Read Iban 2 Samuel 3 Bible Online

2 Samuel 3 - Iban bible

2 Samuel 3

¹Bala soldadu ke nyukung ruang bilik Saul, enggau bala soldadu ke nyukung ruang bilik David, lama amat beperang ngelaban pangan diri. Lebuh David mansang kering-sekering, bala munsuh iya mansang lembut-selembut.

²Tu nama anak David ke diperanakka di Hebron, nitihka ripih penuai sida: Amnon, diadaka Ahinoam ke asal ari Jesril;

³Chileap, diadaka Abigail, balu Nabal, ke asal ari Karmel; Absalom, diadaka Maakah, anak indu Raja Talmai ari Gesur;

⁴Adonijah, diadaka Hagit; Sepatiah, diadaka Abital;

⁵Itrim, diadaka Elgah. Semua anak iya tu diadaka di Hebron magang.

⁶Lebuh perang majak nyadi entara bala soldadu David enggau bala soldadu ke taluk ngagai ruang bilik Saul, kuasa Abner mansang besai agi ari kuasa semua orang bukai ke nitihka Saul.

⁷Nyadi sekali, Is-boset anak Saul betenah ngumbai Abner bisi udah tinduk enggau indu simpan Saul ke benama Rispah anak Aiah.

⁸Abner lalu pedis ati ninga jaku Is-boset, lalu ku Abner bejaku, “Kati nuan ngumbai aku ukui bekereja ke orang Judah? Kenyau ari pun menya, aku endang taluk ngagai apai nuan Saul, enggau ke bala kaban belayan iya, sereta enggau bala pangan iya, lalu aku udah nulung nuan, enggai ke nuan alah laban David. Tang, sehari tu nuan besalahka aku, ngumbai aku bekendak enggau indu!

⁹ TUHAN udah besemaya ngagai David madahka Diri deka ngerampas perintah ari jari Saul enggau ari peturun iya, lalu deka ngaga David nyadi raja menua Judah, enggau semua menua Israel. Nya alai awakka Allah Taala munuh aku, enti aku nagang utai tu nyadi!”

¹¹Is-boset balat amat takutka Abner, datai ke nyau enda berani bejaku agi.

¹²Abner lalu ngasuh bala seruan betemu enggau David, ke benung di Hebron lebuh maya nya, lalu ngasuh sida nyebut jaku tu ngaga David: “Sapa orang ke deka megai perintah di menua tu? Gaga siti sempekat enggau aku. Aku deka nulung nuan mai semua orang Israel ngalih ari nuan.”

¹³“Manah meh nya!” ku David nyaut. “Aku deka ngaga siti sempekat enggau nuan, tang nuan enda tau enda ngereja siti utai ke aku: nuan enda tau enda mai anak indu Saul, Mikal, ngagai aku lebuh nuan datai betemu enggau aku.”

¹⁴ David mega ngasuh bala seruan iya mai pesan ti munyi tu ngagai Is-boset, “Beri pulai baru ngagai aku bini aku Mikal. Aku udah meli iya ngena seratus iti ujung kulup orang Pilistin, kena aku ngambi iya nyadika bini aku.”

¹⁵Is-boset lalu ngasuh orang ngambi Mikal ari laki iya Paltiel anak Lais.

¹⁶Paltiel nitihka Mikal enggau sabak serantu jalai ngagai nengeri Bahurim. Tang lebuh Abner bejaku, “Pulai nuan,” Paltiel lalu pulai.

¹⁷Abner lalu mansang ngagai bala tuai orang Israel, lalu ku iya bejaku enggau sida, “Kita lama udah inginka David nyadi raja kita.

¹⁸Tu meh peluang kita. Kingatka utai ti udah disebut TUHAN, ‘Aku deka ngena nembiak Aku David ngelepaska orang Israel ari orang Pilistin, enggau ari semua munsuh sida.’ ”

¹⁹Abner mega bejaku enggau orang Benjamin. Udah nya iya mansang ngagai Hebron, deka madahka utai ti deka dikereja orang Benjamin enggau orang Israel.

²⁰Lebuh Abner enggau dua puluh iku orang datai ngagai David di Hebron, David lalu nyendiaka pengerami makai besai ke sida.

