Read Iban 2 Samuel 24 Bible Online

2 Samuel 24 - Iban bible

2 Samuel 24

¹Nyadi sekali, TUHAN ringat ngagai orang Israel. Nya alai Iya nyungkak David mai penusah ngagai sida. Ku TUHAN bejaku ngagai David, “Alai nuan ngitung tubuh orang Israel enggau orang Judah.”

²David lalu meri atur ngagai Joap, ti nyadi tuai soldadu iya: “Alai nuan enggau bala pemesai nuan bejalai nengah semua menua raban bansa orang Israel, ngagai serata menua tu, lalu itung pemayuh tubuh orang. Aku keran deka nemu pemayuh sida.”

³Tang ku Joap nyaut raja, “Tuan Raja, awakka TUHAN Allah Taala nuan ngasuh orang Israel seratus kali mayuh agi ari sida ke diatu, lalu awakka nuan panjai umur meda Iya ngereja utai nya. Tang nama kebuah Tuan Raja deka ngereja tu?”

⁴Tang raja mejalka Joap enggau bala pemesai iya ngasika atur iya. Sida angkat, lalu mansang ngitung tubuh orang Israel.

⁵Sida meraka Sungai Jordan, lalu nirika kem tunga ke timur Aroer, sebuah nengeri ti ba lebak nya, di menua Gat. [52] Ari nya sida lalu bejalai tunga ke utara, ngagai Jaser,

⁶lalu terus ngagai Giliat, enggau ngagai Kades, di menua orang Iti.[53] Udah nya sida lalu mansang ngagai Dan, lalu ari Dan sida bejalai [54] tunga ke barat, ngagai Sidon.

⁷Udah nya sida lalu bejalai ke selatan ngagai nengeri Tire ti bekuta, lalu terus ngagai semua nengeri orang Ibi, enggau orang Kanaan, lalu ke pengujung iya, ngagai Beer-seba, di selatan menua Judah.

⁸Lebuh sida udah bejalai nengah serata menua nya dalam semilan bulan dua puluh hari, sida lalu pulai ngagai Jerusalem.

⁹Sida lalu madahka ngagai raja pemayuh lelaki ti tau enggau beperang: 800,000 di menua Israel, enggau 500,000 di menua Judah.

¹⁰Tang lebuh David udah ngitung tubuh orang Israel, ati iya enda lantang, lalu ku iya bejaku enggau TUHAN, “Aku udah bedosa besai ngereja utai tu! Aku minta Nuan ngampun aku. Aku udah beli ngereja utai tu.”

¹¹TUHAN lalu bejaku ngagai Gat, ti nyadi nabi ke David, “Alai nuan madahka ngagai David. Aku ngasuh iya milih ari tiga bengkah utai, lalu Aku deka ngereja sebarang utai ti dipilih iya.” Pagi hari siti, lebuh David udah dani,

¹³Gat mansang ngagai iya, madahka utai ti udah dipadahka TUHAN, lalu iya nanya David, “Ni bagi ti dipilih nuan? Tiga [55] taun lapar pungkang di menua tu, tauka tiga bulan ngerarika diri ari munsuh kita, tauka tiga hari penyakit berampit di menua kita? Aku ngasuh nuan berundingka nya, lalu padahka saut ti diasuh nuan bai aku ngagai TUHAN.”

¹⁴Ku David nyaut, “Tusah amat ati aku! Tang aku enggai diukum orang mayuh. Awakka TUHAN Empu ngukum kitai, laban Iya nemu ngampun.”

¹⁵Nya alai TUHAN lalu ngasuh penyakit balat amat berampit di menua Israel, berengkah ari pagi nya nyentuk ngagai maya ti udah diletak Iya. Di serata menua nya, tujuh puluh ribu orang Israel mati.

¹⁶Lebuh melikat TUHAN baru deka ngerusak nengeri Jerusalem, Iya lalu ngubah runding Diri ti deka ngukum orang mayuh, lalu bejaku enggau melikat ti munuh sida, “Badu agi! Umbas meh nya!” Melikat nya udah datai ba endur alai orang ngindik gandum ti diempu Araunah, siku orang Jebus.

¹⁷David bisi meda melikat ti munuh orang mayuh, lalu ku David bejaku enggau TUHAN, “Aku empu ke salah. Aku empu ti ngereja utai ti salah. Orang tu nadai ngereja utai apa-apa. Nuan patut ngukum aku enggau kami sebilik.”

¹⁸Ba hari nya Gat mansang ngagai David, lalu bejaku enggau iya, “Alai nuan mansang ngagai endur alai nungku gandum ti diempu Araunah, lalu gaga siti alta ke TUHAN.”

¹⁹David ngasika pesan TUHAN, lalu mupuk munyi ti diasuh Gat.

²⁰Araunah malik, lalu tepedaka raja enggau bala pemesai iya, mansang ngagai iya. Araunah lalu nyungkurka diri ke tanah di mua David,

²¹lalu nanya, “Tuan Raja, nama kebuah nuan datai ditu?” Ku David nyaut, “Deka meli endur alai nuan ke ngindik tu, lalu ngaga siti alta ke TUHAN, kena nagang penyakit tu berampit.”

²²“Ambi aja, Tuan Raja,” ku Araunah bejaku, “lalu beri ngagai TUHAN sebarang utai ti dikedekaka nuan. Tu sapi ti lelaki ti tau ditunu nyadika piring ba alta nya. Tu kungkung sida, enggau papan alai ngindik, ti tau dikena menyadika api.”

²³Araunah meri semua utai nya ngagai raja lalu ku Araunah bejaku enggau raja, “Awakka TUHAN Allah Taala nuan nerima piring nuan.”

²⁴Tang ku raja nyaut, “Aku deka mayar rega utai tu ngagai nuan. Aku enggai meri ngagai TUHAN Allah Taala aku utai ti ukai ulih aku meli.” Iya lalu meli endur alai orang ke ngindik nya, enggau jelu sapi nya ngena rega lima puluh singkap duit pirak.

²⁵Udah nya David lalu ngaga sebuah alta ke TUHAN, lalu ngenjuk piring tunu, enggau piring pemaik. TUHAN nyaut sampi iya, lalu penyakit nya enda agi berampit di menua Israel.