disagi ke luar seumur idup, tang diau baka indu ke balu.

⁴Ku raja bejaku enggau Amasa, “Tesau lelaki orang Judah, lalu bai sida ngagai aku lusa; nuan empu mega datai ditu lusa.”

⁵Amasa lalu mansang nesau sida, tang iya enda pulai nitihka maya ti udah diletak raja.

⁶Nya alai, raja lalu bejaku enggau Abisai, “Sheba deka ngenusahka kitai lebih ari Absalom. Bai bala aku, lalu titihka iya, enggai ke iya ngerampas nengeri ti bekuta, lalu rari ari kitai.”

⁷Nya alai bala Joap, bala soldadu ke nyaga istana, enggau semua bala soldadu ti bukai lalu angkat ari Jerusalem enggau Abisai, nitihka Sheba.

⁸Lebuh sida datai ba batu ti besai di Gibeon, Amasa betemu enggau sida. Nyadi Joap endang udah nangkin senyata, sedia deka bamuk. Pedang iya agi dalam sarang ba punggung iya. Lebuh iya mansang, pedang nya lalu labuh.

⁹Ku Joap bejaku enggau Amasa, “Nama berita, punggal?” Joap lalu nyapai ragum Amasa ngena jari kanan iya, deka nyium Amasa.

¹⁰Tang Amasa nadai meda pedang ti ba jari kiba Joap; Joap lalu ngerejang perut Amasa, lalu sengkilung perut iya merurut pansut ke tanah, lalu iya mati, enda ibuh ditandu. Udah nya Joap enggau menyadi iya Abisai lalu mupuk nitihka Sheba.

¹¹Siku orang ari bala Joap bediri semak bangkai Amasa, lalu ngangau, “Semua orang ke setanah enggau Joap, titihka Joap!”

¹²Nyadi bangkai Amasa garing-garing ba tengah jalai raya nya, dibalut darah. Lebuh orang siku ari bala Joap meda semua orang ngetu magang, iya lalu ngirit bangkai Amasa ari jalai raya ngagai padang, lalu mungkur iya ngena pua.

¹³Lebuh bangkai nya udah dipindahka ari jalai raya nya, semua orang lalu nitihka Joap begagaika Sheba.

¹⁴Nyadi Sheba bejalai nengah menua semua raban bansa orang Israel, lalu datai di nengeri Abel di Bet-maakah. Semua raban peturun Bikri [41] begempuru, lalu nitihka iya ngagai nengeri nya.

¹⁵Lebuh bala Joap ninga Sheba bisi di nengeri nya, sida mansang lalu ngelulung nengeri nya. Sida ngaga kuta tanah nyempil ngagai kuta nengeri nya. Lalu sida mega belabuh numbak tanah ari baruh dinding kuta nya, deka numbangka kuta nya.

¹⁶Nyadi di nengeri nya bisi indu siku ti pintar. Ku iya ngangau ari kuta nya, “Dinga! Dinga! Asuh Joap datai kitu. Aku deka bejaku enggau iya.”

¹⁷Joap lalu mansang. Indu nya lalu nanya, “Kati nuan nya Joap?” “Aku meh tu,” ku Joap nyaut. “Pendingka aku, tuan,” ku indu nya bejaku. “Mending meh aku,” ku Joap nyaut.

¹⁸Ku indu nya bejaku, “Dulu kelia, orang selalu nyebut, ‘Alai nuan mupuk, lalu giga saut di nengeri Abel.” Sida lalu ngereja nya.

¹⁹Nengeri kami tu nengeri ti besai, likun, sereta taluk di menua Israel. Nama kebuah nuan deka ngerusak nengeri tu? Kati nuan deka ngerusak pesaka TUHAN?”

²⁰“Ukai!” ku Joap nyaut. “Aku enggai ngerusak nengeri kita!

²¹Nya ukai pelan kami. Orang ke benama Sheba anak Bikri, ke datai ari menua ti bebukit di menua Epraim, udah angkat ngelaban Raja David. Serahka iya ngagai kami, nya baru kami nyurutka diri ari nengeri tu.” Lalu ku indu nya nyaut, “Kami deka nibarka pala iya ari kuta, ngagai nuan.”

²²Udah nya indu nya lalu mansang ngagai bala lelaki di nengeri nya, mai pelan iya. Sida lalu mumpung pala Sheba, lalu nibarka pala iya ari kuta nya, ngagai Joap. Joap lalu nyepu terumpit nesau semua bala iya mupuk ari nengeri nya. Sida lalu pulai. Joap pulai ngagai Jerusalem, ngagai raja.

²³Joap nya orang ke nguluka bala soldadu orang Israel, lalu Benaiah anak Jehoiada nyadi tuai orang ke nyaga David.

²⁴Adoniram nyadi tuai ngemataka bala orang ke dipejalka ngereja pengawa ti berat. Jehosapat anak Ahilut nyadi tukang tulis ke semua utai ti nyadi.

²⁵Seba nyadi kerani raja. Sadok enggau Abiatar nyadi imam,

²⁶lalu Ira, ke datai ari nengeri Jair, mega nyadi siku ari bala imam David.