²¹Ku Abner madahka ngagai David, “Aku diatu deka mupuk lalu mai semua orang Israel ngalih ari Tuan Raja. Sida deka nerima nuan nyadi raja. Nya baru nuan deka bulih utai ti endang seruran dikinginka nuan, lalu merintah semua menua tu.” David ngasuh Abner mupuk, lalu iya mupuk.

²²Lebuh maya nya, Joap enggau bala pemesai David ti bukai datai pulai ngayau, mai mayuh amat perapasan. Tang Abner nadai agi di Hebron enggau David, laban David udah ngasuh iya mupuk enggau selamat.

²³Lebuh Joap enggau bala iya datai, orang lalu madahka ngagai iya pasal Abner ti udah betemu enggau Raja David, lalu udah diasuh mupuk enggau selamat.

²⁴Joap lalu betemu enggau raja, lalu bejaku enggau iya, “Nama utai tu ti udah dikereja nuan, Tuan Raja? Abner datai ngagai nuan. Nama kebuah nuan nejuka iya mupuk baka nya?

²⁵Iya datai ditu laban iya deka nipu nuan, deka nemu semua utai ti dikereja nuan, enggau tunga pejalai nuan. Nuan tentu nemu nya!”

²⁶Lebuh iya udah mupuk ari istana David, Joap lalu ngasuh seruan iya ngambi Abner. Sida lalu mai Abner pulai baru ari Telaga Sirah. Tang David nadai nemu nya.

²⁷Lebuh Abner datai di Hebron, Joap lalu mai iya ke tisi ba pintu penama nengeri nya, ngaga diri baka ke deka bejaku enggau iya kediri. Dia iya lalu ngerejang Abner ba perut. Abner dibunuh, laban iya udah munuh menyadi Joap ke benama Asahel.

²⁸Lebuh David ninga berita nya, iya lalu bejaku, “TUHAN nemu aku enggau bala nembiak aku endang nadai enggau orang munuh Abner.

²⁹Awakka Joap enggau sida sebilik diukum ketegal penyalah nya! Awakka genap serak ari peturun Joap enda tau enda bisi orang ke kena laban penyakit ranas, tauka penyakit kulit ti tau ngerampit, tauka semina nemu ngereja pengawa ti dikereja orang ke indu, tauka mati beperang, tauka enda chukup pemakai!”

³⁰Nya meh chara Joap enggau menyadi iya Abisai malas Abner ti udah munuh menyadi seduai iya Asahel, lebuh sida beperang di Gibeon.

³¹Udah nya David lalu ngasuh Joap enggau bala iya nyarikka gari diri, ngerasukka kain guni,[3] lalu ngulitka Abner. Lalu lebuh sida nganjung Abner ke kubur, Raja David bejalai ngentudika sentubung Abner.

³²Abner dikuburka di Hebron, lalu Raja David nyabak duie-duie ba kubur nya, lalu baka nya mega orang bukai.

³³Ku David nyabakka Abner: “Nama kebuah Abner enda tau enda mati baka orang ke beli?

³⁴Jari iya enda ditanchang, Lalu kaki iya enda diberekas. Iya mati baka orang ke dibunuh orang ke jai!” Orang mayuh lalu nyabakka iya baru.

³⁵Sehari nya orang mujuk David makai, tang iya besumpah, “Awakka Allah Taala munuh aku enti aku bisi makai utai sebedau padam mata panas sehari tu!”

³⁶Sida ngingatka jaku nya, lalu sida gaga ati. Iya ti bendar, semua utai ti dikereja raja, ngenyenangka ati orang Israel.

³⁷Semua bala David enggau semua orang Israel endang nemu raja sigi nadai enggau orang munuh Abner.

³⁸Ku raja bejaku enggau bala pemesai iya, “Kati kita enda nemu, sehari tu siku tuai ti tinggi pangkat di menua Israel, udah mati?

³⁹Taja pen aku tu raja ti udah dipilih Allah Taala, tang aku berasai lembut tulang sehari tu. Bala anak Seruiah tu kelalu mangah. Awakka Allah Taala ngukum orang ke jai nya nitihka utai ti udah dikereja sida!”