Read Iban 2 Samuel 22 Bible Online

2 Samuel 22 - Iban bible

2 Samuel 22

¹Lebuh TUHAN udah ngelepaska David ari jari Saul, enggau ari jari bala munsuh iya ti bukai, David lalu nyanyi lagu tu ke TUHAN.

²Ku iya, TUHAN nya Batu Pengelepas aku, Kuta aku, Juruselamat aku.

³Allah Taala aku, Batu aku ti alai aku ngenduh, Terabai aku, Tanduk [43] pengelepas aku, Kuta aku, enggau endur alai aku ngenduh, Juruselamat aku; Nuan nyelamatka aku ari utai ti tau ngemedis.

⁴Aku ngangauka TUHAN ti endang patut dipuji, lalu Iya ngelepaska aku ari jari munsuh aku.

⁵Laban gelumbang pemati nyau ngalun ngelingi aku, lalu alun pengerusak ngelamun aku.

⁶Tali pemati melit aku, lalu panjuk pemati di mua aku.

⁷Lebuh aku kena laban penusah, aku ngangauka TUHAN. Aku ngangauka Allah Taala aku. Iya ningaka munyi nyawa aku ari Rumah Iya, lalu kangau aku didinga Iya.

⁸Udah nya tanah lalu berenyang sereta begetar. Pugu langit beguyat lalu begetar laban Allah Taala ringat!

⁹Asap pansut ari lubang idung Iya, lalu api ti mau pansut ari nyawa Iya; bara api ti mau pansut ari nyawa Iya.

¹⁰Iya nyiatka langit, lalu nurun, mua hari ti chelum di baruh kaki Iya.

¹¹Iya terebai deras nepan siku melikat cherub. Iya bejalai ngena sayap ribut.

¹²Iya malut Diri ngena pemetang. Mua hari ti tebal, ti penuh laban [44] ai, nyerayung Iya.

¹³Bara api ti mau pansut ari penampak ti ngelingi Iya.

¹⁴Udah nya TUHAN lalu bejaku munyi beguntur ari langit, lalu munyi nyawa Allah Taala ti Pemadu Bekuasa bisi didinga.

¹⁵Iya nimbakka laja Iya, lalu mambarka bala munsuh Iya. Iya ngena selar kilat ngasuh sida belanda rari.

¹⁶Buntut tasik nyau pegari lalu pugu dunya ayan, lebuh TUHAN ringat lalu ngerara bala munsuh Iya, ngena kesuh seput ti pansut ari idung Iya.

¹⁷TUHAN ngunjurka jari Iya ari serega, lalu megai aku. Iya narit aku pansut ari ai ti dalam.

¹⁸Iya ngelepaska aku ari munsuh aku ti kering enggau ari semua orang ke begedika aku, laban sida iya kelalu kering dilaban aku.

¹⁹Lebuh aku kena laban penusah, sida nyerang aku, tang TUHAN nyaga aku.

²⁰Iya nyaup aku ngerarika diri ari utai ti tau nganu. Iya ngidupka nyawa aku, laban Iya gaga ati ke aku.

²¹TUHAN ngupah aku, nitihka pengelurus aku. Iya merekatka aku, laban aku nadai penyalah

²²Laban aku udah nitihka jalai TUHAN, lalu nadai udah ngereja penyai lalu ninggalka Allah Taala aku.

²³Laban semua adat Iya di mua aku magang, lalu aku enda kala limpang ari adat Iya.

²⁴Aku nadai ngereja penyalah, lalu aku nagang diri ngereja utai ti salah.

²⁵Nya alai Iya meri aku upah, nitihka pengelurus aku, nitihka pengudus pengidup aku ba mata Iya.

²⁶O TUHAN, Nuan tetap ati ngagai orang ke tetap ati ngagai Nuan, lalu manah enggau orang [45] ti nadai penyalah.

²⁷Nuan ngayanka Diri tuchi ngagai orang ke tuchi, tang ngelaban orang ke jai.

²⁸Nuan ngidupka orang ke baruh ati, tang Nuan ngemaruhka orang ke sumbung.

²⁹Nuan, TUHAN, nyadika lampu aku. Nuan meri penampak ngagai pemetang aku.

³⁰Nuan meri aku pengering kena ngelaban munsuh aku, enggau kuasa kena ngalahka kuta sida.

³¹Naka meh pemanah pengawa Allah Taala! Jaku Iya endang tau dikarapka! Iya nyadi terabai ke semua orang ke ngenduh ba Iya.

³²Laban sapa Allah Taala kelimpah ari TUHAN? Lalu sapa ti Batu aku, kelimpah ari Allah Taala?

³³Allah Taala ti udah meri aku pengering [46] nya meh endur ti tegap alai aku ngenduh. Iya udah muka jalai ti luas ke aku.

³⁴ Iya ngasuh kaki aku laju belanda baka kaki rusa; Iya nyaga aku ba sebelah bukit.

³⁵Iya matihka aku beperang ngambika aku ulih ngena panah temaga.

³⁶Nuan udah meri aku pengelepas nyadika terabai aku, lalu tulung Nuan ba aku udah ngasuh aku kering.

³⁷Nuan udah ngasuh aku bejalai enda tesangkut, lalu kaki aku enda tekelinchir.

³⁸Aku begagaika munsuh aku, lalu ngalahka sida. Aku enda pulai ngapa, datai ke semua sida abis dirusak.

³⁹Aku ngalahka sida; aku mantap sida, lalu sida enda ulih angkat. Sida rebah di baruh kaki aku.

⁴⁰Laban Nuan udah meri aku pengering kena bamuk, lalu ngasuh bala munsuh aku alah.

⁴¹Nuan ngasuh munsuh aku rari ari aku, orang ke begedika aku, lalu aku ngerusak sida.

⁴²Sida ngiga orang nyaup sida, tang nadai siku orang nyelamatka sida. Sida ngangauka TUHAN, tang TUHAN enda nyaut sida.

⁴³Aku ngeredakka sida alus baka amau. Aku ngerenyuk sida lalu ngindik sida baka ke ngindik tanah luchak ba jalai raya.

⁴⁴Nuan udah ngelepaska aku ari laya ngelaban bala aku empu; Nuan ngasuh aku merintah mayuh bengkah bansa. Orang ke enda dikelala aku, betuaika aku.

⁴⁵Orang ari menua bukai meremi di mua aku. Lebuh sida ninga aku, sida ngasika aku.

⁴⁶Sida enda berani agi lalu sida datai getar-getar [47] ari kuta sida.

⁴⁷TUHAN endang idup! Puji meh Batu aku! Awakka Allah Taala ti nyadi Batu Pengelepas aku dikemesaika,

⁴⁸Allah Taala ti udah malas munsuh aku, lalu ngasuh semua bansa nunduk ngagai aku,

⁴⁹ti udah ngelepaska aku ari bala munsuh aku. O TUHAN, Nuan ngasuh aku menang ngelaban munsuh aku, lalu ngelepaska aku ari orang ke mangah.

⁵⁰ Nya alai, aku deka muji Nuan di mua semua bansa, lalu belagu muji nama Nuan.

⁵¹Allah Taala nyadi menara pengelepas ke raja Iya, lalu Iya ngayanka pengerindu Iya ti enda berubah ngagai orang ke udah dipilih Iya, ngagai David, enggau ngagai peturun iya belama iya.